| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
නමො තස්‌ස භගවතො අරහතො සම්‌මාසම්‌බුද්‌ධස්‌ස
Namo tassa bhagavato arahato sammāsambuddhassa
අඞ්‌ගුත්‌තරනිකායො
Aṅguttaranikāyo
සත්‌තකනිපාතපාළි
Sattakanipātapāḷi
පඨමපණ්‌ණාසකං
Paṭhamapaṇṇāsakaṃ
1. ධනවග්‌ගො
1. Dhanavaggo
1. පඨමපියසුත්‌තං
1. Paṭhamapiyasuttaṃ
1. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තත්‍ර ඛො භගවා භික්‌ඛූ ආමන්‌තෙසි – ‘‘භික්‌ඛවො’’ති. ‘‘භදන්‌තෙ’’ති තෙ භික්‌ඛූ භගවතො පච්‌චස්‌සොසුං. භගවා එතදවොච –
1. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘සත්‌තහි, භික්‌ඛවෙ, ධම්‌මෙහි සමන්‌නාගතො භික්‌ඛු සබ්‍රහ්‌මචාරීනං අප්‌පියො ච හොති අමනාපො ච අගරු ච අභාවනීයො ච. කතමෙහි සත්‌තහි? ඉධ, භික්‌ඛවෙ, භික්‌ඛු ලාභකාමො ච හොති, සක්‌කාරකාමො ච හොති, අනවඤ්‌ඤත්‌තිකාමො ච හොති, අහිරිකො ච හොති, අනොත්‌තප්‌පී ච, පාපිච්‌ඡො ච, මිච්‌ඡාදිට්‌ඨි ච. ඉමෙහි ඛො, භික්‌ඛවෙ, සත්‌තහි ධම්‌මෙහි සමන්‌නාගතො භික්‌ඛු සබ්‍රහ්‌මචාරීනං අප්‌පියො ච හොති අමනාපො ච අගරු ච අභාවනීයො ච.
‘‘Sattahi, bhikkhave, dhammehi samannāgato bhikkhu sabrahmacārīnaṃ appiyo ca hoti amanāpo ca agaru ca abhāvanīyo ca. Katamehi sattahi? Idha, bhikkhave, bhikkhu lābhakāmo ca hoti, sakkārakāmo ca hoti, anavaññattikāmo ca hoti, ahiriko ca hoti, anottappī ca, pāpiccho ca, micchādiṭṭhi ca. Imehi kho, bhikkhave, sattahi dhammehi samannāgato bhikkhu sabrahmacārīnaṃ appiyo ca hoti amanāpo ca agaru ca abhāvanīyo ca.
‘‘සත්‌තහි, භික්‌ඛවෙ, ධම්‌මෙහි සමන්‌නාගතො භික්‌ඛු සබ්‍රහ්‌මචාරීනං පියො ච හොති, මනාපො ච ගරු ච භාවනීයො ච. කතමෙහි සත්‌තහි? ඉධ , භික්‌ඛවෙ, භික්‌ඛු න ලාභකාමො ච හොති, න සක්‌කාරකාමො ච හොති, න අනවඤ්‌ඤත්‌තිකාමො ච හොති, හිරිමා ච හොති, ඔත්‌තප්‌පී ච, අප්‌පිච්‌ඡො ච, සම්‌මාදිට්‌ඨි ච. ඉමෙහි ඛො, භික්‌ඛවෙ, සත්‌තහි ධම්‌මෙහි සමන්‌නාගතො භික්‌ඛු සබ්‍රහ්‌මචාරීනං පියො ච හොති මනාපො ච ගරු ච භාවනීයො චා’’ති. පඨමං.
‘‘Sattahi, bhikkhave, dhammehi samannāgato bhikkhu sabrahmacārīnaṃ piyo ca hoti, manāpo ca garu ca bhāvanīyo ca. Katamehi sattahi? Idha , bhikkhave, bhikkhu na lābhakāmo ca hoti, na sakkārakāmo ca hoti, na anavaññattikāmo ca hoti, hirimā ca hoti, ottappī ca, appiccho ca, sammādiṭṭhi ca. Imehi kho, bhikkhave, sattahi dhammehi samannāgato bhikkhu sabrahmacārīnaṃ piyo ca hoti manāpo ca garu ca bhāvanīyo cā’’ti. Paṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1-5. පඨමපියසුත්‌තාදිවණ්‌ණනා • 1-5. Paṭhamapiyasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1. ධනවග්‌ගවණ්‌ණනා • 1. Dhanavaggavaṇṇanā
