| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
ပာဋိဒေသနီယကဏ္ဍံ
Pāṭidesanīyakaṇḍaṃ
၁. ပဌမပာဋိဒေသနီယသိက္ခာပဒဝဏ္ဏနာ
1. Paṭhamapāṭidesanīyasikkhāpadavaṇṇanā
အန္တရဃရံ ပဝိဋ္ဌာယာတိ ရထိကံ ဗ္ယူဟံ သိင္ဃာဋကံ ဃရံ ပဝိဋ္ဌာယ။ အသပ္ပာယန္တိ သဂ္ဂမောက္ခာနံ အဟိတံ အနနုကူလံ။ ဘိက္ခုနိယာ အန္တရဃရေ ဌတ္ဝာ ဒဒမာနာယ ဝသေနေတ္ထ အာပတ္တိ ဝေဒိတဗ္ဗာ, ဘိက္ခုသ္သ ဌိတဋ္ဌာနံ ပန အပ္ပမာဏံ။ တေနာဟ ‘‘အန္တရဃရံ ပဝိဋ္ဌာယာတိ ဝစနတော’’တိအာဒိ။ အန္တရာရာမာဒီသူတိ အန္တရာရာမဘိက္ခုနုပသ္သယတိတ္ထိယသေယ္ယာပဋိက္ကမနေသု။ ရထိယာဗ္ယူဟသိင္ဃာဋကဃရာနန္တိ ဧတ္ထ ရထိယာတိ ရစ္ဆာ။ ဗ္ယူဟန္တိ အနိဗ္ဗိဇ္ဈိတ္ဝာ ဌိတာ ဂတပစ္စာဂတရစ္ဆာ။ သိင္ဃာဋကန္တိ စတုက္ကောဏံ ဝာ တိကောဏံ ဝာ မဂ္ဂသမောဓာနဋ္ဌာနံ။ ဃရန္တိ ကုလဃရံ။ ယထာ စ ရထိယာဒီသု ဌတ္ဝာ ဒဒမာနာယ ဂဏ္ဟတော အာပတ္တိ, ဧဝံ ဟတ္ထိသာလာဒီသုပိ ဒဋ္ဌဗ္ဗံ။
Antaragharaṃpaviṭṭhāyāti rathikaṃ byūhaṃ siṅghāṭakaṃ gharaṃ paviṭṭhāya. Asappāyanti saggamokkhānaṃ ahitaṃ ananukūlaṃ. Bhikkhuniyā antaraghare ṭhatvā dadamānāya vasenettha āpatti veditabbā, bhikkhussa ṭhitaṭṭhānaṃ pana appamāṇaṃ. Tenāha ‘‘antaragharaṃ paviṭṭhāyāti vacanato’’tiādi. Antarārāmādīsūti antarārāmabhikkhunupassayatitthiyaseyyāpaṭikkamanesu. Rathiyābyūhasiṅghāṭakagharānanti ettha rathiyāti racchā. Byūhanti anibbijjhitvā ṭhitā gatapaccāgataracchā. Siṅghāṭakanti catukkoṇaṃ vā tikoṇaṃ vā maggasamodhānaṭṭhānaṃ. Gharanti kulagharaṃ. Yathā ca rathiyādīsu ṭhatvā dadamānāya gaṇhato āpatti, evaṃ hatthisālādīsupi daṭṭhabbaṃ.
‘‘ယာမကာလိကာဒီသု ပဋိဂ္ဂဟဏေပိ အဇ္ဈောဟရဏေပိ ဒုက္ကဋ’’န္တိ ဣဒံ အာမိသေန အသမ္ဘိန္နံ သန္ဓာယ ဝုတ္တံ, သမ္ဘိန္နေ ပန ဧကရသေ ပာဋိဒေသနီယမေဝ။ ဧကတော ဥပသမ္ပန္နာယာတိ ဘိက္ခုနီနံ သန္တိကေ ဥပသမ္ပန္နာယ, ဘိက္ခူနံ သန္တိကေ ဥပသမ္ပန္နာယ ပန ယထာဝတ္ထုကမေဝ။
‘‘Yāmakālikādīsu paṭiggahaṇepi ajjhoharaṇepi dukkaṭa’’nti idaṃ āmisena asambhinnaṃ sandhāya vuttaṃ, sambhinne pana ekarase pāṭidesanīyameva. Ekato upasampannāyāti bhikkhunīnaṃ santike upasampannāya, bhikkhūnaṃ santike upasampannāya pana yathāvatthukameva.
ဉာတိကာယ ဝာ ဒာပေန္တိယာတိ သယံ အဒတ္ဝာ ယာယ ကာယစိ ဉာတိကာယ ဒာပေန္တိယာ, အညာတိကာယာတိ အတ္ထော။ ဥပနိက္ခိပိတ္ဝာ ဝာ ဒဒမာနာယာတိ ဘူမိယံ ဌပေတ္ဝာ ‘‘ဣဒံ, အယ္ယ, တုမ္ဟာကံ ဒမ္မီ’’တိ ဒဒမာနာယ။ ဧဝံ ဒိန္နံ ‘‘သာဓု, ဘဂိနီ’’တိ သမ္ပဋိစ္ဆိတ္ဝာ တာယ ဧဝ ဝာ ဘိက္ခုနိယာ, အညေန ဝာ ကေနစိ ပဋိဂ္ဂဟာပေတ္ဝာ ဣဒံ ဘုဉ္ဇိတုံ ဝဋ္ဋတိ။
Ñātikāya vā dāpentiyāti sayaṃ adatvā yāya kāyaci ñātikāya dāpentiyā, aññātikāyāti attho. Upanikkhipitvā vā dadamānāyāti bhūmiyaṃ ṭhapetvā ‘‘idaṃ, ayya, tumhākaṃ dammī’’ti dadamānāya. Evaṃ dinnaṃ ‘‘sādhu, bhaginī’’ti sampaṭicchitvā tāya eva vā bhikkhuniyā, aññena vā kenaci paṭiggahāpetvā idaṃ bhuñjituṃ vaṭṭati.
ပဌမပာဋိဒေသနီယသိက္ခာပဒဝဏ္ဏနာ နိဋ္ဌိတာ။
Paṭhamapāṭidesanīyasikkhāpadavaṇṇanā niṭṭhitā.
