| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
པཱཊིདེསནཱིཡཀཎྜཾ
Pāṭidesanīyakaṇḍaṃ
༡. པཋམཔཱཊིདེསནཱིཡསིཀྑཱཔདཝཎྞནཱ
1. Paṭhamapāṭidesanīyasikkhāpadavaṇṇanā
ཨནྟརགྷརཾ པཝིཊྛཱཡཱཏི རཐིཀཾ བྱཱུཧཾ སིངྒྷཱཊཀཾ གྷརཾ པཝིཊྛཱཡ། ཨསཔྤཱཡནྟི སགྒམོཀྑཱནཾ ཨཧིཏཾ ཨནནུཀཱུལཾ། བྷིཀྑུནིཡཱ ཨནྟརགྷརེ ཋཏྭཱ དདམཱནཱཡ ཝསེནེཏྠ ཨཱཔཏྟི ཝེདིཏབྦཱ, བྷིཀྑུསྶ ཋིཏཊྛཱནཾ པན ཨཔྤམཱཎཾ། ཏེནཱཧ ‘‘ཨནྟརགྷརཾ པཝིཊྛཱཡཱཏི ཝཙནཏོ’’ཏིཨཱདི། ཨནྟརཱརཱམཱདཱིསཱུཏི ཨནྟརཱརཱམབྷིཀྑུནུཔསྶཡཏིཏྠིཡསེཡྻཱཔཊིཀྐམནེསུ། རཐིཡཱབྱཱུཧསིངྒྷཱཊཀགྷརཱནནྟི ཨེཏྠ རཐིཡཱཏི རཙྪཱ། བྱཱུཧནྟི ཨནིབྦིཛ྄ཛྷིཏྭཱ ཋིཏཱ གཏཔཙྩཱགཏརཙྪཱ། སིངྒྷཱཊཀནྟི ཙཏུཀྐོཎཾ ཝཱ ཏིཀོཎཾ ཝཱ མགྒསམོདྷཱནཊྛཱནཾ། གྷརནྟི ཀུལགྷརཾ། ཡཐཱ ཙ རཐིཡཱདཱིསུ ཋཏྭཱ དདམཱནཱཡ གཎྷཏོ ཨཱཔཏྟི, ཨེཝཾ ཧཏྠིསཱལཱདཱིསུཔི དཊྛབྦཾ།
Antaragharaṃpaviṭṭhāyāti rathikaṃ byūhaṃ siṅghāṭakaṃ gharaṃ paviṭṭhāya. Asappāyanti saggamokkhānaṃ ahitaṃ ananukūlaṃ. Bhikkhuniyā antaraghare ṭhatvā dadamānāya vasenettha āpatti veditabbā, bhikkhussa ṭhitaṭṭhānaṃ pana appamāṇaṃ. Tenāha ‘‘antaragharaṃ paviṭṭhāyāti vacanato’’tiādi. Antarārāmādīsūti antarārāmabhikkhunupassayatitthiyaseyyāpaṭikkamanesu. Rathiyābyūhasiṅghāṭakagharānanti ettha rathiyāti racchā. Byūhanti anibbijjhitvā ṭhitā gatapaccāgataracchā. Siṅghāṭakanti catukkoṇaṃ vā tikoṇaṃ vā maggasamodhānaṭṭhānaṃ. Gharanti kulagharaṃ. Yathā ca rathiyādīsu ṭhatvā dadamānāya gaṇhato āpatti, evaṃ hatthisālādīsupi daṭṭhabbaṃ.
‘‘ཡཱམཀཱལིཀཱདཱིསུ པཊིགྒཧཎེཔི ཨཛ྄ཛྷོཧརཎེཔི དུཀྐཊ’’ནྟི ཨིདཾ ཨཱམིསེན ཨསམྦྷིནྣཾ སནྡྷཱཡ ཝུཏྟཾ, སམྦྷིནྣེ པན ཨེཀརསེ པཱཊིདེསནཱིཡམེཝ། ཨེཀཏོ ཨུཔསམྤནྣཱཡཱཏི བྷིཀྑུནཱིནཾ སནྟིཀེ ཨུཔསམྤནྣཱཡ, བྷིཀྑཱུནཾ སནྟིཀེ ཨུཔསམྤནྣཱཡ པན ཡཐཱཝཏྠུཀམེཝ།
‘‘Yāmakālikādīsu paṭiggahaṇepi ajjhoharaṇepi dukkaṭa’’nti idaṃ āmisena asambhinnaṃ sandhāya vuttaṃ, sambhinne pana ekarase pāṭidesanīyameva. Ekato upasampannāyāti bhikkhunīnaṃ santike upasampannāya, bhikkhūnaṃ santike upasampannāya pana yathāvatthukameva.
ཉཱཏིཀཱཡ ཝཱ དཱཔེནྟིཡཱཏི སཡཾ ཨདཏྭཱ ཡཱཡ ཀཱཡཙི ཉཱཏིཀཱཡ དཱཔེནྟིཡཱ, ཨཉྙཱཏིཀཱཡཱཏི ཨཏྠོ། ཨུཔནིཀྑིཔིཏྭཱ ཝཱ དདམཱནཱཡཱཏི བྷཱུམིཡཾ ཋཔེཏྭཱ ‘‘ཨིདཾ, ཨཡྻ, ཏུམྷཱཀཾ དམྨཱི’’ཏི དདམཱནཱཡ། ཨེཝཾ དིནྣཾ ‘‘སཱདྷུ, བྷགིནཱི’’ཏི སམྤཊིཙྪིཏྭཱ ཏཱཡ ཨེཝ ཝཱ བྷིཀྑུནིཡཱ, ཨཉྙེན ཝཱ ཀེནཙི པཊིགྒཧཱཔེཏྭཱ ཨིདཾ བྷུཉྫིཏུཾ ཝཊྚཏི།
Ñātikāya vā dāpentiyāti sayaṃ adatvā yāya kāyaci ñātikāya dāpentiyā, aññātikāyāti attho. Upanikkhipitvā vā dadamānāyāti bhūmiyaṃ ṭhapetvā ‘‘idaṃ, ayya, tumhākaṃ dammī’’ti dadamānāya. Evaṃ dinnaṃ ‘‘sādhu, bhaginī’’ti sampaṭicchitvā tāya eva vā bhikkhuniyā, aññena vā kenaci paṭiggahāpetvā idaṃ bhuñjituṃ vaṭṭati.
པཋམཔཱཊིདེསནཱིཡསིཀྑཱཔདཝཎྞནཱ ནིཊྛིཏཱ།
Paṭhamapāṭidesanīyasikkhāpadavaṇṇanā niṭṭhitā.
