| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. যমকৰগ্গো
2. Yamakavaggo
১. পঠমপুব্বেসম্বোধসুত্তং
1. Paṭhamapubbesambodhasuttaṃ
১৩. সাৰত্থিনিদানং । ‘‘পুব্বেৰ মে, ভিক্খৰে, সম্বোধা অনভিসম্বুদ্ধস্স বোধিসত্তস্সেৰ সতো এতদহোসি – ‘কো নু খো চক্খুস্স অস্সাদো, কো আদীনৰো, কিং নিস্সরণং? কো সোতস্স…পে॰… কো ঘানস্স… কো জিৰ্হায… কো কাযস্স… কো মনস্স অস্সাদো, কো আদীনৰো, কিং নিস্সরণ’ন্তি? তস্স ময্হং, ভিক্খৰে, এতদহোসি – ‘যং খো চক্খুং পটিচ্চ উপ্পজ্জতি সুখং সোমনস্সং, অযং চক্খুস্স অস্সাদো। যং চক্খুং অনিচ্চং দুক্খং ৰিপরিণামধম্মং, অযং চক্খুস্স আদীনৰো। যো চক্খুস্মিং ছন্দরাগৰিনযো ছন্দরাগপ্পহানং, ইদং চক্খুস্স নিস্সরণং। যং সোতং…পে॰… যং ঘানং…পে॰… যং জিৰ্হং পটিচ্চ উপ্পজ্জতি সুখং সোমনস্সং, অযং জিৰ্হায অস্সাদো। যং 1 জিৰ্হা অনিচ্চা দুক্খা ৰিপরিণামধম্মা, অযং জিৰ্হায আদীনৰো। যো জিৰ্হায ছন্দরাগৰিনযো ছন্দরাগপ্পহানং, ইদং জিৰ্হায নিস্সরণং। যং কাযং…পে॰… যং মনং পটিচ্চ উপ্পজ্জতি সুখং সোমনস্সং, অযং মনস্স অস্সাদো। যং 2 মনো অনিচ্চো দুক্খো ৰিপরিণামধম্মো, অযং মনস্স আদীনৰো। যো মনস্মিং ছন্দরাগৰিনযো ছন্দরাগপ্পহানং, ইদং মনস্স নিস্সরণ’’’ন্তি।
13. Sāvatthinidānaṃ . ‘‘Pubbeva me, bhikkhave, sambodhā anabhisambuddhassa bodhisattasseva sato etadahosi – ‘ko nu kho cakkhussa assādo, ko ādīnavo, kiṃ nissaraṇaṃ? Ko sotassa…pe… ko ghānassa… ko jivhāya… ko kāyassa… ko manassa assādo, ko ādīnavo, kiṃ nissaraṇa’nti? Tassa mayhaṃ, bhikkhave, etadahosi – ‘yaṃ kho cakkhuṃ paṭicca uppajjati sukhaṃ somanassaṃ, ayaṃ cakkhussa assādo. Yaṃ cakkhuṃ aniccaṃ dukkhaṃ vipariṇāmadhammaṃ, ayaṃ cakkhussa ādīnavo. Yo cakkhusmiṃ chandarāgavinayo chandarāgappahānaṃ, idaṃ cakkhussa nissaraṇaṃ. Yaṃ sotaṃ…pe… yaṃ ghānaṃ…pe… yaṃ jivhaṃ paṭicca uppajjati sukhaṃ somanassaṃ, ayaṃ jivhāya assādo. Yaṃ 3 jivhā aniccā dukkhā vipariṇāmadhammā, ayaṃ jivhāya ādīnavo. Yo jivhāya chandarāgavinayo chandarāgappahānaṃ, idaṃ jivhāya nissaraṇaṃ. Yaṃ kāyaṃ…pe… yaṃ manaṃ paṭicca uppajjati sukhaṃ somanassaṃ, ayaṃ manassa assādo. Yaṃ 4 mano anicco dukkho vipariṇāmadhammo, ayaṃ manassa ādīnavo. Yo manasmiṃ chandarāgavinayo chandarāgappahānaṃ, idaṃ manassa nissaraṇa’’’nti.
‘‘যাৰকীৰঞ্চাহং, ভিক্খৰে, ইমেসং ছন্নং অজ্ঝত্তিকানং আযতনানং এৰং অস্সাদঞ্চ অস্সাদতো, আদীনৰঞ্চ আদীনৰতো, নিস্সরণঞ্চ নিস্সরণতো যথাভূতং নাব্ভঞ্ঞাসিং, নেৰ তাৰাহং, ভিক্খৰে, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায ‘অনুত্তরং সম্মাসম্বোধিং অভিসম্বুদ্ধো’তি 5 পচ্চঞ্ঞাসিং। যতো চ খ্ৰাহং, ভিক্খৰে, ইমেসং ছন্নং অজ্ঝত্তিকানং আযতনানং এৰং অস্সাদঞ্চ অস্সাদতো, আদীনৰঞ্চ আদীনৰতো, নিস্সরণঞ্চ নিস্সরণতো যথাভূতং অব্ভঞ্ঞাসিং, অথাহং, ভিক্খৰে, সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায ‘অনুত্তরং সম্মাসম্বোধিং অভিসম্বুদ্ধো’তি পচ্চঞ্ঞাসিং। ঞাণঞ্চ পন মে দস্সনং উদপাদি – ‘অকুপ্পা মে ৰিমুত্তি 6, অযমন্তিমা জাতি, নত্থি দানি পুনব্ভৰো’’’তি। পঠমং।
‘‘Yāvakīvañcāhaṃ, bhikkhave, imesaṃ channaṃ ajjhattikānaṃ āyatanānaṃ evaṃ assādañca assādato, ādīnavañca ādīnavato, nissaraṇañca nissaraṇato yathābhūtaṃ nābbhaññāsiṃ, neva tāvāhaṃ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṃ sammāsambodhiṃ abhisambuddho’ti 7 paccaññāsiṃ. Yato ca khvāhaṃ, bhikkhave, imesaṃ channaṃ ajjhattikānaṃ āyatanānaṃ evaṃ assādañca assādato, ādīnavañca ādīnavato, nissaraṇañca nissaraṇato yathābhūtaṃ abbhaññāsiṃ, athāhaṃ, bhikkhave, sadevake loke samārake sabrahmake sassamaṇabrāhmaṇiyā pajāya sadevamanussāya ‘anuttaraṃ sammāsambodhiṃ abhisambuddho’ti paccaññāsiṃ. Ñāṇañca pana me dassanaṃ udapādi – ‘akuppā me vimutti 8, ayamantimā jāti, natthi dāni punabbhavo’’’ti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১-৪. পঠমপুব্বেসম্বোধসুত্তাদিৰণ্ণনা • 1-4. Paṭhamapubbesambodhasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১-৪. পঠমপুব্বেসম্বোধসুত্তাদিৰণ্ণনা • 1-4. Paṭhamapubbesambodhasuttādivaṇṇanā
