| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
5. பட²மபவாரணஸிக்கா²பத³வண்ணனா
5. Paṭhamapavāraṇasikkhāpadavaṇṇanā
236. யாவத³த்த²பவாரணாய பவாரிதா கிஞ்சாபி ‘‘பவாரிதா’’இச்சேவ அதி⁴ப்பேதா அட்டு²ப்பத்தியாவ, அத² கோ² பச்சி²மாவ இதா⁴தி⁴ப்பேதா.
236.Yāvadatthapavāraṇāyapavāritā kiñcāpi ‘‘pavāritā’’icceva adhippetā aṭṭhuppattiyāva, atha kho pacchimāva idhādhippetā.
237. ‘‘அலமேதங் ஸப்³ப³’’ந்தி வுத்தத்தா அதிரித்தங் நாம ஹோதி. பி⁴க்கு²ஸ்ஸ இத³ம்பி தே அதி⁴கங், இதோ அஞ்ஞங் ந லச்ச²தீதி கிர அத்தோ².
237.‘‘Alametaṃ sabba’’nti vuttattā atirittaṃ nāma hoti. Bhikkhussa idampi te adhikaṃ, ito aññaṃ na lacchatīti kira attho.
238-9. ‘‘அஸனங் பஞ்ஞாயதீ’’தி ஏதேனேவ ‘‘பு⁴த்தாவீ’’தி ஏதஸ்ஸ ஸித்³த⁴த்தா விஸுங் அத்த²ஸித்³தி⁴ நத்தி². யதி³ அத்தி², அங்கா³னங் ச²க்கத்தத³ஸ்ஸனந்தி. வுத்தம்பி சேதந்திஆதி³ பவாரணங்கா³னங் பஞ்சகத்தத³ஸ்ஸனங். வரகோதி யோ கோசி வரகோ. ‘‘பவாரணங் பன ஜனேதியேவாதி விஸுங் ஸித்த²ங் வோத³கங் கரொந்தி, பவாரணங் ந ஜனேதி. யாகு³ங் வா பிவந்தோ பட²மங் உத³கங் பிவதி, வட்டதி. அவஸிட்ட²ங் ஹெட்டா²ஸித்த²ங் பவாரணங் ந ஜனேதீ’’தி லிகி²தங். உபதிஸ்ஸத்தே²ரோ ‘‘ஜனேதியேவா’’தி வத³தி, தங் ந இச்ச²ந்தி ஆசரியா. ப⁴ஜ்ஜிதபிட்ட²ந்தி தண்டு³லசுண்ணமேவ. ப⁴ஜ்ஜிதஸத்துயோ பிண்டெ³த்வா கதமோத³கோ ஸத்துமோத³கோ.
238-9. ‘‘Asanaṃ paññāyatī’’ti eteneva ‘‘bhuttāvī’’ti etassa siddhattā visuṃ atthasiddhi natthi. Yadi atthi, aṅgānaṃ chakkattadassananti. Vuttampi cetantiādi pavāraṇaṅgānaṃ pañcakattadassanaṃ. Varakoti yo koci varako. ‘‘Pavāraṇaṃ pana janetiyevāti visuṃ sitthaṃ vodakaṃ karonti, pavāraṇaṃ na janeti. Yāguṃ vā pivanto paṭhamaṃ udakaṃ pivati, vaṭṭati. Avasiṭṭhaṃ heṭṭhāsitthaṃ pavāraṇaṃ na janetī’’ti likhitaṃ. Upatissatthero ‘‘janetiyevā’’ti vadati, taṃ na icchanti ācariyā. Bhajjitapiṭṭhanti taṇḍulacuṇṇameva. Bhajjitasattuyo piṇḍetvā katamodako sattumodako.
‘‘யாகு³ஸித்த²மத்தானேவ த்³வே…பே॰… படிக்கி²பதி, ந பவாரேதீ’’தி வுத்தத்தா பரசங்கமச்சா²த³யோ பக்கி²பித்வா பக்கயாகு³ங் பிவந்தோ ஸசே அஞ்ஞங் தாதி³ஸங்யேவ படிக்கி²பதி, பவாரணா ந ஹோதீதி கிர த⁴ம்மஸிரித்தே²ரோ. ஸசே அஞ்ஞங் படிக்கி²பதி, ந பவாரேதி. கஸ்மா? அஸனஸங்கா²தஸ்ஸ விப்பகதபோ⁴ஜனஸ்ஸாபா⁴வதோ. போ⁴ஜனஸாலாயங் பு⁴ஞ்ஜந்தோ சே, அத்தனோ அபாபுணனகொட்டா²ஸங் அபி⁴ஹடங் படிக்கி²பதி, ந பவாரேதி. காமங் படிக்கி²பதி, பத்தே பன ஆராமிகோ ஆகிரதி, ததோ பு⁴ஞ்ஜிதுங் ந வட்டதி. இத³ஞ்ஹி பு³த்³த⁴ப்படிகுட்ட²அனேஸனாய உப்பன்னேயேவ ஸங்க³ஹங் க³ச்ச²தி. யதா² ஹி ஸங்க⁴தோ உத்³த⁴டபிண்ட³ங் து³ஸ்ஸீலோ தே³தி, தங் படிக்கி²பதி, ந பவாரேதி, ஏவங்ஸம்பத³மித³ங். ‘‘விஸபா⁴கோ³ லஜ்ஜீ சே தே³தி, தங் தேன ஸம்போ⁴க³ங் அகத்துகாமதாய படிக்கி²பதி, பவாரேதீதி அபரே’’தி வுத்தங். பரிவேஸனாயாதி ப⁴த்தக்³கே³. ‘‘மங்ஸேன ரஸங், மங்ஸஞ்ச ரஸஞ்ச மங்ஸரஸந்தி ஆபஜ்ஜனதோ ‘மங்ஸரஸ’ந்தி வுத்தே படிக்கே²பதோ ஹோதி, மங்ஸஸ்ஸ ரஸங் மங்ஸரஸந்தி விக்³க³ஹோ நாதி⁴ப்பேதோ’’தி வுத்தங். மங்ஸகரம்ப³கோ நாம…பே॰… வட்டதீதி ஸுத்³த⁴யாகு³ ஏவ ஹோதி. அப்பவாரணமிஸ்ஸககரம்ப³கோயேவ ஹோதி, தஸ்மா ந பவாரேதி, தேன வுத்தங் பரதோ ‘‘இத³ஞ்ச கரம்ப³கேன ந ஸமானேதப்³ப³’’ந்திஆதி³, தஸ்மா ‘‘தங் அபி⁴ஹரித்வா கஞ்ஜியங் க³ண்ஹதா²’தி வத³ந்தங் படிக்கி²பதி, பவாரணா ந ஹோதீ’’தி ச ‘‘மிஸ்ஸகயாகு³ங் க³ண்ஹதா²’தி அவுத்தத்தா ‘ஸம்மிஸ்ஸிதங் விஸுங் கத்வா தே³தீ’தி வுத்தத்தா’’தி ச வுத்தங், யஸ்மா யாகு³மிஸ்ஸகந்தி எத்த² பத³த்³வயே பவாரணாரஹஸ்ஸ நாமக்³க³ஹணங் நத்தி², தஸ்மா தத்ர சே யாகு³ ப³ஹுதரா வா ஹோதி ஸமஸமா வா, ந பவாரேதி. கஸ்மா? தத்த² அபி⁴ஹாரகபடிக்கே²பகானங் யாகு³ஸஞ்ஞத்தா. யாகு³ சே மந்தா³, ப⁴த்தங் ப³ஹுதரங், பவாரேதி. கஸ்மா? தேஸங் உபி⁴ன்னம்பி தத்த² பி⁴ன்னஸஞ்ஞத்தாதி தக்கோ ஆசரியஸ்ஸ. ப⁴த்தமிஸ்ஸகே பவாரணாரஹஸ்ஸ நாமஸ்ஸ ஸப்³பா⁴வதோ ஸப்³ப³தா³ பவாரேதி ஏவ. மிஸ்ஸகே பன வுத்தனயேன காரணங் வத்தப்³ப³ங். விஸுங் கத்வா தே³தீதி யதா² ப⁴த்தஸிட்ட²ங் ந பததி, ததா² கா³ள்ஹங் ஹத்தே²ன பீளெத்வா பரிஸ்ஸாவெத்வா தே³தி.
‘‘Yāgusitthamattāneva dve…pe… paṭikkhipati, na pavāretī’’ti vuttattā paracaṅkamacchādayo pakkhipitvā pakkayāguṃ pivanto sace aññaṃ tādisaṃyeva paṭikkhipati, pavāraṇā na hotīti kira dhammasiritthero. Sace aññaṃ paṭikkhipati, na pavāreti. Kasmā? Asanasaṅkhātassa vippakatabhojanassābhāvato. Bhojanasālāyaṃ bhuñjanto ce, attano apāpuṇanakoṭṭhāsaṃ abhihaṭaṃ paṭikkhipati, na pavāreti. Kāmaṃ paṭikkhipati, patte pana ārāmiko ākirati, tato bhuñjituṃ na vaṭṭati. Idañhi buddhappaṭikuṭṭhaanesanāya uppanneyeva saṅgahaṃ gacchati. Yathā hi saṅghato uddhaṭapiṇḍaṃ dussīlo deti, taṃ paṭikkhipati, na pavāreti, evaṃsampadamidaṃ. ‘‘Visabhāgo lajjī ce deti, taṃ tena sambhogaṃ akattukāmatāya paṭikkhipati, pavāretīti apare’’ti vuttaṃ. Parivesanāyāti bhattagge. ‘‘Maṃsena rasaṃ, maṃsañca rasañca maṃsarasanti āpajjanato ‘maṃsarasa’nti vutte paṭikkhepato hoti, maṃsassa rasaṃ maṃsarasanti viggaho nādhippeto’’ti vuttaṃ. Maṃsakarambako nāma…pe… vaṭṭatīti suddhayāgu eva hoti. Appavāraṇamissakakarambakoyeva hoti, tasmā na pavāreti, tena vuttaṃ parato ‘‘idañca karambakena na samānetabba’’ntiādi, tasmā ‘‘taṃ abhiharitvā kañjiyaṃ gaṇhathā’ti vadantaṃ paṭikkhipati, pavāraṇā na hotī’’ti ca ‘‘missakayāguṃ gaṇhathā’ti avuttattā ‘sammissitaṃ visuṃ katvā detī’ti vuttattā’’ti ca vuttaṃ, yasmā yāgumissakanti ettha padadvaye pavāraṇārahassa nāmaggahaṇaṃ natthi, tasmā tatra ce yāgu bahutarā vā hoti samasamā vā, na pavāreti. Kasmā? Tattha abhihārakapaṭikkhepakānaṃ yāgusaññattā. Yāgu ce mandā, bhattaṃ bahutaraṃ, pavāreti. Kasmā? Tesaṃ ubhinnampi tattha bhinnasaññattāti takko ācariyassa. Bhattamissake pavāraṇārahassa nāmassa sabbhāvato sabbadā pavāreti eva. Missake pana vuttanayena kāraṇaṃ vattabbaṃ. Visuṃ katvā detīti yathā bhattasiṭṭhaṃ na patati, tathā gāḷhaṃ hatthena pīḷetvā parissāvetvā deti.
அகப்பியகதந்தி எத்த² ‘‘கப்பியங் அகாராபிதேஹி கத³லிப்ப²லாதீ³ஹி ஸத்³தி⁴ங் அதிரித்தங் கப்பியங் காராபெத்வாபி தங் கத³லிப்ப²லாதி³ங் ட²பெத்வா அவஸேஸங் பு⁴ஞ்ஜிதுங் வட்டதி. அமிஸ்ஸகரஸத்தா புன தானி கப்பியங் காராபெத்வா அஞ்ஞஸ்மிங் பா⁴ஜனே ட²பெத்வா அதிரித்தங் காரெத்வா பு⁴ஞ்ஜிதுங் வட்டதி. கஸ்மா? புப்³பே³ தேஸு வினயகம்மஸ்ஸ அனாருள்ஹத்தா’’தி வத³ந்தி. ‘‘பு⁴த்தாவினா ச பவாரிதேன ஆஸனா வுட்டி²தேன கத’’ந்தி வசனதோ பு⁴த்தாவினா அப்பவாரிதேன ஆஸனா வுட்டி²தேன கத்தப்³ப³ந்தி ஸித்³த⁴ங், தஸ்மா ‘‘பாதோவ அத்³தா⁴னங் க³ச்ச²ந்தேஸு த்³வீஸு ஏகோ பவாரிதோ அவுட்டி²தோ தத்த² நிஸீத³தி, ஸோ இதரேன பிண்டா³ய சரித்வா லத்³த⁴ங் பி⁴க்க²ங் அத்தனா அபு⁴த்வாபி ‘அலமேதங் ஸப்³ப³’ந்தி காதுங் லப⁴தி ஏவா’’தி வுத்தங், தங் ஸுக்கபக்கே² ‘‘பு⁴த்தாவினா கதங் ஹோதீ’’தி இமினாவ ஸித்³த⁴ங், தஸ்மிங் பக்கே² அத்தனோ ஸத்தங்கா³னி ந பூரெந்தி, கண்ஹபக்கே² படிபா⁴கே³ன ஸத்த வுத்தானீதி வேதி³தப்³ப³ங். பு⁴த்தாவினா அப்பவாரிதேன ஆஸனா வுட்டி²தேன, அவுட்டி²தேன வா கதங் ஹோதி, வட்டதி. ‘‘பவாரிதேன ஆஸனா அவுட்டி²தேனேவா’’தி இமங் பன அத்த²விகப்பங் தீ³பேதுங் ‘‘ஸத்தங்கா³னி வுத்தானீ’’திபி வத்துங் வட்டதி. ஸோ புன காதுங் ந லப⁴தி பட²மங் கதஸ்ஸ புன தேனேவ கத்தப்³ப³ப்பஸங்க³தோ. யஞ்ச அகதங், தங் கத்தப்³ப³ந்தி ஹி வுத்தங். அத² ஸோவ பட²மோ புன கத்துகாமோ ஹோதி, அஞ்ஞஸ்மிங் பா⁴ஜனே புப்³பே³ அகதங் காதுங் லப⁴தி. து³தியோ பட²மபா⁴ஜனேபி காதுங் லப⁴தி. ‘‘யேன அகதங், தேன காதப்³ப³’’ந்தி ஹி வுத்தங். இமமேவத்த²ங் ஸந்தா⁴ய ‘‘யேன யங் பட²மங் கப்பியங் கதங், தமேவ ஸோ புன காதுங் ந லப⁴தி, அஞ்ஞேன காதப்³ப³’’ந்தி லிகி²தங். தத்த² தந்தி தங் பட²மங் கதந்தி அத்தோ². பேஸெத்வா காரேதப்³ப³ந்தி எத்த² அனுபஸம்பன்னோ சே க³தோ, தத்ரட்டே²ன ஏகேன பி⁴க்கு²னா படிக்³கா³ஹெத்வா அபரேன காரேதப்³ப³ந்தி தத்த² ஏகோவ ஏவமேவ காதுங் ந லப⁴தீதி. ‘‘யங் கிஞ்சி கி³லானங் உத்³தி³ஸ்ஸா’திஆதி³வசனதோ விஹாராதீ³ஸு கி³லானஸ்ஸ பாபுணனகொட்டா²ஸம்பி கி³லானாதிரித்தங் நாம, தஸ்மா வட்டதீ’’தி வத³ந்தி. ஆஹாரத்தா²யாதி விகாலே ஏவாதி ஏகே.
Akappiyakatanti ettha ‘‘kappiyaṃ akārāpitehi kadalipphalādīhi saddhiṃ atirittaṃ kappiyaṃ kārāpetvāpi taṃ kadalipphalādiṃ ṭhapetvā avasesaṃ bhuñjituṃ vaṭṭati. Amissakarasattā puna tāni kappiyaṃ kārāpetvā aññasmiṃ bhājane ṭhapetvā atirittaṃ kāretvā bhuñjituṃ vaṭṭati. Kasmā? Pubbe tesu vinayakammassa anāruḷhattā’’ti vadanti. ‘‘Bhuttāvinā ca pavāritena āsanā vuṭṭhitena kata’’nti vacanato bhuttāvinā appavāritena āsanā vuṭṭhitena kattabbanti siddhaṃ, tasmā ‘‘pātova addhānaṃ gacchantesu dvīsu eko pavārito avuṭṭhito tattha nisīdati, so itarena piṇḍāya caritvā laddhaṃ bhikkhaṃ attanā abhutvāpi ‘alametaṃ sabba’nti kātuṃ labhati evā’’ti vuttaṃ, taṃ sukkapakkhe ‘‘bhuttāvinā kataṃ hotī’’ti imināva siddhaṃ, tasmiṃ pakkhe attano sattaṅgāni na pūrenti, kaṇhapakkhe paṭibhāgena satta vuttānīti veditabbaṃ. Bhuttāvinā appavāritena āsanā vuṭṭhitena, avuṭṭhitena vā kataṃ hoti, vaṭṭati. ‘‘Pavāritena āsanā avuṭṭhitenevā’’ti imaṃ pana atthavikappaṃ dīpetuṃ ‘‘sattaṅgāni vuttānī’’tipi vattuṃ vaṭṭati. So puna kātuṃ na labhati paṭhamaṃ katassa puna teneva kattabbappasaṅgato. Yañca akataṃ, taṃ kattabbanti hi vuttaṃ. Atha sova paṭhamo puna kattukāmo hoti, aññasmiṃ bhājane pubbe akataṃ kātuṃ labhati. Dutiyo paṭhamabhājanepi kātuṃ labhati. ‘‘Yena akataṃ, tena kātabba’’nti hi vuttaṃ. Imamevatthaṃ sandhāya ‘‘yena yaṃ paṭhamaṃ kappiyaṃ kataṃ, tameva so puna kātuṃ na labhati, aññena kātabba’’nti likhitaṃ. Tattha tanti taṃ paṭhamaṃ katanti attho. Pesetvā kāretabbanti ettha anupasampanno ce gato, tatraṭṭhena ekena bhikkhunā paṭiggāhetvā aparena kāretabbanti tattha ekova evameva kātuṃ na labhatīti. ‘‘Yaṃ kiñci gilānaṃ uddissā’tiādivacanato vihārādīsu gilānassa pāpuṇanakoṭṭhāsampi gilānātirittaṃ nāma, tasmā vaṭṭatī’’ti vadanti. Āhāratthāyāti vikāle evāti eke.
241. காயகம்மங் அஜ்ஜோ²ஹரணதோ. வசீகம்மங் வாசாய ‘‘அதிரித்தங் கரோத² ப⁴ந்தே’’தி அகாராபனேனாதி வேதி³தப்³ப³ங்.
241. Kāyakammaṃ ajjhoharaṇato. Vacīkammaṃ vācāya ‘‘atirittaṃ karotha bhante’’ti akārāpanenāti veditabbaṃ.
பட²மபவாரணஸிக்கா²பத³வண்ணனா நிட்டி²தா.
Paṭhamapavāraṇasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 5. பட²மபவாரணஸிக்கா²பத³வண்ணனா • 5. Paṭhamapavāraṇasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. பட²மபவாரணாஸிக்கா²பத³வண்ணனா • 5. Paṭhamapavāraṇāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 5. பட²மபவாரணாஸிக்கா²பத³வண்ணனா • 5. Paṭhamapavāraṇāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. பட²மபவாரணஸிக்கா²பத³ங் • 5. Paṭhamapavāraṇasikkhāpadaṃ
