| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༎ ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ༎
Namo tassa bhagavato arahato sammāsambuddhassa
ཨངྒུཏྟརནིཀཱཡོ
Aṅguttaranikāyo
སཏྟཀནིཔཱཏཔཱལི༹
Sattakanipātapāḷi
པཋམཔཎྞཱསཀཾ
Paṭhamapaṇṇāsakaṃ
༡. དྷནཝགྒོ
1. Dhanavaggo
༡. པཋམཔིཡསུཏྟཾ
1. Paṭhamapiyasuttaṃ
༡. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘བྷིཀྑཝོ’’ཏི། ‘‘བྷདནྟེ’’ཏི ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –
1. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘སཏྟཧི, བྷིཀྑཝེ, དྷམྨེཧི སམནྣཱགཏོ བྷིཀྑུ སབྲཧྨཙཱརཱིནཾ ཨཔྤིཡོ ཙ ཧོཏི ཨམནཱཔོ ཙ ཨགརུ ཙ ཨབྷཱཝནཱིཡོ ཙ། ཀཏམེཧི སཏྟཧི? ཨིདྷ, བྷིཀྑཝེ, བྷིཀྑུ ལཱབྷཀཱམོ ཙ ཧོཏི, སཀྐཱརཀཱམོ ཙ ཧོཏི, ཨནཝཉྙཏྟིཀཱམོ ཙ ཧོཏི, ཨཧིརིཀོ ཙ ཧོཏི, ཨནོཏྟཔྤཱི ཙ, པཱཔིཙྪོ ཙ, མིཙྪཱདིཊྛི ཙ། ཨིམེཧི ཁོ, བྷིཀྑཝེ, སཏྟཧི དྷམྨེཧི སམནྣཱགཏོ བྷིཀྑུ སབྲཧྨཙཱརཱིནཾ ཨཔྤིཡོ ཙ ཧོཏི ཨམནཱཔོ ཙ ཨགརུ ཙ ཨབྷཱཝནཱིཡོ ཙ།
‘‘Sattahi, bhikkhave, dhammehi samannāgato bhikkhu sabrahmacārīnaṃ appiyo ca hoti amanāpo ca agaru ca abhāvanīyo ca. Katamehi sattahi? Idha, bhikkhave, bhikkhu lābhakāmo ca hoti, sakkārakāmo ca hoti, anavaññattikāmo ca hoti, ahiriko ca hoti, anottappī ca, pāpiccho ca, micchādiṭṭhi ca. Imehi kho, bhikkhave, sattahi dhammehi samannāgato bhikkhu sabrahmacārīnaṃ appiyo ca hoti amanāpo ca agaru ca abhāvanīyo ca.
‘‘སཏྟཧི, བྷིཀྑཝེ, དྷམྨེཧི སམནྣཱགཏོ བྷིཀྑུ སབྲཧྨཙཱརཱིནཾ པིཡོ ཙ ཧོཏི, མནཱཔོ ཙ གརུ ཙ བྷཱཝནཱིཡོ ཙ། ཀཏམེཧི སཏྟཧི? ཨིདྷ , བྷིཀྑཝེ, བྷིཀྑུ ན ལཱབྷཀཱམོ ཙ ཧོཏི, ན སཀྐཱརཀཱམོ ཙ ཧོཏི, ན ཨནཝཉྙཏྟིཀཱམོ ཙ ཧོཏི, ཧིརིམཱ ཙ ཧོཏི, ཨོཏྟཔྤཱི ཙ, ཨཔྤིཙྪོ ཙ, སམྨཱདིཊྛི ཙ། ཨིམེཧི ཁོ, བྷིཀྑཝེ, སཏྟཧི དྷམྨེཧི སམནྣཱགཏོ བྷིཀྑུ སབྲཧྨཙཱརཱིནཾ པིཡོ ཙ ཧོཏི མནཱཔོ ཙ གརུ ཙ བྷཱཝནཱིཡོ ཙཱ’’ཏི། པཋམཾ།
‘‘Sattahi, bhikkhave, dhammehi samannāgato bhikkhu sabrahmacārīnaṃ piyo ca hoti, manāpo ca garu ca bhāvanīyo ca. Katamehi sattahi? Idha , bhikkhave, bhikkhu na lābhakāmo ca hoti, na sakkārakāmo ca hoti, na anavaññattikāmo ca hoti, hirimā ca hoti, ottappī ca, appiccho ca, sammādiṭṭhi ca. Imehi kho, bhikkhave, sattahi dhammehi samannāgato bhikkhu sabrahmacārīnaṃ piyo ca hoti manāpo ca garu ca bhāvanīyo cā’’ti. Paṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡-༥. པཋམཔིཡསུཏྟཱདིཝཎྞནཱ • 1-5. Paṭhamapiyasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡. དྷནཝགྒཝཎྞནཱ • 1. Dhanavaggavaṇṇanā
