| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. து³தியபண்ணாஸகங்
2. Dutiyapaṇṇāsakaṃ
(6) 1. புஞ்ஞாபி⁴ஸந்த³வக்³கோ³
(6) 1. Puññābhisandavaggo
1. பட²மபுஞ்ஞாபி⁴ஸந்த³ஸுத்தவண்ணனா
1. Paṭhamapuññābhisandasuttavaṇṇanā
51. து³தியஸ்ஸ பட²மே புஞ்ஞாபி⁴ஸந்தா³தி புஞ்ஞஸ்ஸ அபி⁴ஸந்தா³, புஞ்ஞப்பத்தியோதி அத்தோ². குஸலாபி⁴ஸந்தா³தி தஸ்ஸேவ வேவசனங். தே பனேதே ஸுக²ங் ஆஹரந்தீதி ஸுக²ஸ்ஸாஹாரா. ஸுட்டு² அக்³கா³னங் ரூபாதீ³னங் தா³யகாதி ஸோவக்³கி³கா. ஸுகோ² நேஸங் விபாகோதி ஸுக²விபாகா. ஸக்³கே³ உபபத்தி ஸக்³கோ³, ஸக்³கா³ய ஸங்வத்தந்தீதி ஸக்³க³ஸங்வத்தனிகா. சீவரங் பரிபு⁴ஞ்ஜமானோதி சீவரத்தா²ய வத்த²ங் லபி⁴த்வா ஸூசிஸுத்தாதீ³னங் அபா⁴வேன தங் நிக்கி²பந்தோபி கரொந்தோபி பாருபந்தோபி ஜிண்ணகாலே பச்சத்த²ரணங் கரொந்தோபி பச்சத்த²ரிதும்பி அஸக்குணெய்யங் பூ⁴மத்த²ரணங் கரொந்தோபி பூ⁴மத்த²ரணஸ்ஸ அனநுச்ச²விகங் பா²லெத்வா பாத³புஞ்ச²னங் கரொந்தோபி ‘‘பரிபு⁴ஞ்ஜமானோ’’த்வேவ வுச்சதி. யதா³ பன ‘‘பாத³புஞ்ச²னம்பி ந ஸக்கா இத³’’ந்தி ஸம்மஜ்ஜித்வா ச²ட்³டி³தங் ஹோதி, ததா³ பரிபு⁴ஞ்ஜமானோ நாம ந ஹோதி. அப்பமாணங் சேதோஸமாதி⁴ந்தி அரஹத்தப²லஸமாதி⁴ங். அப்பமாணோ தஸ்ஸ புஞ்ஞாபி⁴ஸந்தோ³தி இமினா தா³யகஸ்ஸ புஞ்ஞசேதனாய அப்பமாணதங் கதே²தி. தஸ்ஸ ஹி ‘‘கீ²ணாஸவோ மே சீவரங் பரிபு⁴ஞ்ஜதீ’’தி புனப்புனங் அனுஸ்ஸரணவஸேன பவத்தா புஞ்ஞசேதனா அப்பமாணா ஹோதி. தங் ஸந்தா⁴யேதங் வுத்தங். பிண்ட³பாதாதீ³ஸு பன யோ பிண்ட³பாதங் பரிபு⁴ஞ்ஜித்வா ஸத்தாஹம்பி தேனேவ யாபேதி, அஞ்ஞங் ந பரிபு⁴ஞ்ஜதி, ஸோ ஸத்தாஹம்பி தங்யேவ பிண்ட³பாதங் பரிபு⁴ஞ்ஜமானோ நாம ஹோதி. ஏகஸ்மிங் பன ஸேனாஸனே ரத்திட்டா²னதி³வாட்டா²னாதீ³ஸு சங்கமந்தோபி யாவ தங் ஸேனாஸனங் பஹாய அஞ்ஞங் ந க³ண்ஹாதி, தாவ பரிபு⁴ஞ்ஜமானோ நாம ஹோதி. ஏகேன பன பே⁴ஸஜ்ஜேன ப்³யாதி⁴ம்ஹி வூபஸந்தே யாவ அஞ்ஞங் பே⁴ஸஜ்ஜங் ந பரிபு⁴ஞ்ஜதி, தாவதே³வ பரிபு⁴ஞ்ஜமானோ நாம ஹோதி.
51. Dutiyassa paṭhame puññābhisandāti puññassa abhisandā, puññappattiyoti attho. Kusalābhisandāti tasseva vevacanaṃ. Te panete sukhaṃ āharantīti sukhassāhārā. Suṭṭhu aggānaṃ rūpādīnaṃ dāyakāti sovaggikā. Sukho nesaṃ vipākoti sukhavipākā. Sagge upapatti saggo, saggāya saṃvattantīti saggasaṃvattanikā. Cīvaraṃ paribhuñjamānoti cīvaratthāya vatthaṃ labhitvā sūcisuttādīnaṃ abhāvena taṃ nikkhipantopi karontopi pārupantopi jiṇṇakāle paccattharaṇaṃ karontopi paccattharitumpi asakkuṇeyyaṃ bhūmattharaṇaṃ karontopi bhūmattharaṇassa ananucchavikaṃ phāletvā pādapuñchanaṃ karontopi ‘‘paribhuñjamāno’’tveva vuccati. Yadā pana ‘‘pādapuñchanampi na sakkā ida’’nti sammajjitvā chaḍḍitaṃ hoti, tadā paribhuñjamāno nāma na hoti. Appamāṇaṃ cetosamādhinti arahattaphalasamādhiṃ. Appamāṇo tassa puññābhisandoti iminā dāyakassa puññacetanāya appamāṇataṃ katheti. Tassa hi ‘‘khīṇāsavo me cīvaraṃ paribhuñjatī’’ti punappunaṃ anussaraṇavasena pavattā puññacetanā appamāṇā hoti. Taṃ sandhāyetaṃ vuttaṃ. Piṇḍapātādīsu pana yo piṇḍapātaṃ paribhuñjitvā sattāhampi teneva yāpeti, aññaṃ na paribhuñjati, so sattāhampi taṃyeva piṇḍapātaṃ paribhuñjamāno nāma hoti. Ekasmiṃ pana senāsane rattiṭṭhānadivāṭṭhānādīsu caṅkamantopi yāva taṃ senāsanaṃ pahāya aññaṃ na gaṇhāti, tāva paribhuñjamāno nāma hoti. Ekena pana bhesajjena byādhimhi vūpasante yāva aññaṃ bhesajjaṃ na paribhuñjati, tāvadeva paribhuñjamāno nāma hoti.
ப³ஹுபே⁴ரவந்தி ப³ஹூஹி பே⁴ரவாரம்மணேஹி ஸமன்னாக³தங். ரதனவரானந்தி ஸத்தன்னம்பி வரரதனானங். ஆலயந்தி நிவாஸட்டா²னங். புதூ² ஸவந்தீதி ப³ஹுகா ஹுத்வா ஸந்த³மானா. ஸேஸமெத்த² உத்தானமேவ.
Bahubheravanti bahūhi bheravārammaṇehi samannāgataṃ. Ratanavarānanti sattannampi vararatanānaṃ. Ālayanti nivāsaṭṭhānaṃ. Puthū savantīti bahukā hutvā sandamānā. Sesamettha uttānameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. பட²மபுஞ்ஞாபி⁴ஸந்த³ஸுத்தங் • 1. Paṭhamapuññābhisandasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. பட²மபுஞ்ஞாபி⁴ஸந்த³ஸுத்தவண்ணனா • 1. Paṭhamapuññābhisandasuttavaṇṇanā
