| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. யமகவக்³கோ³
2. Yamakavaggo
1. பட²மபுப்³பே³ஸம்போ³த⁴ஸுத்தங்
1. Paṭhamapubbesambodhasuttaṃ
13. ஸாவத்தி²னிதா³னங் . ‘‘புப்³பே³வ மே, பி⁴க்க²வே, ஸம்போ³தா⁴ அனபி⁴ஸம்பு³த்³த⁴ஸ்ஸ போ³தி⁴ஸத்தஸ்ஸேவ ஸதோ ஏதத³ஹோஸி – ‘கோ நு கோ² சக்கு²ஸ்ஸ அஸ்ஸாதோ³, கோ ஆதீ³னவோ, கிங் நிஸ்ஸரணங்? கோ ஸோதஸ்ஸ…பே॰… கோ கா⁴னஸ்ஸ… கோ ஜிவ்ஹாய… கோ காயஸ்ஸ… கோ மனஸ்ஸ அஸ்ஸாதோ³, கோ ஆதீ³னவோ, கிங் நிஸ்ஸரண’ந்தி? தஸ்ஸ மய்ஹங், பி⁴க்க²வே, ஏதத³ஹோஸி – ‘யங் கோ² சக்கு²ங் படிச்ச உப்பஜ்ஜதி ஸுக²ங் ஸோமனஸ்ஸங், அயங் சக்கு²ஸ்ஸ அஸ்ஸாதோ³. யங் சக்கு²ங் அனிச்சங் து³க்க²ங் விபரிணாமத⁴ம்மங், அயங் சக்கு²ஸ்ஸ ஆதீ³னவோ. யோ சக்கு²ஸ்மிங் ச²ந்த³ராக³வினயோ ச²ந்த³ராக³ப்பஹானங், இத³ங் சக்கு²ஸ்ஸ நிஸ்ஸரணங். யங் ஸோதங்…பே॰… யங் கா⁴னங்…பே॰… யங் ஜிவ்ஹங் படிச்ச உப்பஜ்ஜதி ஸுக²ங் ஸோமனஸ்ஸங், அயங் ஜிவ்ஹாய அஸ்ஸாதோ³. யங் 1 ஜிவ்ஹா அனிச்சா து³க்கா² விபரிணாமத⁴ம்மா, அயங் ஜிவ்ஹாய ஆதீ³னவோ. யோ ஜிவ்ஹாய ச²ந்த³ராக³வினயோ ச²ந்த³ராக³ப்பஹானங், இத³ங் ஜிவ்ஹாய நிஸ்ஸரணங். யங் காயங்…பே॰… யங் மனங் படிச்ச உப்பஜ்ஜதி ஸுக²ங் ஸோமனஸ்ஸங், அயங் மனஸ்ஸ அஸ்ஸாதோ³. யங் 2 மனோ அனிச்சோ து³க்கோ² விபரிணாமத⁴ம்மோ, அயங் மனஸ்ஸ ஆதீ³னவோ. யோ மனஸ்மிங் ச²ந்த³ராக³வினயோ ச²ந்த³ராக³ப்பஹானங், இத³ங் மனஸ்ஸ நிஸ்ஸரண’’’ந்தி.
13. Sāvatthinidānaṃ . ‘‘Pubbeva me, bhikkhave, sambodhā anabhisambuddhassa bodhisattasseva sato etadahosi – ‘ko nu kho cakkhussa assādo, ko ādīnavo, kiṃ nissaraṇaṃ? Ko sotassa…pe… ko ghānassa… ko jivhāya… ko kāyassa… ko manassa assādo, ko ādīnavo, kiṃ nissaraṇa’nti? Tassa mayhaṃ, bhikkhave, etadahosi – ‘yaṃ kho cakkhuṃ paṭicca uppajjati sukhaṃ somanassaṃ, ayaṃ cakkhussa assādo. Yaṃ cakkhuṃ aniccaṃ dukkhaṃ vipariṇāmadhammaṃ, ayaṃ cakkhussa ādīnavo. Yo cakkhusmiṃ chandarāgavinayo chandarāgappahānaṃ, idaṃ cakkhussa nissaraṇaṃ. Yaṃ sotaṃ…pe… yaṃ ghānaṃ…pe… yaṃ jivhaṃ paṭicca uppajjati sukhaṃ somanassaṃ, ayaṃ jivhāya assādo. Yaṃ 3 jivhā aniccā dukkhā vipariṇāmadhammā, ayaṃ jivhāya ādīnavo. Yo jivhāya chandarāgavinayo chandarāgappahānaṃ, idaṃ jivhāya nissaraṇaṃ. Yaṃ kāyaṃ…pe… yaṃ manaṃ paṭicca uppajjati sukhaṃ somanassaṃ, ayaṃ manassa assādo. Yaṃ 4 mano anicco dukkho vipariṇāmadhammo, ayaṃ manassa ādīnavo. Yo manasmiṃ chandarāgavinayo chandarāgappahānaṃ, idaṃ manassa nissaraṇa’’’nti.
‘‘யாவகீவஞ்சாஹங், பி⁴க்க²வே, இமேஸங் ச²ன்னங் அஜ்ஜ²த்திகானங் ஆயதனானங் ஏவங் அஸ்ஸாத³ஞ்ச அஸ்ஸாத³தோ, ஆதீ³னவஞ்ச ஆதீ³னவதோ, நிஸ்ஸரணஞ்ச நிஸ்ஸரணதோ யதா²பூ⁴தங் நாப்³ப⁴ஞ்ஞாஸிங், நேவ தாவாஹங், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய ‘அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴’தி 5 பச்சஞ்ஞாஸிங். யதோ ச க்²வாஹங், பி⁴க்க²வே, இமேஸங் ச²ன்னங் அஜ்ஜ²த்திகானங் ஆயதனானங் ஏவங் அஸ்ஸாத³ஞ்ச அஸ்ஸாத³தோ, ஆதீ³னவஞ்ச ஆதீ³னவதோ, நிஸ்ஸரணஞ்ச நிஸ்ஸரணதோ யதா²பூ⁴தங் அப்³ப⁴ஞ்ஞாஸிங், அதா²ஹங், பி⁴க்க²வே, ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய ‘அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴’தி பச்சஞ்ஞாஸிங். ஞாணஞ்ச பன மே த³ஸ்ஸனங் உத³பாதி³ – ‘அகுப்பா மே விமுத்தி 6, அயமந்திமா ஜாதி, நத்தி² தா³னி புனப்³ப⁴வோ’’’தி. பட²மங்.
‘‘Yāvakīvañcāhaṃ, bhikkhave, imesaṃ channaṃ ajjhattikānaṃ āyatanānaṃ evaṃ assādañca assādato, ādīnavañca ādīnavato, nissaraṇañca nissaraṇato yathābhūtaṃ nābbhaññāsiṃ, neva tāvāhaṃ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṃ sammāsambodhiṃ abhisambuddho’ti 7 paccaññāsiṃ. Yato ca khvāhaṃ, bhikkhave, imesaṃ channaṃ ajjhattikānaṃ āyatanānaṃ evaṃ assādañca assādato, ādīnavañca ādīnavato, nissaraṇañca nissaraṇato yathābhūtaṃ abbhaññāsiṃ, athāhaṃ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṃ sammāsambodhiṃ abhisambuddho’ti paccaññāsiṃ. Ñāṇañca pana me dassanaṃ udapādi – ‘akuppā me vimutti 8, ayamantimā jāti, natthi dāni punabbhavo’’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1-4. பட²மபுப்³பே³ஸம்போ³த⁴ஸுத்தாதி³வண்ணனா • 1-4. Paṭhamapubbesambodhasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1-4. பட²மபுப்³பே³ஸம்போ³த⁴ஸுத்தாதி³வண்ணனா • 1-4. Paṭhamapubbesambodhasuttādivaṇṇanā
