| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
7. පඨමපටිසම්‌භිදාසුත්‌තං
7. Paṭhamapaṭisambhidāsuttaṃ
38. ‘‘සත්‌තහි, භික්‌ඛවෙ, ධම්‌මෙහි සමන්‌නාගතො භික්‌ඛු නචිරස්‌සෙව චතස්‌සො පටිසම්‌භිදා සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරෙය්‍ය. කතමෙහි සත්‌තහි? ඉධ, භික්‌ඛවෙ, භික්‌ඛු ‘ඉදං මෙ චෙතසො ලීනත්‌ත’න්‌ති යථාභූතං පජානාති; අජ්‌ඣත්‌තං සංඛිත්‌තං වා චිත්‌තං ‘අජ්‌ඣත්‌තං මෙ සංඛිත්‌තං චිත්‌ත’න්‌ති යථාභූතං පජානාති; බහිද්‌ධා වික්‌ඛිත්‌තං වා චිත්‌තං ‘බහිද්‌ධා මෙ වික්‌ඛිත්‌තං චිත්‌ත’න්‌ති යථාභූතං පජානාති; තස්‌ස විදිතා වෙදනා උප්‌පජ්‌ජන්‌ති, විදිතා උපට්‌ඨහන්‌ති, විදිතා අබ්‌භත්‌ථං ගච්‌ඡන්‌ති; විදිතා සඤ්‌ඤා උප්‌පජ්‌ජන්‌ති, විදිතා උපට්‌ඨහන්‌ති, විදිතා අබ්‌භත්‌ථං ගච්‌ඡන්‌ති; විදිතා විතක්‌කා උප්‌පජ්‌ජන්‌ති, විදිතා උපට්‌ඨහන්‌ති, විදිතා අබ්‌භත්‌ථං ගච්‌ඡන්‌ති; සප්‌පායාසප්‌පායෙසු ඛො පනස්‌ස ධම්‌මෙසු හීනප්‌පණීතෙසු කණ්‌හසුක්‌කසප්‌පතිභාගෙසු නිමිත්‌තං සුග්‌ගහිතං හොති සුමනසිකතං සූපධාරිතං සුප්‌පටිවිද්‌ධං පඤ්‌ඤාය. ඉමෙහි ඛො, භික්‌ඛවෙ, සත්‌තහි ධම්‌මෙහි සමන්‌නාගතො භික්‌ඛු නචිරස්‌සෙව චතස්‌සො පටිසම්‌භිදා සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරෙය්‍යා’’ති. සත්‌තමං.
38. ‘‘Sattahi, bhikkhave, dhammehi samannāgato bhikkhu nacirasseva catasso paṭisambhidā sayaṃ abhiññā sacchikatvā upasampajja vihareyya. Katamehi sattahi? Idha, bhikkhave, bhikkhu ‘idaṃ me cetaso līnatta’nti yathābhūtaṃ pajānāti; ajjhattaṃ saṃkhittaṃ vā cittaṃ ‘ajjhattaṃ me saṃkhittaṃ citta’nti yathābhūtaṃ pajānāti; bahiddhā vikkhittaṃ vā cittaṃ ‘bahiddhā me vikkhittaṃ citta’nti yathābhūtaṃ pajānāti; tassa viditā vedanā uppajjanti, viditā upaṭṭhahanti, viditā abbhatthaṃ gacchanti; viditā saññā uppajjanti, viditā upaṭṭhahanti, viditā abbhatthaṃ gacchanti; viditā vitakkā uppajjanti, viditā upaṭṭhahanti, viditā abbhatthaṃ gacchanti; sappāyāsappāyesu kho panassa dhammesu hīnappaṇītesu kaṇhasukkasappatibhāgesu nimittaṃ suggahitaṃ hoti sumanasikataṃ sūpadhāritaṃ suppaṭividdhaṃ paññāya. Imehi kho, bhikkhave, sattahi dhammehi samannāgato bhikkhu nacirasseva catasso paṭisambhidā sayaṃ abhiññā sacchikatvā upasampajja vihareyyā’’ti. Sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7. පඨමපටිසම්‌භිදාසුත්‌තවණ්‌ණනා • 7. Paṭhamapaṭisambhidāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6-11. දුතියමිත්‌තසුත්‌තාදිවණ්‌ණනා • 6-11. Dutiyamittasuttādivaṇṇanā
