| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. පුඤ්‌ඤාභිසන්‌දවග්‌ගො
4. Puññābhisandavaggo
1. පඨමපුඤ්‌ඤාභිසන්‌දසුත්‌තං
1. Paṭhamapuññābhisandasuttaṃ
1027. සාවත්‌ථිනිදානං . ‘‘චත්‌තාරොමෙ, භික්‌ඛවෙ, පුඤ්‌ඤාභිසන්‌දා කුසලාභිසන්‌දා සුඛස්‌සාහාරා. කතමෙ චත්‌තාරො? ඉධ, භික්‌ඛවෙ, අරියසාවකො බුද්‌ධෙ අවෙච්‌චප්‌පසාදෙන සමන්‌නාගතො හොති – ඉතිපි සො භගවා…පෙ.… සත්‌ථා දෙවමනුස්‌සානං බුද්‌ධො භගවාති. අයං පඨමො පුඤ්‌ඤාභිසන්‌දො කුසලාභිසන්‌දො සුඛස්‌සාහාරො.
1027. Sāvatthinidānaṃ . ‘‘Cattārome, bhikkhave, puññābhisandā kusalābhisandā sukhassāhārā. Katame cattāro? Idha, bhikkhave, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. Ayaṃ paṭhamo puññābhisando kusalābhisando sukhassāhāro.
‘‘පුන චපරං, භික්‌ඛවෙ, අරියසාවකො ධම්‌මෙ අවෙච්‌චප්‌පසාදෙන සමන්‌නාගතො හොති – ස්‌වාක්‌ඛාතො භගවතා ධම්‌මො…පෙ.… පච්‌චත්‌තං වෙදිතබ්‌බො විඤ්‌ඤූහීති. අයං දුතියො පුඤ්‌ඤාභිසන්‌දො කුසලාභිසන්‌දො සුඛස්‌සාහාරො.
‘‘Puna caparaṃ, bhikkhave, ariyasāvako dhamme aveccappasādena samannāgato hoti – svākkhāto bhagavatā dhammo…pe… paccattaṃ veditabbo viññūhīti. Ayaṃ dutiyo puññābhisando kusalābhisando sukhassāhāro.
‘‘පුන චපරං, භික්‌ඛවෙ, අරියසාවකො සඞ්‌ඝෙ අවෙච්‌චප්‌පසාදෙන සමන්‌නාගතො හොති – සුප්‌පටිපන්‌නො භගවතො සාවකසඞ්‌ඝො…පෙ.… අනුත්‌තරං පුඤ්‌ඤක්‌ඛෙත්‌තං ලොකස්‌සාති. අයං තතියො පුඤ්‌ඤාභිසන්‌දො කුසලාභිසන්‌දො සුඛස්‌සාහාරො.
‘‘Puna caparaṃ, bhikkhave, ariyasāvako saṅghe aveccappasādena samannāgato hoti – suppaṭipanno bhagavato sāvakasaṅgho…pe… anuttaraṃ puññakkhettaṃ lokassāti. Ayaṃ tatiyo puññābhisando kusalābhisando sukhassāhāro.
‘‘පුන චපරං, භික්‌ඛවෙ, අරියසාවකො අරියකන්‌තෙහි සීලෙහි සමන්‌නාගතො හොති අඛණ්‌ඩෙහි…පෙ.… සමාධිසංවත්‌තනිකෙහි. අයං චතුත්‌ථො පුඤ්‌ඤාභිසන්‌දො කුසලාභිසන්‌දො සුඛස්‌සාහාරො. ඉමෙ ඛො, භික්‌ඛවෙ, චත්‌තාරො පුඤ්‌ඤාභිසන්‌දා කුසලාභිසන්‌දා සුඛස්‌සාහාරා’’ති. පඨමං.
‘‘Puna caparaṃ, bhikkhave, ariyasāvako ariyakantehi sīlehi samannāgato hoti akhaṇḍehi…pe… samādhisaṃvattanikehi. Ayaṃ catuttho puññābhisando kusalābhisando sukhassāhāro. Ime kho, bhikkhave, cattāro puññābhisandā kusalābhisandā sukhassāhārā’’ti. Paṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. පඨමපුඤ්‌ඤාභිසන්‌දසුත්‌තවණ්‌ණනා • 1. Paṭhamapuññābhisandasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. පඨමපුඤ්‌ඤාභිසන්‌දසුත්‌තවණ්‌ණනා • 1. Paṭhamapuññābhisandasuttavaṇṇanā
