| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. யமகவக்³கோ³
2. Yamakavaggo
1-4. பட²மபுப்³பே³ஸம்போ³த⁴ஸுத்தாதி³வண்ணனா
1-4. Paṭhamapubbesambodhasuttādivaṇṇanā
13-16. யமகவக்³க³ஸ்ஸ பட²மது³தியேஸு அஜ்ஜ²த்திகானந்தி அஜ்ஜ²த்தஜ்ஜ²த்தவஸேன அஜ்ஜ²த்திகானங். ஸோ பன நேஸங் அஜ்ஜ²த்திகபா⁴வோ ச²ந்த³ராக³ஸ்ஸ அதி⁴மத்தப³லவதாய வேதி³தப்³போ³. மனுஸ்ஸானஞ்ஹி அந்தோக⁴ரங் விய ச² அஜ்ஜ²த்திகாயதனானி, க⁴ரூபசாரங் விய ச² பா³ஹிராயதனானி. யதா² நேஸங் புத்ததா³ரத⁴னத⁴ஞ்ஞபுண்ணே அந்தோக⁴ரே ச²ந்த³ராகோ³ அதி⁴மத்தப³லவா ஹோதி, தத்த² கஸ்ஸசி பவிஸிதுங் ந தெ³ந்தி, அப்பமத்தேன பா⁴ஜனஸத்³த³மத்தேனாபி ‘‘கிங் ஏத’’ந்தி? வத்தாரோ ப⁴வந்தி. ஏவமேவங் ச²ஸு அஜ்ஜ²த்திகேஸு ஆயதனேஸு அதி⁴மத்தப³லவச²ந்த³ராகோ³தி. இதி இமாய ச²ந்த³ராக³ப³லவதாய தானி ‘‘அஜ்ஜ²த்திகானீ’’தி வுத்தானி. க⁴ரூபசாரே பன நோ ததா² ப³லவா ஹோதி, தத்த² சரந்தே மனுஸ்ஸேபி சதுப்பதா³னிபி ந ஸஹஸா நிவாரெந்தி. கிஞ்சாபி ந நிவாரெந்தி, அனிச்ச²ந்தா பன பஸுபச்சி²மத்தம்பி க³ஹிதுங் ந தெ³ந்தி. இதி நேஸங் தத்த² ந அதி⁴மத்தப³லவச²ந்த³ராகோ³ ஹோதி. ரூபாதீ³ஸுபி ததே²வ ந அதி⁴மத்தப³லவச²ந்த³ராகோ³, தஸ்மா தானி ‘‘பா³ஹிரானீ’’தி வுத்தானி. வித்தா²ரதோ பன அஜ்ஜ²த்திகபா³ஹிரகதா² விஸுத்³தி⁴மக்³கே³ வுத்தாவ. ஸேஸங் த்³வீஸுபி ஸுத்தேஸு ஹெட்டா² வுத்தனயமேவ. ததா² ததியசதுத்தே²ஸு.
13-16. Yamakavaggassa paṭhamadutiyesu ajjhattikānanti ajjhattajjhattavasena ajjhattikānaṃ. So pana nesaṃ ajjhattikabhāvo chandarāgassa adhimattabalavatāya veditabbo. Manussānañhi antogharaṃ viya cha ajjhattikāyatanāni, gharūpacāraṃ viya cha bāhirāyatanāni. Yathā nesaṃ puttadāradhanadhaññapuṇṇe antoghare chandarāgo adhimattabalavā hoti, tattha kassaci pavisituṃ na denti, appamattena bhājanasaddamattenāpi ‘‘kiṃ eta’’nti? Vattāro bhavanti. Evamevaṃ chasu ajjhattikesu āyatanesu adhimattabalavachandarāgoti. Iti imāya chandarāgabalavatāya tāni ‘‘ajjhattikānī’’ti vuttāni. Gharūpacāre pana no tathā balavā hoti, tattha carante manussepi catuppadānipi na sahasā nivārenti. Kiñcāpi na nivārenti, anicchantā pana pasupacchimattampi gahituṃ na denti. Iti nesaṃ tattha na adhimattabalavachandarāgo hoti. Rūpādīsupi tatheva na adhimattabalavachandarāgo, tasmā tāni ‘‘bāhirānī’’ti vuttāni. Vitthārato pana ajjhattikabāhirakathā visuddhimagge vuttāva. Sesaṃ dvīsupi suttesu heṭṭhā vuttanayameva. Tathā tatiyacatutthesu.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
1. பட²மபுப்³பே³ஸம்போ³த⁴ஸுத்தங் • 1. Paṭhamapubbesambodhasuttaṃ
2. து³தியபுப்³பே³ஸம்போ³த⁴ஸுத்தங் • 2. Dutiyapubbesambodhasuttaṃ
3. பட²மஅஸ்ஸாத³பரியேஸனஸுத்தங் • 3. Paṭhamaassādapariyesanasuttaṃ
4. து³தியஅஸ்ஸாத³பரியேஸனஸுத்தங் • 4. Dutiyaassādapariyesanasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1-4. பட²மபுப்³பே³ஸம்போ³த⁴ஸுத்தாதி³வண்ணனா • 1-4. Paṭhamapubbesambodhasuttādivaṇṇanā
