| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
6. පාටිදෙසනීයකණ්‌ඩං
6. Pāṭidesanīyakaṇḍaṃ
1. පඨමපාටිදෙසනීයසික්‌ඛාපදවණ්‌ණනා
1. Paṭhamapāṭidesanīyasikkhāpadavaṇṇanā
පාටිදෙසනීයා ධම්‌මා, ඛුද්‌දකානං අනන්‌තරා;
Pāṭidesanīyā dhammā, khuddakānaṃ anantarā;
ඨපිතා යෙ අයං දානි, තෙසං භවති වණ්‌ණනා.
Ṭhapitā ye ayaṃ dāni, tesaṃ bhavati vaṇṇanā.
552. පඨමපාටිදෙසනීයෙ තාව පටික්‌කමනකාලෙති පිණ්‌ඩාය චරිත්‌වා පටිආගමනකාලෙ. සබ්‌බෙව අග්‌ගහෙසීති සබ්‌බමෙව අග්‌ගහෙසි. පවෙධෙන්‌තීති කම්‌පමානා. අපෙහීති අපගච්‌ඡ.
552. Paṭhamapāṭidesanīye tāva paṭikkamanakāleti piṇḍāya caritvā paṭiāgamanakāle. Sabbeva aggahesīti sabbameva aggahesi. Pavedhentīti kampamānā. Apehīti apagaccha.
553-5. ගාරය්‌හං ආවුසොතිආදි පටිදෙසෙතබ්‌බාකාරදස්‌සනං. රථිකාති රච්‌ඡා. බ්‍යූහන්‌ති අනිබ්‌බිජ්‌ඣිත්‌වා ඨිතා ගතපච්‌චාගතරච්‌ඡා. සිඞ්‌ඝාටකන්‌ති චතුක්‌කොණං වා තිකොණං වා මග්‌ගසමොධානට්‌ඨානං. ඝරන්‌ති කුලඝරං. එතෙසු යත්‌ථ කත්‌ථචි ඨත්‌වා ගණ්‌හන්‌තස්‌ස ගහණෙ දුක්‌කටං, අජ්‌ඣොහාරෙ අජ්‌ඣොහාරගණනාය පාටිදෙසනීයං. හත්‌ථිසාලාදීසු ගණ්‌හන්‌තස්‌සාපි එසෙව නයො. භික්‌ඛුනී රථිකාය ඨත්‌වා දෙති, භික්‌ඛු සචෙපි අන්‌තරාරාමාදීසු ඨත්‌වා ගණ්‌හාති, ආපත්‌තියෙව. ‘‘අන්‌තරඝරං පවිට්‌ඨායා’’ති හි වචනතො භික්‌ඛුනියා අන්‌තරඝරෙ ඨත්‌වා දදමානාය වසෙනෙත්‌ථ ආපත්‌ති වෙදිතබ්‌බා, භික්‌ඛුස්‌ස ඨිතට්‌ඨානං පන අප්‌පමාණං. තස්‌මා සචෙපි වීථිආදීසු ඨිතො භික්‌ඛු අන්‌තරාරාමාදීසු ඨත්‌වා දදමානාය භික්‌ඛුනියා ගණ්‌හාති, අනාපත්‌තියෙව.
553-5.Gārayhaṃ āvusotiādi paṭidesetabbākāradassanaṃ. Rathikāti racchā. Byūhanti anibbijjhitvā ṭhitā gatapaccāgataracchā. Siṅghāṭakanti catukkoṇaṃ vā tikoṇaṃ vā maggasamodhānaṭṭhānaṃ. Gharanti kulagharaṃ. Etesu yattha katthaci ṭhatvā gaṇhantassa gahaṇe dukkaṭaṃ, ajjhohāre ajjhohāragaṇanāya pāṭidesanīyaṃ. Hatthisālādīsu gaṇhantassāpi eseva nayo. Bhikkhunī rathikāya ṭhatvā deti, bhikkhu sacepi antarārāmādīsu ṭhatvā gaṇhāti, āpattiyeva. ‘‘Antaragharaṃ paviṭṭhāyā’’ti hi vacanato bhikkhuniyā antaraghare ṭhatvā dadamānāya vasenettha āpatti veditabbā, bhikkhussa ṭhitaṭṭhānaṃ pana appamāṇaṃ. Tasmā sacepi vīthiādīsu ṭhito bhikkhu antarārāmādīsu ṭhatvā dadamānāya bhikkhuniyā gaṇhāti, anāpattiyeva.
යාමකාලිකං සත්‌තාහකාලිකං යාවජීවිකං ආහාරත්‌ථාය පටිග්‌ගණ්‌හාති, ආපත්‌ති දුක්‌කටස්‌ස. අජ්‌ඣොහාරෙ අජ්‌ඣොහාරෙ ආපත්‌ති දුක්‌කටස්‌සාති ඉදං ආමිසෙන අසම්‌භින්‌නං සන්‌ධාය වුත්‌තං, සම්‌භින්‌නෙ පන එකරසෙ පාටිදෙසනීයමෙව. එකතො උපසම්‌පන්‌නායාති භික්‌ඛුනීනං සන්‌තිකෙ උපසම්‌පන්‌නාය. භික්‌ඛූනං සන්‌තිකෙ උපසම්‌පන්‌නාය පන යථාවත්‌ථුකමෙව.
Yāmakālikaṃ sattāhakālikaṃ yāvajīvikaṃ āhāratthāya paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassāti idaṃ āmisena asambhinnaṃ sandhāya vuttaṃ, sambhinne pana ekarase pāṭidesanīyameva. Ekato upasampannāyāti bhikkhunīnaṃ santike upasampannāya. Bhikkhūnaṃ santike upasampannāya pana yathāvatthukameva.
556. දාපෙති න දෙතීති අඤ්‌ඤාතිකා අඤ්‌ඤෙන කෙනචි දාපෙති තං ගණ්‌හන්‌තස්‌ස අනාපත්‌ති. උපනික්‌ඛිපිත්‌වා දෙතීති භූමියං ඨපෙත්‌වා ‘‘ඉදං අය්‍ය තුම්‌හාකං දම්‌මී’’ති දෙති, එවං දින්‌නං ‘‘සාධු භගිනී’’ති සම්‌පටිච්‌ඡිත්‌වා තාය එව වා භික්‌ඛුනියා අඤ්‌ඤෙන වා කෙනචි පටිග්‌ගහාපෙත්‌වා භුඤ්‌ජිතුං වට්‌ටති. සික්‌ඛමානාය සාමණෙරියාති එතාසං දදමානානං ගණ්‌හන්‌තස්‌ස අනාපත්‌ති. සෙසමෙත්‌ථ උත්‌තානමෙව.
556.Dāpeti na detīti aññātikā aññena kenaci dāpeti taṃ gaṇhantassa anāpatti. Upanikkhipitvā detīti bhūmiyaṃ ṭhapetvā ‘‘idaṃ ayya tumhākaṃ dammī’’ti deti, evaṃ dinnaṃ ‘‘sādhu bhaginī’’ti sampaṭicchitvā tāya eva vā bhikkhuniyā aññena vā kenaci paṭiggahāpetvā bhuñjituṃ vaṭṭati. Sikkhamānāya sāmaṇeriyāti etāsaṃ dadamānānaṃ gaṇhantassa anāpatti. Sesamettha uttānameva.
එළකලොමසමුට්‌ඨානං – කිරියං, නොසඤ්‌ඤාවිමොක්‌ඛං, අචිත්‌තකං, පණ්‌ණත්‌තිවජ්‌ජං, කායකම්‌මං, තිචිත්‌තං, තිවෙදනන්‌ති.
Eḷakalomasamuṭṭhānaṃ – kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
පඨමපාටිදෙසනීයං.
Paṭhamapāṭidesanīyaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 1. පඨමපාටිදෙසනීයසික්‌ඛාපදං • 1. Paṭhamapāṭidesanīyasikkhāpadaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පාටිදෙසනීයසික්‌ඛාපදවණ්‌ණනා • Pāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 1. පඨමපාටිදෙසනීයසික්‌ඛාපදවණ්‌ණනා • 1. Paṭhamapāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමපාටිදෙසනීයසික්‌ඛාපදවණ්‌ණනා • 1. Paṭhamapāṭidesanīyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 1. පඨමපාටිදෙසනීයසික්‌ඛාපද-අත්‌ථයොජනා • 1. Paṭhamapāṭidesanīyasikkhāpada-atthayojanā
