| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
5. பட²மபவாரணஸிக்கா²பத³ங்
5. Paṭhamapavāraṇasikkhāpadaṃ
236. பஞ்சமே பவாரிதாதி எத்த² வஸ்ஸங்வுத்த²பவாரணா, பச்சயபவாரணா, படிக்கே²பபவாரணா, யாவத³த்த²பவாரணா சாதி சதுப்³பி³தா⁴ஸு பவாரணாஸு யாவத³த்த²பவாரணா ச படிக்கே²பபவாரணா சாதி த்³வே பவாரணா அதி⁴ப்பேதாதி த³ஸ்ஸெந்தோ ஆஹ ‘‘ப்³ராஹ்மணேனா’’திஆதி³. ப்³ராஹ்மணேன பவாரிதாதி ஸம்ப³ந்தோ⁴. ஸயந்தி ததியந்தனிபாதோ ‘‘பவாரிதா’’திபதே³ன ஸம்ப³ந்தோ⁴. சஸத்³தோ³ அஞ்ஞத்த² யோஜேதப்³போ³ யாவத³த்த²பவாரணாய ச படிக்கே²பபவாரணாய சாதி. படிமுக²ங் அத்தனோ கே³ஹங் விஸந்தி பவிஸந்தீதி படிவிஸ்ஸகாதி வுத்தே ஆஸன்னகே³ஹவாஸிகா க³ஹேதப்³பா³தி ஆஹ ‘‘ஸாமந்தக⁴ரவாஸிகே’’தி.
236. Pañcame pavāritāti ettha vassaṃvutthapavāraṇā, paccayapavāraṇā, paṭikkhepapavāraṇā, yāvadatthapavāraṇā cāti catubbidhāsu pavāraṇāsu yāvadatthapavāraṇā ca paṭikkhepapavāraṇā cāti dve pavāraṇā adhippetāti dassento āha ‘‘brāhmaṇenā’’tiādi. Brāhmaṇena pavāritāti sambandho. Sayanti tatiyantanipāto ‘‘pavāritā’’tipadena sambandho. Casaddo aññattha yojetabbo yāvadatthapavāraṇāya ca paṭikkhepapavāraṇāya cāti. Paṭimukhaṃ attano gehaṃ visanti pavisantīti paṭivissakāti vutte āsannagehavāsikā gahetabbāti āha ‘‘sāmantagharavāsike’’ti.
237. உத்³த⁴ங்க³மோ ரவோ ஓரவோ, ஸோயேவ ஸத்³தோ³ ஓரவஸத்³தோ³, காகானங் ஓரவஸத்³தோ³ ககோரவஸத்³தோ³தி த³ஸ்ஸெந்தோ ஆஹ ‘‘காகான’’ந்திஆதி³.
237. Uddhaṅgamo ravo oravo, soyeva saddo oravasaddo, kākānaṃ oravasaddo kakoravasaddoti dassento āha ‘‘kākāna’’ntiādi.
239. தவந்துபச்சயஸ்ஸ அதீதத்த²பா⁴வங் த³ஸ்ஸேதுங் வுத்தங் ‘‘தத்த² சா’’திஆதி³. தத்தா²தி ‘‘பு⁴த்தவா’’திபதே³. யஸ்மா யேன பி⁴க்கு²னா அஜ்ஜோ²ஹரிதங் ஹோதி, தஸ்மா ஸோ ‘‘பு⁴த்தாவீ’’தி ஸங்க்²யங் க³ச்ச²தீதி யோஜனா. ஸங்கா²தி³த்வாதி த³ந்தேஹி சுண்ணங் கத்வா. தேனாதி தேன ஹேதுனா. அஸ்ஸாதி ‘‘பு⁴த்தாவீ’’திபத³ஸ்ஸ. பவாரேதி படிக்கி²பதீதி பவாரிதோ பி⁴க்கூ²தி த³ஸ்ஸெந்தோ ஆஹ ‘‘கதபவாரணோ’’தி. ஸோபி சாதி ஸோ படிக்கே²போ ச ஹோதீதி ஸம்ப³ந்தோ⁴. அஸ்ஸாதி ‘‘பவாரிதோ’’திபத³ஸ்ஸ. தத்தா²தி ‘‘அஸனங் பஞ்ஞாயதீ’’திஆதி³வசனே. யஸ்மா பு⁴த்தாவீதிபி ஸங்க்²யங் க³ச்ச²தி, தஸ்மா ந பஸ்ஸாமாதி யோஜனா. ‘‘அஸனங் பஞ்ஞாயதீ’’தி பத³பா⁴ஜனியா ‘‘பு⁴த்தாவீ’’தி மாதிகாபத³ஸ்ஸ அஸங்ஸந்த³னபா⁴வங் த³ஸ்ஸேதுங் வுத்தங் ‘‘அஸனங் பஞ்ஞாயதீதி இமினா’’திஆதி³. யஞ்சாதி யஞ்ச போ⁴ஜனங். தி³ரத்தாதீ³தி எத்த² ஆதி³ஸத்³தே³ன பஞ்சாதி³வசனங் ஸங்க³ண்ஹாதி. ஏதந்தி ‘‘பு⁴த்தாவீ’’திபத³ங்.
239. Tavantupaccayassa atītatthabhāvaṃ dassetuṃ vuttaṃ ‘‘tattha cā’’tiādi. Tatthāti ‘‘bhuttavā’’tipade. Yasmā yena bhikkhunā ajjhoharitaṃ hoti, tasmā so ‘‘bhuttāvī’’ti saṅkhyaṃ gacchatīti yojanā. Saṅkhāditvāti dantehi cuṇṇaṃ katvā. Tenāti tena hetunā. Assāti ‘‘bhuttāvī’’tipadassa. Pavāreti paṭikkhipatīti pavārito bhikkhūti dassento āha ‘‘katapavāraṇo’’ti. Sopi cāti so paṭikkhepo ca hotīti sambandho. Assāti ‘‘pavārito’’tipadassa. Tatthāti ‘‘asanaṃ paññāyatī’’tiādivacane. Yasmā bhuttāvītipi saṅkhyaṃ gacchati, tasmā na passāmāti yojanā. ‘‘Asanaṃ paññāyatī’’ti padabhājaniyā ‘‘bhuttāvī’’ti mātikāpadassa asaṃsandanabhāvaṃ dassetuṃ vuttaṃ ‘‘asanaṃ paññāyatīti iminā’’tiādi. Yañcāti yañca bhojanaṃ. Dirattādīti ettha ādisaddena pañcādivacanaṃ saṅgaṇhāti. Etanti ‘‘bhuttāvī’’tipadaṃ.
‘‘அஸனங் பஞ்ஞாயதீ’’திஆதீ³ஸு வினிச்ச²யோ ஏவங் வேதி³தப்³போ³தி ஸம்ப³ந்தோ⁴. ‘‘பஞ்ஞாயதீ’’தி எத்த² ஞாதா⁴துயா கா²யனத்த²ங் த³ஸ்ஸேதுங் வுத்தங் ‘‘தி³ஸ்ஸதீ’’தி. ‘‘ஹத்த²பாஸே’’திபத³ஸ்ஸ த்³வாத³ஸஹத்த²ப்பமாணோ ஹத்த²பாஸோ நாதி⁴ப்பேதோதி ஆஹ ‘‘அட்³ட⁴தெய்யஹத்த²ப்பமாணே’’தி. வாசாய அபி⁴ஹரணங் நாதி⁴ப்பேதங். தேனாஹ ‘‘காயேனா’’தி. அபி⁴ஹரதீதி அபி⁴முக²ங் ஹரதி. தந்தி போ⁴ஜனங். ஏதந்தி பஞ்சங்க³பா⁴வங், ‘‘பஞ்சஹி…பே॰… பஞ்ஞாயதீ’’தி வசனங் வா.
‘‘Asanaṃ paññāyatī’’tiādīsu vinicchayo evaṃ veditabboti sambandho. ‘‘Paññāyatī’’ti ettha ñādhātuyā khāyanatthaṃ dassetuṃ vuttaṃ ‘‘dissatī’’ti. ‘‘Hatthapāse’’tipadassa dvādasahatthappamāṇo hatthapāso nādhippetoti āha ‘‘aḍḍhateyyahatthappamāṇe’’ti. Vācāya abhiharaṇaṃ nādhippetaṃ. Tenāha ‘‘kāyenā’’ti. Abhiharatīti abhimukhaṃ harati. Tanti bhojanaṃ. Etanti pañcaṅgabhāvaṃ, ‘‘pañcahi…pe… paññāyatī’’ti vacanaṃ vā.
தத்ராதி ‘‘அஸனங் பஞ்ஞாயதீ’’திஆதி³வசனே. அஸ்னாதீதி கீயாதி³க³ணத்தா, தஸ்ஸ ச ஏகக்க²ரதா⁴துத்தா ஸகாரனகாரானங் ஸங்யோகோ³ த³ட்ட²ப்³போ³. தந்தி போ⁴ஜனங். உந்த³தி பஸவதி பு⁴ஞ்ஜந்தானங் ஆயுப³லங் ஜனேதீதி ஓத³னோ. யவாத³யோ பூதிங் கத்வா கதத்தா குச்சி²தேன மஸீயதி ஆமஸீயதீதி குமாஸோ. ஸசதி ஸமவாயோ ஹுத்வா ப⁴வதீதி ஸத்து. ப்³யஞ்ஜனத்தா²ய மாரேதப்³போ³தி மச்சோ². மானீயதி பு⁴ஞ்ஜந்தேஹீதி மங்ஸங். தத்தா²தி ஓத³னாதீ³ஸு பஞ்சஸு போ⁴ஜனேஸு. ஸாரோ அஸ்ஸத்தி² அஞ்ஞேஸங் த⁴ஞ்ஞானந்தி ஸாலீ. வஹதி பு⁴ஞ்ஜந்தானங் ஜீவிதந்தி வீஹி. யவதி அமிஸ்ஸிதோபி மிஸ்ஸிதோ விய ப⁴வதீதி யவோ. கு³த⁴தி பரிவேட²தி மிலக்க²போ⁴ஜனத்தாதி கோ³து⁴மோ. ஸோப⁴னஸீஸத்தா கமனீயபா⁴வங் க³ச்ச²தீதி கங்கு³. மஹந்தஸீஸத்தா, மது⁴ரரஸனாளத்தா ச வரீயதி பத்தீ²யதி ஜனேஹீதி வரகோ. கோரங் ருதி⁴ரங் தூ³ஸதி பு⁴ஞ்ஜந்தானந்தி குத்³ரூஸகோ. நிப்³ப³த்தோ ஓத³னோ நாமாதி ஸம்ப³ந்தோ⁴. தத்தா²தி ஸத்தஸு த⁴ஞ்ஞேஸு. ஸாலீதீதி எத்த² இதிஸத்³தோ³ நாமபரியாயோ. ஸாலீ நாமாதி அத்தோ². ஏஸேவ நயோ ‘‘வீஹீதீ’’திஆதீ³ஸுபி.
Tatrāti ‘‘asanaṃ paññāyatī’’tiādivacane. Asnātīti kīyādigaṇattā, tassa ca ekakkharadhātuttā sakāranakārānaṃ saṃyogo daṭṭhabbo. Tanti bhojanaṃ. Undati pasavati bhuñjantānaṃ āyubalaṃ janetīti odano. Yavādayo pūtiṃ katvā katattā kucchitena masīyati āmasīyatīti kumāso. Sacati samavāyo hutvā bhavatīti sattu. Byañjanatthāya māretabboti maccho. Mānīyati bhuñjantehīti maṃsaṃ. Tatthāti odanādīsu pañcasu bhojanesu. Sāro assatthi aññesaṃ dhaññānanti sālī. Vahati bhuñjantānaṃ jīvitanti vīhi. Yavati amissitopi missito viya bhavatīti yavo. Gudhati pariveṭhati milakkhabhojanattāti godhumo. Sobhanasīsattā kamanīyabhāvaṃ gacchatīti kaṅgu. Mahantasīsattā, madhurarasanāḷattā ca varīyati patthīyati janehīti varako. Koraṃ rudhiraṃ dūsati bhuñjantānanti kudrūsako. Nibbatto odano nāmāti sambandho. Tatthāti sattasu dhaññesu. Sālītīti ettha itisaddo nāmapariyāyo. Sālī nāmāti attho. Eseva nayo ‘‘vīhītī’’tiādīsupi.
எத்தா²தி திணத⁴ஞ்ஞஜாதீஸு. நீவாரோ ஸாலியா அனுலோமோ, வரகசோரகோ வரகஸ்ஸ அனுலோமோ. அம்பி³லபாயாஸாதீ³ஸூதி எத்த² ஆதி³ஸத்³தே³ன கீ²ரப⁴த்தாத³யோ ஸங்க³ண்ஹந்தி. ஓதீ⁴தி அவதி⁴, மரியாதோ³தி அத்தோ². ஸோ ஹி அவஹீயதி சஜீயதி அஸ்மாதி ஓதீ⁴தி வுச்சதி.
Etthāti tiṇadhaññajātīsu. Nīvāro sāliyā anulomo, varakacorako varakassa anulomo. Ambilapāyāsādīsūti ettha ādisaddena khīrabhattādayo saṅgaṇhanti. Odhīti avadhi, mariyādoti attho. So hi avahīyati cajīyati asmāti odhīti vuccati.
யோபி பாயாஸோ வா யாபி அம்பி³லயாகு³ வா ஓதி⁴ங் ந த³ஸ்ஸேதி, ஸோ பவாரணங் ந ஜனேதீதி யோஜனா. பயேன கீ²ரேன கதத்தா பாயாஸோ. பாதப்³ப³ஸ்ஸ, அஸிதப்³ப³ஸ்ஸ சாதி த்³வின்னங் ப்³யுப்பத்தினிமித்தானங் ஸம்ப⁴வதோ வா பாயாஸோதி வுச்சதி. உத்³த⁴னதோதி சுல்லிதோ. ஸா ஹி உபரி தீ⁴யந்தி ட²பியந்தி தா²ல்யாத³யோ எத்தா²தி உத்³த⁴னந்தி வுச்சதி. ஆவஜ்ஜித்வாதி பரிணாமெத்வா. க⁴னபா⁴வந்தி கதி²னபா⁴வங். எத்தா²பி வாக்யே ‘‘யோ ஸோ’’தி பதா³னி யோஜேதப்³பா³னி. புப்³பே³தி அப்³பு⁴ண்ஹகாலே. நிமந்தனேதி நிமந்தனட்டா²னே. ப⁴த்தே ஆகிரித்வா தெ³ந்தீதி ஸம்ப³ந்தோ⁴. யாபனங் க³ச்ச²தி இமாயாதி யாகு³. கிஞ்சாபி தனுகா ஹோதி, ததா²பீதி யோஜனா. உத³காதீ³ஸூதிஆதி³ஸத்³தே³ன கிஞ்ஜிககீ²ராத³யோ ஸங்க³ய்ஹந்தி. யாகு³ஸங்க³ஹமேவ க³ச்ச²தி, கஸ்மா? உத³காதீ³னங் பக்குதி²தத்தாதி அதி⁴ப்பாயோ. தஸ்மிங் வாதி ஸப⁴த்தே, பக்குதி²தஉத³காதி³கே வா. அஞ்ஞஸ்மிங் வாதி பக்குதி²தஉத³காதி³தோ அஞ்ஞஸ்மிங் உத³காதி³கே வா. யத்த² யஸ்மிங் உத³காதி³கே பக்கி²பந்தி, தங் பவாரணங் ஜனேதீதி யோஜனா.
Yopi pāyāso vā yāpi ambilayāgu vā odhiṃ na dasseti, so pavāraṇaṃ na janetīti yojanā. Payena khīrena katattā pāyāso. Pātabbassa, asitabbassa cāti dvinnaṃ byuppattinimittānaṃ sambhavato vā pāyāsoti vuccati. Uddhanatoti cullito. Sā hi upari dhīyanti ṭhapiyanti thālyādayo etthāti uddhananti vuccati. Āvajjitvāti pariṇāmetvā. Ghanabhāvanti kathinabhāvaṃ. Etthāpi vākye ‘‘yo so’’ti padāni yojetabbāni. Pubbeti abbhuṇhakāle. Nimantaneti nimantanaṭṭhāne. Bhatte ākiritvā dentīti sambandho. Yāpanaṃ gacchati imāyāti yāgu. Kiñcāpi tanukā hoti, tathāpīti yojanā. Udakādīsūtiādisaddena kiñjikakhīrādayo saṅgayhanti. Yāgusaṅgahameva gacchati, kasmā? Udakādīnaṃ pakkuthitattāti adhippāyo. Tasmiṃ vāti sabhatte, pakkuthitaudakādike vā. Aññasmiṃ vāti pakkuthitaudakādito aññasmiṃ udakādike vā. Yattha yasmiṃ udakādike pakkhipanti, taṃ pavāraṇaṃ janetīti yojanā.
ஸுத்³த⁴ரஸகோதி மச்ச²மங்ஸக²ண்ட³ன்ஹாரூஹி அமிஸ்ஸோ ஸுத்³தோ⁴ மச்சா²தி³ரஸகோ. ரஸகயாகூ³தி ரஸகபூ⁴தா த்³ரவபூ⁴தா யாகு³. க⁴னயாகூ³தி கதி²னயாகு³. எத்தா²தி க⁴னயாகு³யங். புப்பி²அத்தா²யாதி புப்ப²ங் பு²ல்லங் இமஸ்ஸ க²ஜ்ஜகஸ்ஸாதி புப்பீ², புப்பி²னோ அத்தோ² பயோஜனங் புப்பி²அத்தோ², தத³த்தா²ய கதந்தி ஸம்ப³ந்தோ⁴. தே தண்டு³லேதி தே ஸேதி³ததண்டு³லே. அசுண்ணத்தா நேவ ஸத்துஸங்க்²யங், அபக்கத்தா ந ப⁴த்தஸங்க்²யங் க³ச்ச²ந்தி. தேஹீதி ஸேதி³ததண்டு³லேஹி. தே தண்டு³லே பசந்தி, கரொந்தீதி ஸம்ப³ந்தோ⁴.
Suddharasakoti macchamaṃsakhaṇḍanhārūhi amisso suddho macchādirasako. Rasakayāgūti rasakabhūtā dravabhūtā yāgu. Ghanayāgūti kathinayāgu. Etthāti ghanayāguyaṃ. Pupphiatthāyāti pupphaṃ phullaṃ imassa khajjakassāti pupphī, pupphino attho payojanaṃ pupphiattho, tadatthāya katanti sambandho. Te taṇḍuleti te seditataṇḍule. Acuṇṇattā neva sattusaṅkhyaṃ, apakkattā na bhattasaṅkhyaṃ gacchanti. Tehīti seditataṇḍulehi. Te taṇḍule pacanti, karontīti sambandho.
‘‘யவேஹீ’’தி ப³ஹுவசனேன ஸத்த த⁴ஞ்ஞானிபி க³ஹிதானி. ஏஸ நயோ ஸாலிவீஹியவேஹீதி எத்தா²பி. து²ஸேதி த⁴ஞ்ஞதசே. பலாபெத்வாதி படிக்கமாபெத்வா . தந்தி சுண்ணங் க³ச்ச²தீதி ஸம்ப³ந்தோ⁴. க²ரபாகப⁴ஜ்ஜிதானந்தி க²ரோ பாகோ க²ரபாகோ, க²ரபாகேன ப⁴ஜ்ஜிதா க²ரபாகப⁴ஜ்ஜிதா, தேஸங். ந பவாரெந்தி அஸத்துஸங்க³ஹத்தாதி அதி⁴ப்பாயோ. குண்ட³கம்பீதி கணம்பி. பவாரேதி ஸத்துஸங்க³ஹத்தாதி அதி⁴ப்பாயோ. தேஹீதி லாஜேஹி. ஸுத்³த⁴க²ஜ்ஜகந்தி பிட்டே²ஹி அமிஸ்ஸிதங் ஸுத்³த⁴ங் ப²லாப²லாதி³க²ஜ்ஜகங். யாகு³ங் பிவந்தஸ்ஸ தெ³ந்தீதி யோஜனா. தானீதி த்³வே மச்ச²மங்ஸக²ண்டா³னி. ந பவாரேதி த்³வின்னங் மச்ச²மங்ஸக²ண்டா³னங் அகா²தி³தத்தாதி அதி⁴ப்பாயோ. ததோதி த்³வேமச்ச²மங்ஸக²ண்ட³தோ நீஹரித்வா ஏகந்தி ஸம்ப³ந்தோ⁴, தேஸு வா. ஸோதி கா²த³கோ பி⁴க்கு². அஞ்ஞந்தி த்³வீஹி மச்ச²மங்ஸக²ண்டே³ஹி அஞ்ஞங் பவாரணபஹோனகங் போ⁴ஜனங்.
‘‘Yavehī’’ti bahuvacanena satta dhaññānipi gahitāni. Esa nayo sālivīhiyavehīti etthāpi. Thuseti dhaññatace. Palāpetvāti paṭikkamāpetvā . Tanti cuṇṇaṃ gacchatīti sambandho. Kharapākabhajjitānanti kharo pāko kharapāko, kharapākena bhajjitā kharapākabhajjitā, tesaṃ. Na pavārenti asattusaṅgahattāti adhippāyo. Kuṇḍakampīti kaṇampi. Pavāreti sattusaṅgahattāti adhippāyo. Tehīti lājehi. Suddhakhajjakanti piṭṭhehi amissitaṃ suddhaṃ phalāphalādikhajjakaṃ. Yāguṃ pivantassa dentīti yojanā. Tānīti dve macchamaṃsakhaṇḍāni. Na pavāreti dvinnaṃ macchamaṃsakhaṇḍānaṃ akhāditattāti adhippāyo. Tatoti dvemacchamaṃsakhaṇḍato nīharitvā ekanti sambandho, tesu vā. Soti khādako bhikkhu. Aññanti dvīhi macchamaṃsakhaṇḍehi aññaṃ pavāraṇapahonakaṃ bhojanaṃ.
அவத்து²தாயாதி பவாரணாய அவத்து²பா⁴வதோ. தங் வித்தா²ரெந்தோ ஆஹ ‘‘யங் ஹீ’’தி. ஹிஸத்³தோ³ வித்தா²ரஜோதகோ. யந்தி மங்ஸங். இத³ங் பனாதி இத³ங் மங்ஸங் பன. படிக்கி²த்தமங்ஸங் கப்பியபா⁴வதோ அபடிக்கி²பிதப்³ப³ட்டா²னே டி²தத்தா படிக்கி²த்தம்பி மங்ஸபா⁴வங் ந ஜஹாதி. நனு கா²தி³தமங்ஸங் பன அகப்பியபா⁴வதோ படிக்கி²பிதப்³ப³ட்டா²னே டி²தத்தா கா²தி³யமானம்பி மங்ஸபா⁴வங் ஜஹாதீதி ஆஹ ‘‘யங் பனா’’திஆதி³. குலதூ³ஸககம்மஞ்ச வேஜ்ஜகம்மஞ்ச உத்தரிமனுஸ்ஸத⁴ம்மாரோசனஞ்ச ஸாதி³தரூபியஞ்ச குல…பே॰… ரூபியானி, தானி ஆதீ³னி யேஸங் குஹனாதீ³னந்தி குல…பே॰… ரூபியாத³யோ, தேஹி. ஸப்³ப³த்தா²தி ஸப்³பே³ஸு வாரேஸு.
Avatthutāyāti pavāraṇāya avatthubhāvato. Taṃ vitthārento āha ‘‘yaṃ hī’’ti. Hisaddo vitthārajotako. Yanti maṃsaṃ. Idaṃ panāti idaṃ maṃsaṃ pana. Paṭikkhittamaṃsaṃ kappiyabhāvato apaṭikkhipitabbaṭṭhāne ṭhitattā paṭikkhittampi maṃsabhāvaṃ na jahāti. Nanu khāditamaṃsaṃ pana akappiyabhāvato paṭikkhipitabbaṭṭhāne ṭhitattā khādiyamānampi maṃsabhāvaṃ jahātīti āha ‘‘yaṃ panā’’tiādi. Kuladūsakakammañca vejjakammañca uttarimanussadhammārocanañca sāditarūpiyañca kula…pe… rūpiyāni, tāni ādīni yesaṃ kuhanādīnanti kula…pe… rūpiyādayo, tehi. Sabbatthāti sabbesu vāresu.
ஏவந்திஆதி³ நிக³மனநித³ஸ்ஸனங். தந்தி போ⁴ஜனங். யதா²தி யேனாகாரேன. யேன அஜ்ஜோ²ஹடங் ஹோதி, ஸோ படிக்கி²பதி பவாரேதீதி யோஜனா. கத்த²சீதி கிஸ்மிஞ்சி பத்தாதி³கே. தஸ்மிங் சே அந்தரேதி தஸ்மிங் க²ணே சே. அஞ்ஞத்ராதி அஞ்ஞஸ்மிங் டா²னே. பத்தே விஜ்ஜமானபோ⁴ஜனங் அனஜ்ஜோ²ஹரிதுகாமோ ஹோதி யதா², ஏவந்தி யோஜனா. ஹீதி ஸச்சங். ஸப்³ப³த்தா²தி ஸப்³பே³ஸு பதே³ஸு. தத்தா²தி குருந்தீ³யங். ஆனிஸத³ஸ்ஸாதி ஆக³ம்ம நிஸீத³தி ஏதேனாதி ஆனிஸதோ³, தஸ்ஸ பச்சி²மந்ததோதி ஸம்ப³ந்தோ⁴. பண்ஹிஅந்ததோதி பஸதி டி²தகாலே வா க³மனகாலே வா பூ⁴மிங் பு²ஸதீதி பண்ஹீ, தஸ்ஸ அந்ததோ. ‘‘தா³யகஸ்ஸா’’திபத³ங் ‘‘பஸாரிதஹத்த²’’ந்தி பதே³ன ச ‘‘அங்க³’’ந்தி பதே³ன ச அவயவீஸம்ப³ந்தோ⁴. ஹத்த²பாஸோதி ஹத்த²ஸ்ஸ பாஸோ ஸமீபோ ஹத்த²பாஸோ, ஹத்தோ² பஸதி பு²ஸதி அஸ்மிங் டா²னேதி வா ஹத்த²பாஸோ, அட்³ட⁴தெய்யஹத்தோ² பதே³ஸோ. தஸ்மிந்தி ஹத்த²பாஸே.
Evantiādi nigamananidassanaṃ. Tanti bhojanaṃ. Yathāti yenākārena. Yena ajjhohaṭaṃ hoti, so paṭikkhipati pavāretīti yojanā. Katthacīti kismiñci pattādike. Tasmiṃ ce antareti tasmiṃ khaṇe ce. Aññatrāti aññasmiṃ ṭhāne. Patte vijjamānabhojanaṃ anajjhoharitukāmo hoti yathā, evanti yojanā. Hīti saccaṃ. Sabbatthāti sabbesu padesu. Tatthāti kurundīyaṃ. Ānisadassāti āgamma nisīdati etenāti ānisado, tassa pacchimantatoti sambandho. Paṇhiantatoti pasati ṭhitakāle vā gamanakāle vā bhūmiṃ phusatīti paṇhī, tassa antato. ‘‘Dāyakassā’’tipadaṃ ‘‘pasāritahattha’’nti padena ca ‘‘aṅga’’nti padena ca avayavīsambandho. Hatthapāsoti hatthassa pāso samīpo hatthapāso, hattho pasati phusati asmiṃ ṭhāneti vā hatthapāso, aḍḍhateyyahattho padeso. Tasminti hatthapāse.
உபனாமேதீதி ஸமீபங் நாமேதி. அனந்தரனிஸின்னோபீதி ஹத்த²பாஸங் அவிஜஹித்வா அனந்தரே டா²னே நிஸின்னோபி பி⁴க்கு² வத³தீதி யோஜனா. ப⁴த்தபச்சி²ந்தி ப⁴த்தேன பக்கி²த்தங் பச்சி²ங். ஈஸகந்தி பா⁴வனபுங்ஸகங். உத்³த⁴ரித்வா வா அபனாமெத்வா வாதி ஸம்ப³ந்தி⁴தப்³ப³ங். தூ³ரேதி நவாஸனே. இதோதி பத்ததோ. க³தோ தூ³தோதி ஸம்ப³ந்தோ⁴.
Upanāmetīti samīpaṃ nāmeti. Anantaranisinnopīti hatthapāsaṃ avijahitvā anantare ṭhāne nisinnopi bhikkhu vadatīti yojanā. Bhattapacchinti bhattena pakkhittaṃ pacchiṃ. Īsakanti bhāvanapuṃsakaṃ. Uddharitvā vā apanāmetvā vāti sambandhitabbaṃ. Dūreti navāsane. Itoti pattato. Gato dūtoti sambandho.
பரிவேஸனாயாதி பரிவேஸனத்தா²ய, ப⁴த்தக்³கே³ வா. தத்ராதி அஸ்மிங் பரிவேஸனே. தந்தி ப⁴த்தபச்சி²ங். பு²ட்ட²மத்தாவாதி பு²ஸியமத்தாவ. கடச்சு²னா உத்³த⁴டப⁴த்தே பன பவாரணா ஹோதீதி யோஜனா. ஹீதி ஸச்சங், யஸ்மா வா. தஸ்ஸாதி பரிவேஸகஸ்ஸ. அபி⁴ஹடே படிக்கி²த்தத்தாதி அபி⁴ஹடஸ்ஸ ப⁴த்தஸ்ஸ படிக்கி²த்தபா⁴வதோ.
Parivesanāyāti parivesanatthāya, bhattagge vā. Tatrāti asmiṃ parivesane. Tanti bhattapacchiṃ. Phuṭṭhamattāvāti phusiyamattāva. Kaṭacchunā uddhaṭabhatte pana pavāraṇā hotīti yojanā. Hīti saccaṃ, yasmā vā. Tassāti parivesakassa. Abhihaṭe paṭikkhittattāti abhihaṭassa bhattassa paṭikkhittabhāvato.
‘‘காயேன வாசாய வா படிக்கி²பந்தஸ்ஸ பவாரணா ஹோதீ’’தி ஸங்கே²பேன வுத்தமத்த²ங் வித்தா²ரேன த³ஸ்ஸெந்தோ ஆஹ ‘‘தத்தா²’’திஆதி³. தத்தா²தி தேஸு காயவாசாபடிக்கே²பேஸு. மச்சி²கபீ³ஜனிந்தி மக்கி²கானங் உத்தாஸனிங் பீ³ஜனிங். க²காரஸ்ஸ ஹி ச²காரங் கத்வா ‘‘மச்சி²கா’’தி வுச்சதி ‘‘ஸச்சி²கத்வா’’திஆதீ³ஸு விய (அ॰ நி॰ 3.103). எத்த² ஹி ‘‘ஸக்கி²கத்வா’’தி வத்தப்³பே³ க²காரஸ்ஸ ச²காரோ ஹோதி.
‘‘Kāyena vācāya vā paṭikkhipantassa pavāraṇā hotī’’ti saṅkhepena vuttamatthaṃ vitthārena dassento āha ‘‘tatthā’’tiādi. Tatthāti tesu kāyavācāpaṭikkhepesu. Macchikabījaninti makkhikānaṃ uttāsaniṃ bījaniṃ. Khakārassa hi chakāraṃ katvā ‘‘macchikā’’ti vuccati ‘‘sacchikatvā’’tiādīsu viya (a. ni. 3.103). Ettha hi ‘‘sakkhikatvā’’ti vattabbe khakārassa chakāro hoti.
ஏகோ வத³தீதி ஸம்ப³ந்தோ⁴. அபனெத்வாதி பத்ததோ அபனெத்வா. எத்தா²தி வசனே. கத²ந்தி கேனாகாரேன ஹோதீதி யோஜனா. வத³ந்தஸ்ஸ நாமாதி எத்த² நாமஸத்³தோ³ க³ரஹத்தோ² ‘‘அத்தீ²’’திபதே³ன யோஜேதப்³போ³. அத்தி² நாமாதி அத்தோ². இதோபீதி பத்ததோபி. தத்ராபீதி தஸ்மிங் வசனேபி.
Eko vadatīti sambandho. Apanetvāti pattato apanetvā. Etthāti vacane. Kathanti kenākārena hotīti yojanā. Vadantassa nāmāti ettha nāmasaddo garahattho ‘‘atthī’’tipadena yojetabbo. Atthi nāmāti attho. Itopīti pattatopi. Tatrāpīti tasmiṃ vacanepi.
ஸமங்ஸகந்தி மங்ஸேன ஸஹ பவத்தங். ரஸந்தி த்³ரவங். தந்தி வசனங். படிக்கி²பதோ ஹோதி. கஸ்மா? மச்சோ² ச ரஸோ ச மச்சே²ன மிஸ்ஸோ ரஸோ சாதி அத்த²ஸ்ஸ ஸம்ப⁴வதோ. இத³ந்தி வத்து²ங். மங்ஸங் விஸுங் கத்வாதி ‘‘மங்ஸஸ்ஸ ரஸங் மங்ஸரஸ’’ந்தி மங்ஸபத³த்த²ஸ்ஸ பதா⁴னபா⁴வங் அகத்வா, ரஸபத³த்த²ஸ்ஸேவ பதா⁴னபா⁴வங் கத்வாதி அத்தோ².
Samaṃsakanti maṃsena saha pavattaṃ. Rasanti dravaṃ. Tanti vacanaṃ. Paṭikkhipato hoti. Kasmā? Maccho ca raso ca macchena misso raso cāti atthassa sambhavato. Idanti vatthuṃ. Maṃsaṃ visuṃ katvāti ‘‘maṃsassa rasaṃ maṃsarasa’’nti maṃsapadatthassa padhānabhāvaṃ akatvā, rasapadatthasseva padhānabhāvaṃ katvāti attho.
ஆபுச்ச²ந்தந்தி ‘‘மங்ஸரஸங் க³ண்ஹதா²’’தி ஆபுச்ச²ந்தங். தந்தி மங்ஸங். கரம்ப³கோதி மிஸ்ஸகாதி⁴வசனமேதங். யஞ்ஹி அஞ்ஞேன அஞ்ஞேன மிஸ்ஸெத்வா கரொந்தி, ஸோ ‘‘கரம்ப³கோ’’தி வுச்சதி. அயங் பனெத்த² வசனத்தோ² – கரோதி ஸமூஹங் அவயவிந்தி கரோ, கரீயதி வா ஸமூஹேன அவயவினாதி கரோ, அவயவோ, தங் வகதி ஆத³தா³தீதி கரம்ப³கோ, ஸமூஹோ. ‘‘கத³ம்ப³கோ’’திபி பாடோ², ஸோபி யுத்தோயேவ அனுமதத்தா பண்டி³தேஹி. அபி⁴தா⁴னேபி ஏவமேவ அத்தீ². அத்தோ² பன அஞ்ஞதா² சிந்தேதப்³போ³. இமஸ்மிங் வா அத்தே² ரகாரஸ்ஸ த³காரோ காதப்³போ³. மங்ஸேன மிஸ்ஸோ, லக்கி²தோ வா கரம்ப³கோ மங்ஸகரம்ப³கோ. ந பவாரேதீதி யேஸங் கேஸஞ்சி மிஸ்ஸகத்தா ந பவாரேதி. பவாரேதீதி மங்ஸேன மிஸ்ஸிதத்தா பவாரேதி.
Āpucchantanti ‘‘maṃsarasaṃ gaṇhathā’’ti āpucchantaṃ. Tanti maṃsaṃ. Karambakoti missakādhivacanametaṃ. Yañhi aññena aññena missetvā karonti, so ‘‘karambako’’ti vuccati. Ayaṃ panettha vacanattho – karoti samūhaṃ avayavinti karo, karīyati vā samūhena avayavināti karo, avayavo, taṃ vakati ādadātīti karambako, samūho. ‘‘Kadambako’’tipi pāṭho, sopi yuttoyeva anumatattā paṇḍitehi. Abhidhānepi evameva atthī. Attho pana aññathā cintetabbo. Imasmiṃ vā atthe rakārassa dakāro kātabbo. Maṃsena misso, lakkhito vā karambako maṃsakarambako. Na pavāretīti yesaṃ kesañci missakattā na pavāreti. Pavāretīti maṃsena missitattā pavāreti.
யோ பன படிக்கி²பதி, ஸோ பவாரிதோவ ஹோதீதி யோஜனா. நிமந்தனேதி நிமந்தனட்டா²னே. ஹீதி ஸச்சங். தத்தா²தி குருந்தி³யங். யேனாதி யேன ப⁴த்தேன. எத்தா²தி ‘‘யாகு³ங் க³ண்ஹதா²’’திஆதி³வசனே. அதி⁴ப்பாயோதி அட்ட²கதா²சரியானங் அதி⁴ப்பாயோ. எத்தா²தி ‘‘யாகு³மிஸ்ஸகங் க³ண்ஹதா²’’திஆதி³வசனே. து³த்³த³ஸந்தி து³க்கரங் த³ஸ்ஸனங். இத³ஞ்சாதி ‘‘மிஸ்ஸகங் க³ண்ஹதா²’’திவசனஞ்ச. ந ஸமானேதப்³ப³ந்தி ஸமங் ந ஆனேதப்³ப³ங், ஸமானங் வா ந காதப்³ப³ங். ஹீதி ஸச்சங், யஸ்மா வா. இத³ங் பனாதி மிஸ்ஸகங் பன. எத்தா²தி மிஸ்ஸகே. விஸுங் கத்வாதி ரஸகீ²ரஸப்பீனி ஆவேணிங் கத்வா. தந்தி ரஸாதி³ங்.
Yo pana paṭikkhipati, so pavāritova hotīti yojanā. Nimantaneti nimantanaṭṭhāne. Hīti saccaṃ. Tatthāti kurundiyaṃ. Yenāti yena bhattena. Etthāti ‘‘yāguṃ gaṇhathā’’tiādivacane. Adhippāyoti aṭṭhakathācariyānaṃ adhippāyo. Etthāti ‘‘yāgumissakaṃ gaṇhathā’’tiādivacane. Duddasanti dukkaraṃ dassanaṃ. Idañcāti ‘‘missakaṃ gaṇhathā’’tivacanañca. Na samānetabbanti samaṃ na ānetabbaṃ, samānaṃ vā na kātabbaṃ. Hīti saccaṃ, yasmā vā. Idaṃ panāti missakaṃ pana. Etthāti missake. Visuṃ katvāti rasakhīrasappīni āveṇiṃ katvā. Tanti rasādiṃ.
கத்³தீ³யதி மத்³தீ³யதீதி கத்³த³மோ. உந்த³தி பஸவதி வட்³ட⁴தீதி உத³கங். உந்த³தி வா க்லேத³னங் கரோதீதி உத³கங், நிலீனே ஸத்தே கு³பதி ரக்க²தீதி கு³ம்போ³, கு³ஹதி ஸங்வரதீதி வா கு³ம்போ³. அனுபரியாயந்தேனாதி அனுக்கமேன பரிவத்தித்வா ஆயந்தேன. தந்தி நாவங் வா ஸேதுங் வா. மஜ்ஜ²ன்ஹிகந்தி அஹஸ்ஸ மஜ்ஜ²ங் மஜ்ஜ²ன்ஹங், அஹஸத்³த³ஸ்ஸ ந்ஹாதே³ஸோ, மஜ்ஜ²ன்ஹங் ஏவ மஜ்ஜ²ன்ஹிகங். பொத்த²கேஸு பன மஜ்ஜ²ந்திகந்தி பாடோ² அத்தி², ஸோ அபாடோ²யேவ. யோ டி²தோ பவாரேதி, தேன டி²தேனேவ பு⁴ஞ்ஜிதப்³ப³ந்தி யோஜனா. ஆனிஸத³ந்தி பீடே² பு²ட்ட²ஆனிஸத³மங்ஸங். அசாலெத்வாதி அசாவெத்வா. அயமேவ வா பாடோ². உபரி ச பஸ்ஸேஸு ச அமோசெத்வாதி வுத்தங் ஹோதி. அதி³ன்னாதா³னே விய டா²னாசாவனங் ந வேதி³தப்³ப³ங். ஸங்ஸரிதுந்தி ஸங்ஸப்³பி³துங். நந்தி பி⁴க்கு²ங்.
Kaddīyati maddīyatīti kaddamo. Undati pasavati vaḍḍhatīti udakaṃ. Undati vā kledanaṃ karotīti udakaṃ, nilīne satte gupati rakkhatīti gumbo, guhati saṃvaratīti vā gumbo. Anupariyāyantenāti anukkamena parivattitvā āyantena. Tanti nāvaṃ vā setuṃ vā. Majjhanhikanti ahassa majjhaṃ majjhanhaṃ, ahasaddassa nhādeso, majjhanhaṃ eva majjhanhikaṃ. Potthakesu pana majjhantikanti pāṭho atthi, so apāṭhoyeva. Yo ṭhito pavāreti, tena ṭhiteneva bhuñjitabbanti yojanā. Ānisadanti pīṭhe phuṭṭhaānisadamaṃsaṃ. Acāletvāti acāvetvā. Ayameva vā pāṭho. Upari ca passesu ca amocetvāti vuttaṃ hoti. Adinnādāne viya ṭhānācāvanaṃ na veditabbaṃ. Saṃsaritunti saṃsabbituṃ. Nanti bhikkhuṃ.
அதிரேகங் ரிசதி க³ச்ச²தீதி அதிரித்தங், ந அதிரித்தங் அனதிரித்தந்தி அத்த²ங் த³ஸ்ஸெந்தோ ஆஹ ‘‘ந அதிரித்த’’ந்தி. ‘‘அதி⁴க’’ந்திஇமினா அதிரித்தஸத்³த³ஸ்ஸ அதிஸுஞ்ஞத்த²ங் நிவத்தேதி. அதி⁴ ஹுத்வா ஏதி பவத்ததீதி அதி⁴கங். தங் பனாதி அனதிரித்தங் பன ஹோதீதி ஸம்ப³ந்தோ⁴. தத்தா²தி ‘‘அகப்பியகத’’ந்திஆதி³வசனே. வித்தா²ரோ ஏவங் வேதி³தப்³போ³தி யோஜனா. தத்தா²தி அதிரித்தங் காதப்³பே³ஸு வத்தூ²ஸு. யங் ப²லங் வா யங் கந்த³மூலாதி³ வா அகதந்தி யோஜனா. அகப்பியபோ⁴ஜனங் வாதி குலதூ³ஸககம்மாதீ³ஹி நிப்³ப³த்தங் அகப்பியபோ⁴ஜனங் வா அத்தீ²தி ஸம்ப³ந்தோ⁴. யோதி வினயத⁴ரோ பி⁴க்கு². தேன கதந்தி யோஜனா. ‘‘பு⁴த்தாவினா பவாரிதேன ஆஸனா வுட்டி²தேன கத’’ந்திவசனதோ பு⁴த்தாவினா அபவாரிதேன ஆஸனா வுட்டி²தேன கத்தப்³ப³ந்தி ஸித்³த⁴ங். தஸ்மா பாதோ அத்³தா⁴னங் க³ச்ச²ந்தேஸு த்³வீஸு ஏகோ பவாரிதோ, தஸ்ஸ இதரோ பிண்டா³ய சரித்வா லத்³த⁴ங் பி⁴க்க²ங் அத்தனா அபு⁴த்வாபி ‘‘அலமேதங் ஸப்³ப³’’ந்தி காதுங் லப⁴தி ஏவ. யந்தி கா²த³னீயபோ⁴ஜனீயங். ‘‘தது³ப⁴யம்பீ’’திஇமினா அதிரித்தஞ்ச அதிரித்தஞ்ச அதிரித்தங், ந அதிரித்தங் அனதிரித்தந்தி அத்த²ங் த³ஸ்ஸேதி.
Atirekaṃ ricati gacchatīti atirittaṃ, na atirittaṃ anatirittanti atthaṃ dassento āha ‘‘na atiritta’’nti. ‘‘Adhika’’ntiiminā atirittasaddassa atisuññatthaṃ nivatteti. Adhi hutvā eti pavattatīti adhikaṃ. Taṃ panāti anatirittaṃ pana hotīti sambandho. Tatthāti ‘‘akappiyakata’’ntiādivacane. Vitthāro evaṃ veditabboti yojanā. Tatthāti atirittaṃ kātabbesu vatthūsu. Yaṃ phalaṃ vā yaṃ kandamūlādi vā akatanti yojanā. Akappiyabhojanaṃ vāti kuladūsakakammādīhi nibbattaṃ akappiyabhojanaṃ vā atthīti sambandho. Yoti vinayadharo bhikkhu. Tena katanti yojanā. ‘‘Bhuttāvinā pavāritena āsanā vuṭṭhitena kata’’ntivacanato bhuttāvinā apavāritena āsanā vuṭṭhitena kattabbanti siddhaṃ. Tasmā pāto addhānaṃ gacchantesu dvīsu eko pavārito, tassa itaro piṇḍāya caritvā laddhaṃ bhikkhaṃ attanā abhutvāpi ‘‘alametaṃ sabba’’nti kātuṃ labhati eva. Yanti khādanīyabhojanīyaṃ. ‘‘Tadubhayampī’’tiiminā atirittañca atirittañca atirittaṃ, na atirittaṃ anatirittanti atthaṃ dasseti.
தஸ்ஸேவாதி அனதிரித்தஸ்ஸேவ. எத்தா²தி அனதிரித்தே, ‘‘கப்பியகத’’ந்தி ஆதீ³ஸு ஸத்தஸு வினயகம்மாகாரேஸு வா. அனந்தரேதி வினயத⁴ரஸ்ஸ அனந்தரே ஆஸனே. பத்ததோ நீஹரித்வாதி ஸம்ப³ந்தோ⁴. தத்தே²வாதி பு⁴ஞ்ஜனட்டா²னேயேவ. தஸ்ஸாதி நிஸின்னஸ்ஸ. தேனாதி ப⁴த்தங் ஆனெந்தேன பி⁴க்கு²னா பு⁴ஞ்ஜிதப்³ப³ந்தி யோஜனா. ‘‘நிஸின்னேன பி⁴க்கு²னா’’தி காரிதகம்மங் ஆனேதப்³ப³ங். கஸ்மா ‘‘ஹத்த²ங் தோ⁴வித்வா’’தி வுத்தந்தி புச்ச²ந்தோ ஆஹ ‘‘கஸ்மா’’தி. ஹீதி காரணங். யஸ்மா அகப்பியங் ஹோதி, தஸ்மா ஹத்த²ங் தோ⁴வித்வாதி மயா வுத்தந்தி அதி⁴ப்பாயோ. தஸ்ஸாதி ப⁴த்தங் ஆனெந்தஸ்ஸ. யேனாதி வினயத⁴ரேன. புன யேனாதி ஏவமேவ. யஞ்சாதி கா²த³னீயபோ⁴ஜனீயஞ்ச. யேன வினயத⁴ரேன பட²மங் அகதங், தேனேவ கத்தப்³ப³ங். யஞ்ச கா²த³னீயபோ⁴ஜனீயங் பட²மங் அகதங், தஞ்ஞேவ கத்தப்³ப³ந்தி வுத்தங் ஹோதி . தத்தா²தி பட²மபா⁴ஜனே. ஹீதி ஸச்சங். பட²மபா⁴ஜனங் ஸுத்³த⁴ங் தோ⁴வித்வா கதம்பி நித்³தோ³ஸமேவ. தேன பி⁴க்கு²னாதி பவாரிதேன பி⁴க்கு²னா.
Tassevāti anatirittasseva. Etthāti anatiritte, ‘‘kappiyakata’’nti ādīsu sattasu vinayakammākāresu vā. Anantareti vinayadharassa anantare āsane. Pattato nīharitvāti sambandho. Tatthevāti bhuñjanaṭṭhāneyeva. Tassāti nisinnassa. Tenāti bhattaṃ ānentena bhikkhunā bhuñjitabbanti yojanā. ‘‘Nisinnena bhikkhunā’’ti kāritakammaṃ ānetabbaṃ. Kasmā ‘‘hatthaṃ dhovitvā’’ti vuttanti pucchanto āha ‘‘kasmā’’ti. Hīti kāraṇaṃ. Yasmā akappiyaṃ hoti, tasmā hatthaṃ dhovitvāti mayā vuttanti adhippāyo. Tassāti bhattaṃ ānentassa. Yenāti vinayadharena. Puna yenāti evameva. Yañcāti khādanīyabhojanīyañca. Yena vinayadharena paṭhamaṃ akataṃ, teneva kattabbaṃ. Yañca khādanīyabhojanīyaṃ paṭhamaṃ akataṃ, taññeva kattabbanti vuttaṃ hoti . Tatthāti paṭhamabhājane. Hīti saccaṃ. Paṭhamabhājanaṃ suddhaṃ dhovitvā katampi niddosameva. Tena bhikkhunāti pavāritena bhikkhunā.
குண்டே³பீதி உக்க²லியம்பி. ஸா ஹி குட³தி ஓத³னாதி³ங் தா³ஹங் கரோதீதி குண்டோ³தி வுச்சதி. தந்தி அதிரித்தகதங் கா²த³னீயபோ⁴ஜனீயங். யேன பனாதி வினயத⁴ரேன பன. பி⁴க்கு²ங் நிஸீதா³பெந்தீதி ஸம்ப³ந்தோ⁴. மங்க³லனிமந்தனேதி மங்க³லத்தா²ய நிமந்தனட்டா²னே. தத்தா²தி மங்க³லனிமந்தனே. கரொந்தேனாதி கரொந்தேன வினயத⁴ரேன.
Kuṇḍepīti ukkhaliyampi. Sā hi kuḍati odanādiṃ dāhaṃ karotīti kuṇḍoti vuccati. Tanti atirittakataṃ khādanīyabhojanīyaṃ. Yena panāti vinayadharena pana. Bhikkhuṃ nisīdāpentīti sambandho. Maṅgalanimantaneti maṅgalatthāya nimantanaṭṭhāne. Tatthāti maṅgalanimantane. Karontenāti karontena vinayadharena.
கி³லானேன பு⁴ஞ்ஜிதாவஸேஸமேவ ந கேவலங் கி³லானாதிரித்தங் நாம, கி³லானங் பன உத்³தி³ஸ்ஸ ஆப⁴தங் கி³லானாதிரித்தமேவ நாமாதி த³ஸ்ஸெந்தோ ஆஹ ‘‘ந கேவல’’ந்திஆதி³. யங்கிஞ்சி கி³லானந்தி உபஸம்பன்னங் வா அனுபஸம்பன்னங் வா யங்கிஞ்சி கி³லானங். யங் து³க்கடங் வுத்தங், தங் அஸங்ஸட்ட²வஸேன வுத்தந்தி யோஜனா. அனாஹாரத்தா²யாதி பிபாஸச்சே²த³னஆபா³த⁴வூபஸமத்தா²ய.
Gilānena bhuñjitāvasesameva na kevalaṃ gilānātirittaṃ nāma, gilānaṃ pana uddissa ābhataṃ gilānātirittameva nāmāti dassento āha ‘‘na kevala’’ntiādi. Yaṃkiñci gilānanti upasampannaṃ vā anupasampannaṃ vā yaṃkiñci gilānaṃ. Yaṃ dukkaṭaṃ vuttaṃ, taṃ asaṃsaṭṭhavasena vuttanti yojanā. Anāhāratthāyāti pipāsacchedanaābādhavūpasamatthāya.
241. ஸதி பச்சயேதி எத்த² பச்சயஸ்ஸ ஸரூபங் த³ஸ்ஸேதுங் ‘‘பிபாஸாய ஸதீ’’தி ச ‘‘ஆபா³தே⁴ ஸதீ’’தி ச வுத்தங். தேன தேனாதி ஸத்தாஹகாலிகேன ச யாவஜீவிகேன ச. தஸ்ஸாதி ஆபா³த⁴ஸ்ஸ. இத³ங் பத³ங் ‘‘உபஸமனத்த²’’ந்தி எத்த² ஸமுதா⁴துயா ஸம்ப³ந்தே⁴ ஸம்ப³ந்தோ⁴, யுபச்சயேன ஸம்ப³ந்தே⁴ கம்மந்தி த³ட்ட²ப்³ப³ந்தி. பஞ்சமங்.
241.Sati paccayeti ettha paccayassa sarūpaṃ dassetuṃ ‘‘pipāsāya satī’’ti ca ‘‘ābādhe satī’’ti ca vuttaṃ. Tena tenāti sattāhakālikena ca yāvajīvikena ca. Tassāti ābādhassa. Idaṃ padaṃ ‘‘upasamanattha’’nti ettha samudhātuyā sambandhe sambandho, yupaccayena sambandhe kammanti daṭṭhabbanti. Pañcamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 5. பட²மபவாரணஸிக்கா²பத³வண்ணனா • 5. Paṭhamapavāraṇasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. பட²மபவாரணாஸிக்கா²பத³வண்ணனா • 5. Paṭhamapavāraṇāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 5. பட²மபவாரணஸிக்கா²பத³வண்ணனா • 5. Paṭhamapavāraṇasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 5. பட²மபவாரணாஸிக்கா²பத³வண்ணனா • 5. Paṭhamapavāraṇāsikkhāpadavaṇṇanā
