| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
৫. পঠমপৰারণাসিক্খাপদৰণ্ণনা
5. Paṭhamapavāraṇāsikkhāpadavaṇṇanā
২৩৭. পঞ্চমে ‘‘তি-কারং অৰত্ৰা’’তি ইমিনা কাতব্বসদ্দসামত্থিযা লদ্ধং ইতি-পদং কতকালে ন ৰত্তব্বন্তি দস্সেতি। ইধ পন অজানন্তেহি ইতি-সদ্দে পযুত্তেপি অতিরিত্তং কতমেৰ হোতীতি দট্ঠব্বং।
237. Pañcame ‘‘ti-kāraṃ avatvā’’ti iminā kātabbasaddasāmatthiyā laddhaṃ iti-padaṃ katakāle na vattabbanti dasseti. Idha pana ajānantehi iti-sadde payuttepi atirittaṃ katameva hotīti daṭṭhabbaṃ.
২৩৮-৯. ‘‘পৰারিতো’’তি ইদঞ্চ কত্তুঅত্থে নিপ্ফন্নন্তি দস্সেতুং ‘‘কতপৰারণো’’তিআদি ৰুত্তং। ভুত্তাৰী-পদস্স নিরত্থকভাৰমেৰ সাধেতুং ‘‘ৰুত্তম্পি চেত’’ন্তিআদি ৰুত্তং। তাহীতি পুথুকাহি। সত্তুমোদকোতি সত্তুং তেমেত্ৰা কতো অপক্কো। সত্তুং পন পিসিত্ৰা পিট্ঠং কত্ৰা তেমেত্ৰা পূৰং কত্ৰা পচন্তি, তং ন পৰারেতি। ‘‘পটিক্খিপিতব্বট্ঠানে ঠিতমেৰ পটিক্খিপতি নামা’’তি ৰুত্তত্তা যং যং অলজ্জিসন্তকং ৰা অত্তনো অপাপুণকসঙ্ঘিকাদিং ৰা পটিক্খেপতো পৰারণা ন হোতীতি দট্ঠব্বং।
238-9. ‘‘Pavārito’’ti idañca kattuatthe nipphannanti dassetuṃ ‘‘katapavāraṇo’’tiādi vuttaṃ. Bhuttāvī-padassa niratthakabhāvameva sādhetuṃ ‘‘vuttampi ceta’’ntiādi vuttaṃ. Tāhīti puthukāhi. Sattumodakoti sattuṃ temetvā kato apakko. Sattuṃ pana pisitvā piṭṭhaṃ katvā temetvā pūvaṃ katvā pacanti, taṃ na pavāreti. ‘‘Paṭikkhipitabbaṭṭhāne ṭhitameva paṭikkhipati nāmā’’ti vuttattā yaṃ yaṃ alajjisantakaṃ vā attano apāpuṇakasaṅghikādiṃ vā paṭikkhepato pavāraṇā na hotīti daṭṭhabbaṃ.
আসন্নতরং অঙ্গন্তি হত্থপাসতো বহি ঠত্ৰা ওনমিত্ৰা দেন্তস্স সীসং আসন্নতরং হোতি, তস্স ওরিমন্তেন পরিচ্ছিন্দিতব্বং।
Āsannataraṃ aṅganti hatthapāsato bahi ṭhatvā onamitvā dentassa sīsaṃ āsannataraṃ hoti, tassa orimantena paricchinditabbaṃ.
অপনামেত্ৰাতি অভিমুখং হরিত্ৰা। ‘‘ইমং ভত্তং গণ্হা’’তি ৰদতীতি কিঞ্চি অনামেত্ৰা ৰদতি। কেৰলং ৰাচাভিহারস্স অনধিপ্পেতত্তা গণ্হথাতি গহেতুং আরদ্ধং কটচ্ছুনা অনুক্খিত্তম্পি পুব্বেপি এৰং অভিহটত্তা পৰারণা হোতীতি ‘‘অভিহটাৰ হোতী’’তি ৰুত্তং। উদ্ধটমত্তেতি ভাজনতো ৰিযোজিতমত্তে। দ্ৰিন্নং সমভারেপীতি পরিৰেসকস্স চ অঞ্ঞস্স চ ভত্তপচ্ছিভাজনৰহনে সমকেপীতি অত্থো।
Apanāmetvāti abhimukhaṃ haritvā. ‘‘Imaṃ bhattaṃ gaṇhā’’ti vadatīti kiñci anāmetvā vadati. Kevalaṃ vācābhihārassa anadhippetattā gaṇhathāti gahetuṃ āraddhaṃ kaṭacchunā anukkhittampi pubbepi evaṃ abhihaṭattā pavāraṇā hotīti ‘‘abhihaṭāva hotī’’ti vuttaṃ. Uddhaṭamatteti bhājanato viyojitamatte. Dvinnaṃ samabhārepīti parivesakassa ca aññassa ca bhattapacchibhājanavahane samakepīti attho.
রসং গণ্হথাতি এত্থ কেৰলং মংসরসস্স অপৰারণাজনকস্স নামেন ৰুত্তত্তা পটিক্খিপতো পৰারণা ন হোতি। মচ্ছরসন্তিআদীসু মচ্ছো চ রসঞ্চাতি অত্থস্স সম্ভৰতো ৰত্থুনোপি তাদিসত্তা পৰারণা হোতি, ‘‘ইদং গণ্হথা’’তিপি অৰত্ৰা তুণ্হীভাৰেন অভিহটং পটিক্খিপতোপি হোতি এৰ। করম্বকোতি মিস্সকাধিৰচনমেতং। যঞ্হি বহূহি মিস্সেত্ৰা করোন্তি, সো ‘‘করম্বকো’’তি ৰুচ্চতি।
Rasaṃ gaṇhathāti ettha kevalaṃ maṃsarasassa apavāraṇājanakassa nāmena vuttattā paṭikkhipato pavāraṇā na hoti. Maccharasantiādīsu maccho ca rasañcāti atthassa sambhavato vatthunopi tādisattā pavāraṇā hoti, ‘‘idaṃ gaṇhathā’’tipi avatvā tuṇhībhāvena abhihaṭaṃ paṭikkhipatopi hoti eva. Karambakoti missakādhivacanametaṃ. Yañhi bahūhi missetvā karonti, so ‘‘karambako’’ti vuccati.
‘‘উদ্দিস্স কত’’ন্তি মঞ্ঞমানোতি এত্থ ৰত্থুনো কপ্পিযত্তা ‘‘পৰারিতোৰ হোতী’’তি ৰুত্তং। তঞ্চে উদ্দিস্স কতমেৰ হোতি, পটিক্খেপো নত্থি। অযমেত্থ অধিপ্পাযোতি ‘‘যেনাপুচ্ছিতো’’তিআদিনা ৰুত্তমেৰত্থং সন্ধায ৰদতি। কারণং পনেত্থ দুদ্দসন্তি ভত্তস্স বহুতরভাৰেন পৰারণাসম্ভৰকারণং দুদ্দসং, অঞ্ঞথা করম্বকেপি মচ্ছাদিবহুভাৰে পৰারণা ভৰেয্যাতি অধিপ্পাযো। যথা চেত্থ কারণং দুদ্দসং, এৰং পরতো ‘‘মিস্সকং গণ্হথা’’তি এত্থাপি কারণং দুদ্দসমেৰাতি দট্ঠব্বং। যঞ্চ ‘‘ইদং পন ভত্তমিস্সকমেৰা’’তিআদি কারণং ৰুত্তং, তম্পি ‘‘অপ্পতরং ন পৰারেতী’’তি ৰচনেন ন সমেতি। ৰিসুং কত্ৰা দেতীতি ‘‘রসং গণ্হথা’’তিআদিনা ৰাচায ৰিসুং কত্ৰা দেতীতি অত্থো গহেতব্বো। ন পন কাযেন রসাদিং ৰিযোজেত্ৰাতি। তথা অৰিযোজিতেপি পটিক্খিপতো পৰারণায অসম্ভৰতো অপ্পৰারণাপহোণকস্স নামেন ৰুত্তত্তা ভত্তমিস্সকযাগুং আহরিত্ৰা ‘‘যাগুং গণ্হথা’’তি ৰুত্তট্ঠানাদীসু ৰিয, অঞ্ঞথা ৰা এত্থ যথা পুব্বাপরং ন ৰিরুজ্ঝতি, তথা অধিপ্পাযো গহেতব্বো।
‘‘Uddissa kata’’nti maññamānoti ettha vatthuno kappiyattā ‘‘pavāritova hotī’’ti vuttaṃ. Tañce uddissa katameva hoti, paṭikkhepo natthi. Ayamettha adhippāyoti ‘‘yenāpucchito’’tiādinā vuttamevatthaṃ sandhāya vadati. Kāraṇaṃ panettha duddasanti bhattassa bahutarabhāvena pavāraṇāsambhavakāraṇaṃ duddasaṃ, aññathā karambakepi macchādibahubhāve pavāraṇā bhaveyyāti adhippāyo. Yathā cettha kāraṇaṃ duddasaṃ, evaṃ parato ‘‘missakaṃ gaṇhathā’’ti etthāpi kāraṇaṃ duddasamevāti daṭṭhabbaṃ. Yañca ‘‘idaṃ pana bhattamissakamevā’’tiādi kāraṇaṃ vuttaṃ, tampi ‘‘appataraṃ na pavāretī’’ti vacanena na sameti. Visuṃ katvā detīti ‘‘rasaṃ gaṇhathā’’tiādinā vācāya visuṃ katvā detīti attho gahetabbo. Na pana kāyena rasādiṃ viyojetvāti. Tathā aviyojitepi paṭikkhipato pavāraṇāya asambhavato appavāraṇāpahoṇakassa nāmena vuttattā bhattamissakayāguṃ āharitvā ‘‘yāguṃ gaṇhathā’’ti vuttaṭṭhānādīsu viya, aññathā vā ettha yathā pubbāparaṃ na virujjhati, tathā adhippāyo gahetabbo.
নাৰা ৰা সেতু ৰাতিআদিম্হি নাৰাদিঅভিরুহনাদিক্খণে কিঞ্চি ঠত্ৰাপি অভিরুহনাদিকাতব্বত্তেপি গমনতপ্পরতায ঠানং নাম ন হোতি, জনসম্মদ্দেন পন অনোকাসাদিভাৰেন কাতুং ন ৰট্টতি। অচালেত্ৰাতি ৰুত্তট্ঠানতো অঞ্ঞস্মিম্পি পদেসে ৰা উদ্ধং ৰা অপেসেত্ৰা তস্মিং এৰ পন ঠানে পরিৰত্তেতুং লভতি। তেনাহ ‘‘যেন পস্সেনা’’তিআদি।
Nāvā vā setu vātiādimhi nāvādiabhiruhanādikkhaṇe kiñci ṭhatvāpi abhiruhanādikātabbattepi gamanatapparatāya ṭhānaṃ nāma na hoti, janasammaddena pana anokāsādibhāvena kātuṃ na vaṭṭati. Acāletvāti vuttaṭṭhānato aññasmimpi padese vā uddhaṃ vā apesetvā tasmiṃ eva pana ṭhāne parivattetuṃ labhati. Tenāha ‘‘yena passenā’’tiādi.
অকপ্পিযভোজনং ৰাতি কুলদূসনাদিনা উপ্পন্নং, তং ‘‘অকপ্পিয’’ন্তি ইমিনা তেন মিস্সং ওদনাদি অতিরিত্তং হোতি এৰাতি দস্সেতি। তস্মা যং তত্থ অকপ্পকতং কন্দফলাদি, তং অপনেত্ৰা সেসং ভুঞ্জিতব্বমেৰ।
Akappiyabhojanaṃ vāti kuladūsanādinā uppannaṃ, taṃ ‘‘akappiya’’nti iminā tena missaṃ odanādi atirittaṃ hoti evāti dasseti. Tasmā yaṃ tattha akappakataṃ kandaphalādi, taṃ apanetvā sesaṃ bhuñjitabbameva.
সো পুন কাতুং ন লভতীতি তস্মিঞ্ঞেৰ ভাজনে করিযমানং পঠমকতেন সদ্ধিং কতং হোতীতি পুন সো এৰ কাতুং ন লভতি, অঞ্ঞো লভতি। অঞ্ঞেন হি কততো অঞ্ঞো পুন কাতুং লভতি। অঞ্ঞস্মিং পন ভাজনে তেন ৰা অঞ্ঞেন ৰা কাতুং ৰট্টতি। তেনাহ ‘‘যেন অকতং, তেন কাতব্বং, যঞ্চ অকতং, তং কাতব্ব’’ন্তি। এৰং কতন্তি অঞ্ঞস্মিং ভাজনে কতং। সচে পন আমিসসংসট্ঠানীতি এত্থ মুখাদীসু লগ্গম্পি আমিসং সোধেত্ৰাৰ অতিরিত্তং ভুঞ্জিতব্বন্তি ৰেদিতব্বং।
So puna kātuṃ na labhatīti tasmiññeva bhājane kariyamānaṃ paṭhamakatena saddhiṃ kataṃ hotīti puna so eva kātuṃ na labhati, añño labhati. Aññena hi katato añño puna kātuṃ labhati. Aññasmiṃ pana bhājane tena vā aññena vā kātuṃ vaṭṭati. Tenāha ‘‘yena akataṃ, tena kātabbaṃ, yañca akataṃ, taṃ kātabba’’nti. Evaṃ katanti aññasmiṃ bhājane kataṃ. Sace pana āmisasaṃsaṭṭhānīti ettha mukhādīsu laggampi āmisaṃ sodhetvāva atirittaṃ bhuñjitabbanti veditabbaṃ.
২৪১. ৰাচায আণাপেত্ৰা অতিরিত্তং অকারাপনতো অকিরিযসমুট্ঠানন্তি দট্ঠব্বং। পৰারিতভাৰো, আমিসস্স অনতিরিত্ততা, কালে অজ্ঝোহরণন্তি ইমানেত্থ তীণি অঙ্গানি।
241. Vācāya āṇāpetvā atirittaṃ akārāpanato akiriyasamuṭṭhānanti daṭṭhabbaṃ. Pavāritabhāvo, āmisassa anatirittatā, kāle ajjhoharaṇanti imānettha tīṇi aṅgāni.
পঠমপৰারণাসিক্খাপদৰণ্ণনা নিট্ঠিতা।
Paṭhamapavāraṇāsikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৪. ভোজনৰগ্গো • 4. Bhojanavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৫. পঠমপৰারণসিক্খাপদৰণ্ণনা • 5. Paṭhamapavāraṇasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৫. পঠমপৰারণাসিক্খাপদৰণ্ণনা • 5. Paṭhamapavāraṇāsikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৫. পঠমপৰারণসিক্খাপদৰণ্ণনা • 5. Paṭhamapavāraṇasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৫. পঠমপৰারণসিক্খাপদং • 5. Paṭhamapavāraṇasikkhāpadaṃ
