| Library / Tipiṭaka / තිපිටක • Tipiṭaka / කඞ්‌ඛාවිතරණී-අභිනව-ටීකා • Kaṅkhāvitaraṇī-abhinava-ṭīkā |
පාටිදෙසනීයකණ්‌ඩං
Pāṭidesanīyakaṇḍaṃ
1. පඨමපාටිදෙසනීයසික්‌ඛාපදවණ්‌ණනා
1. Paṭhamapāṭidesanīyasikkhāpadavaṇṇanā
අන්‌තරඝරං පවිට්‌ඨායාති රථිකං බ්‍යූහං සිඞ්‌ඝාටකං ඝරං පවිට්‌ඨාය. අසප්‌පායන්‌ති සග්‌ගමොක්‌ඛානං අහිතං අනනුකූලං. භික්‌ඛුනියා අන්‌තරඝරෙ ඨත්‌වා දදමානාය වසෙනෙත්‌ථ ආපත්‌ති වෙදිතබ්‌බා, භික්‌ඛුස්‌ස ඨිතට්‌ඨානං පන අප්‌පමාණං. තෙනාහ ‘‘අන්‌තරඝරං පවිට්‌ඨායාති වචනතො’’තිආදි. අන්‌තරාරාමාදීසූති අන්‌තරාරාමභික්‌ඛුනුපස්‌සයතිත්‌ථියසෙය්‍යාපටික්‌කමනෙසු. රථියාබ්‍යූහසිඞ්‌ඝාටකඝරානන්‌ති එත්‌ථ රථියාති රච්‌ඡා. බ්‍යූහන්‌ති අනිබ්‌බිජ්‌ඣිත්‌වා ඨිතා ගතපච්‌චාගතරච්‌ඡා. සිඞ්‌ඝාටකන්‌ති චතුක්‌කොණං වා තිකොණං වා මග්‌ගසමොධානට්‌ඨානං. ඝරන්‌ති කුලඝරං. යථා ච රථියාදීසු ඨත්‌වා දදමානාය ගණ්‌හතො ආපත්‌ති, එවං හත්‌ථිසාලාදීසුපි දට්‌ඨබ්‌බං.
Antaragharaṃpaviṭṭhāyāti rathikaṃ byūhaṃ siṅghāṭakaṃ gharaṃ paviṭṭhāya. Asappāyanti saggamokkhānaṃ ahitaṃ ananukūlaṃ. Bhikkhuniyā antaraghare ṭhatvā dadamānāya vasenettha āpatti veditabbā, bhikkhussa ṭhitaṭṭhānaṃ pana appamāṇaṃ. Tenāha ‘‘antaragharaṃ paviṭṭhāyāti vacanato’’tiādi. Antarārāmādīsūti antarārāmabhikkhunupassayatitthiyaseyyāpaṭikkamanesu. Rathiyābyūhasiṅghāṭakagharānanti ettha rathiyāti racchā. Byūhanti anibbijjhitvā ṭhitā gatapaccāgataracchā. Siṅghāṭakanti catukkoṇaṃ vā tikoṇaṃ vā maggasamodhānaṭṭhānaṃ. Gharanti kulagharaṃ. Yathā ca rathiyādīsu ṭhatvā dadamānāya gaṇhato āpatti, evaṃ hatthisālādīsupi daṭṭhabbaṃ.
‘‘යාමකාලිකාදීසු පටිග්‌ගහණෙපි අජ්‌ඣොහරණෙපි දුක්‌කට’’න්‌ති ඉදං ආමිසෙන අසම්‌භින්‌නං සන්‌ධාය වුත්‌තං, සම්‌භින්‌නෙ පන එකරසෙ පාටිදෙසනීයමෙව. එකතො උපසම්‌පන්‌නායාති භික්‌ඛුනීනං සන්‌තිකෙ උපසම්‌පන්‌නාය, භික්‌ඛූනං සන්‌තිකෙ උපසම්‌පන්‌නාය පන යථාවත්‌ථුකමෙව.
‘‘Yāmakālikādīsu paṭiggahaṇepi ajjhoharaṇepi dukkaṭa’’nti idaṃ āmisena asambhinnaṃ sandhāya vuttaṃ, sambhinne pana ekarase pāṭidesanīyameva. Ekato upasampannāyāti bhikkhunīnaṃ santike upasampannāya, bhikkhūnaṃ santike upasampannāya pana yathāvatthukameva.
ඤාතිකාය වා දාපෙන්‌තියාති සයං අදත්‌වා යාය කායචි ඤාතිකාය දාපෙන්‌තියා, අඤ්‌ඤාතිකායාති අත්‌ථො. උපනික්‌ඛිපිත්‌වා වා දදමානායාති භූමියං ඨපෙත්‌වා ‘‘ඉදං, අය්‍ය, තුම්‌හාකං දම්‌මී’’ති දදමානාය. එවං දින්‌නං ‘‘සාධු, භගිනී’’ති සම්‌පටිච්‌ඡිත්‌වා තාය එව වා භික්‌ඛුනියා, අඤ්‌ඤෙන වා කෙනචි පටිග්‌ගහාපෙත්‌වා ඉදං භුඤ්‌ජිතුං වට්‌ටති.
Ñātikāya vā dāpentiyāti sayaṃ adatvā yāya kāyaci ñātikāya dāpentiyā, aññātikāyāti attho. Upanikkhipitvā vā dadamānāyāti bhūmiyaṃ ṭhapetvā ‘‘idaṃ, ayya, tumhākaṃ dammī’’ti dadamānāya. Evaṃ dinnaṃ ‘‘sādhu, bhaginī’’ti sampaṭicchitvā tāya eva vā bhikkhuniyā, aññena vā kenaci paṭiggahāpetvā idaṃ bhuñjituṃ vaṭṭati.
පඨමපාටිදෙසනීයසික්‌ඛාපදවණ්‌ණනා නිට්‌ඨිතා.
Paṭhamapāṭidesanīyasikkhāpadavaṇṇanā niṭṭhitā.
