| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
2. දුතියපණ්‌ණාසකං
2. Dutiyapaṇṇāsakaṃ
(6) 1. පුඤ්‌ඤාභිසන්‌දවග්‌ගො
(6) 1. Puññābhisandavaggo
1. පඨමපුඤ්‌ඤාභිසන්‌දසුත්‌තවණ්‌ණනා
1. Paṭhamapuññābhisandasuttavaṇṇanā
51. දුතියස්‌ස පඨමෙ පුඤ්‌ඤාභිසන්‌දාති පුඤ්‌ඤස්‌ස අභිසන්‌දා, පුඤ්‌ඤප්‌පත්‌තියොති අත්‌ථො. කුසලාභිසන්‌දාති තස්‌සෙව වෙවචනං. තෙ පනෙතෙ සුඛං ආහරන්‌තීති සුඛස්‌සාහාරා. සුට්‌ඨු අග්‌ගානං රූපාදීනං දායකාති සොවග්‌ගිකා. සුඛො නෙසං විපාකොති සුඛවිපාකා. සග්‌ගෙ උපපත්‌ති සග්‌ගො, සග්‌ගාය සංවත්‌තන්‌තීති සග්‌ගසංවත්‌තනිකා. චීවරං පරිභුඤ්‌ජමානොති චීවරත්‌ථාය වත්‌ථං ලභිත්‌වා සූචිසුත්‌තාදීනං අභාවෙන තං නික්‌ඛිපන්‌තොපි කරොන්‌තොපි පාරුපන්‌තොපි ජිණ්‌ණකාලෙ පච්‌චත්‌ථරණං කරොන්‌තොපි පච්‌චත්‌ථරිතුම්‌පි අසක්‌කුණෙය්‍යං භූමත්‌ථරණං කරොන්‌තොපි භූමත්‌ථරණස්‌ස අනනුච්‌ඡවිකං ඵාලෙත්‌වා පාදපුඤ්‌ඡනං කරොන්‌තොපි ‘‘පරිභුඤ්‌ජමානො’’ත්‌වෙව වුච්‌චති. යදා පන ‘‘පාදපුඤ්‌ඡනම්‌පි න සක්‌කා ඉද’’න්‌ති සම්‌මජ්‌ජිත්‌වා ඡඩ්‌ඩිතං හොති, තදා පරිභුඤ්‌ජමානො නාම න හොති. අප්‌පමාණං චෙතොසමාධින්‌ති අරහත්‌තඵලසමාධිං. අප්‌පමාණො තස්‌ස පුඤ්‌ඤාභිසන්‌දොති ඉමිනා දායකස්‌ස පුඤ්‌ඤචෙතනාය අප්‌පමාණතං කථෙති. තස්‌ස හි ‘‘ඛීණාසවො මෙ චීවරං පරිභුඤ්‌ජතී’’ති පුනප්‌පුනං අනුස්‌සරණවසෙන පවත්‌තා පුඤ්‌ඤචෙතනා අප්‌පමාණා හොති. තං සන්‌ධායෙතං වුත්‌තං. පිණ්‌ඩපාතාදීසු පන යො පිණ්‌ඩපාතං පරිභුඤ්‌ජිත්‌වා සත්‌තාහම්‌පි තෙනෙව යාපෙති, අඤ්‌ඤං න පරිභුඤ්‌ජති, සො සත්‌තාහම්‌පි තංයෙව පිණ්‌ඩපාතං පරිභුඤ්‌ජමානො නාම හොති. එකස්‌මිං පන සෙනාසනෙ රත්‌තිට්‌ඨානදිවාට්‌ඨානාදීසු චඞ්‌කමන්‌තොපි යාව තං සෙනාසනං පහාය අඤ්‌ඤං න ගණ්‌හාති, තාව පරිභුඤ්‌ජමානො නාම හොති. එකෙන පන භෙසජ්‌ජෙන බ්‍යාධිම්‌හි වූපසන්‌තෙ යාව අඤ්‌ඤං භෙසජ්‌ජං න පරිභුඤ්‌ජති, තාවදෙව පරිභුඤ්‌ජමානො නාම හොති.
51. Dutiyassa paṭhame puññābhisandāti puññassa abhisandā, puññappattiyoti attho. Kusalābhisandāti tasseva vevacanaṃ. Te panete sukhaṃ āharantīti sukhassāhārā. Suṭṭhu aggānaṃ rūpādīnaṃ dāyakāti sovaggikā. Sukho nesaṃ vipākoti sukhavipākā. Sagge upapatti saggo, saggāya saṃvattantīti saggasaṃvattanikā. Cīvaraṃ paribhuñjamānoti cīvaratthāya vatthaṃ labhitvā sūcisuttādīnaṃ abhāvena taṃ nikkhipantopi karontopi pārupantopi jiṇṇakāle paccattharaṇaṃ karontopi paccattharitumpi asakkuṇeyyaṃ bhūmattharaṇaṃ karontopi bhūmattharaṇassa ananucchavikaṃ phāletvā pādapuñchanaṃ karontopi ‘‘paribhuñjamāno’’tveva vuccati. Yadā pana ‘‘pādapuñchanampi na sakkā ida’’nti sammajjitvā chaḍḍitaṃ hoti, tadā paribhuñjamāno nāma na hoti. Appamāṇaṃ cetosamādhinti arahattaphalasamādhiṃ. Appamāṇo tassa puññābhisandoti iminā dāyakassa puññacetanāya appamāṇataṃ katheti. Tassa hi ‘‘khīṇāsavo me cīvaraṃ paribhuñjatī’’ti punappunaṃ anussaraṇavasena pavattā puññacetanā appamāṇā hoti. Taṃ sandhāyetaṃ vuttaṃ. Piṇḍapātādīsu pana yo piṇḍapātaṃ paribhuñjitvā sattāhampi teneva yāpeti, aññaṃ na paribhuñjati, so sattāhampi taṃyeva piṇḍapātaṃ paribhuñjamāno nāma hoti. Ekasmiṃ pana senāsane rattiṭṭhānadivāṭṭhānādīsu caṅkamantopi yāva taṃ senāsanaṃ pahāya aññaṃ na gaṇhāti, tāva paribhuñjamāno nāma hoti. Ekena pana bhesajjena byādhimhi vūpasante yāva aññaṃ bhesajjaṃ na paribhuñjati, tāvadeva paribhuñjamāno nāma hoti.
බහුභෙරවන්‌ති බහූහි භෙරවාරම්‌මණෙහි සමන්‌නාගතං. රතනවරානන්‌ති සත්‌තන්‌නම්‌පි වරරතනානං. ආලයන්‌ති නිවාසට්‌ඨානං. පුථූ සවන්‌තීති බහුකා හුත්‌වා සන්‌දමානා. සෙසමෙත්‌ථ උත්‌තානමෙව.
Bahubheravanti bahūhi bheravārammaṇehi samannāgataṃ. Ratanavarānanti sattannampi vararatanānaṃ. Ālayanti nivāsaṭṭhānaṃ. Puthū savantīti bahukā hutvā sandamānā. Sesamettha uttānameva.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 1. පඨමපුඤ්‌ඤාභිසන්‌දසුත්‌තං • 1. Paṭhamapuññābhisandasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1. පඨමපුඤ්‌ඤාභිසන්‌දසුත්‌තවණ්‌ණනා • 1. Paṭhamapuññābhisandasuttavaṇṇanā
