| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੨. ਦੁਤਿਯਪਣ੍ਣਾਸਕਂ
2. Dutiyapaṇṇāsakaṃ
(੬) ੧. ਪੁਞ੍ਞਾਭਿਸਨ੍ਦવਗ੍ਗੋ
(6) 1. Puññābhisandavaggo
੧. ਪਠਮਪੁਞ੍ਞਾਭਿਸਨ੍ਦਸੁਤ੍ਤવਣ੍ਣਨਾ
1. Paṭhamapuññābhisandasuttavaṇṇanā
੫੧. ਦੁਤਿਯਸ੍ਸ ਪਠਮੇ ਪੁਞ੍ਞਾਭਿਸਨ੍ਦਾਤਿ ਪੁਞ੍ਞਸ੍ਸ ਅਭਿਸਨ੍ਦਾ, ਪੁਞ੍ਞਪ੍ਪਤ੍ਤਿਯੋਤਿ ਅਤ੍ਥੋ। ਕੁਸਲਾਭਿਸਨ੍ਦਾਤਿ ਤਸ੍ਸੇવ વੇવਚਨਂ। ਤੇ ਪਨੇਤੇ ਸੁਖਂ ਆਹਰਨ੍ਤੀਤਿ ਸੁਖਸ੍ਸਾਹਾਰਾ। ਸੁਟ੍ਠੁ ਅਗ੍ਗਾਨਂ ਰੂਪਾਦੀਨਂ ਦਾਯਕਾਤਿ ਸੋવਗ੍ਗਿਕਾ। ਸੁਖੋ ਨੇਸਂ વਿਪਾਕੋਤਿ ਸੁਖવਿਪਾਕਾ। ਸਗ੍ਗੇ ਉਪਪਤ੍ਤਿ ਸਗ੍ਗੋ, ਸਗ੍ਗਾਯ ਸਂવਤ੍ਤਨ੍ਤੀਤਿ ਸਗ੍ਗਸਂવਤ੍ਤਨਿਕਾ। ਚੀવਰਂ ਪਰਿਭੁਞ੍ਜਮਾਨੋਤਿ ਚੀવਰਤ੍ਥਾਯ વਤ੍ਥਂ ਲਭਿਤ੍વਾ ਸੂਚਿਸੁਤ੍ਤਾਦੀਨਂ ਅਭਾવੇਨ ਤਂ ਨਿਕ੍ਖਿਪਨ੍ਤੋਪਿ ਕਰੋਨ੍ਤੋਪਿ ਪਾਰੁਪਨ੍ਤੋਪਿ ਜਿਣ੍ਣਕਾਲੇ ਪਚ੍ਚਤ੍ਥਰਣਂ ਕਰੋਨ੍ਤੋਪਿ ਪਚ੍ਚਤ੍ਥਰਿਤੁਮ੍ਪਿ ਅਸਕ੍ਕੁਣੇਯ੍ਯਂ ਭੂਮਤ੍ਥਰਣਂ ਕਰੋਨ੍ਤੋਪਿ ਭੂਮਤ੍ਥਰਣਸ੍ਸ ਅਨਨੁਚ੍ਛવਿਕਂ ਫਾਲੇਤ੍વਾ ਪਾਦਪੁਞ੍ਛਨਂ ਕਰੋਨ੍ਤੋਪਿ ‘‘ਪਰਿਭੁਞ੍ਜਮਾਨੋ’’ਤ੍વੇવ વੁਚ੍ਚਤਿ। ਯਦਾ ਪਨ ‘‘ਪਾਦਪੁਞ੍ਛਨਮ੍ਪਿ ਨ ਸਕ੍ਕਾ ਇਦ’’ਨ੍ਤਿ ਸਮ੍ਮਜ੍ਜਿਤ੍વਾ ਛਡ੍ਡਿਤਂ ਹੋਤਿ, ਤਦਾ ਪਰਿਭੁਞ੍ਜਮਾਨੋ ਨਾਮ ਨ ਹੋਤਿ। ਅਪ੍ਪਮਾਣਂ ਚੇਤੋਸਮਾਧਿਨ੍ਤਿ ਅਰਹਤ੍ਤਫਲਸਮਾਧਿਂ। ਅਪ੍ਪਮਾਣੋ ਤਸ੍ਸ ਪੁਞ੍ਞਾਭਿਸਨ੍ਦੋਤਿ ਇਮਿਨਾ ਦਾਯਕਸ੍ਸ ਪੁਞ੍ਞਚੇਤਨਾਯ ਅਪ੍ਪਮਾਣਤਂ ਕਥੇਤਿ। ਤਸ੍ਸ ਹਿ ‘‘ਖੀਣਾਸવੋ ਮੇ ਚੀવਰਂ ਪਰਿਭੁਞ੍ਜਤੀ’’ਤਿ ਪੁਨਪ੍ਪੁਨਂ ਅਨੁਸ੍ਸਰਣવਸੇਨ ਪવਤ੍ਤਾ ਪੁਞ੍ਞਚੇਤਨਾ ਅਪ੍ਪਮਾਣਾ ਹੋਤਿ। ਤਂ ਸਨ੍ਧਾਯੇਤਂ વੁਤ੍ਤਂ। ਪਿਣ੍ਡਪਾਤਾਦੀਸੁ ਪਨ ਯੋ ਪਿਣ੍ਡਪਾਤਂ ਪਰਿਭੁਞ੍ਜਿਤ੍વਾ ਸਤ੍ਤਾਹਮ੍ਪਿ ਤੇਨੇવ ਯਾਪੇਤਿ, ਅਞ੍ਞਂ ਨ ਪਰਿਭੁਞ੍ਜਤਿ, ਸੋ ਸਤ੍ਤਾਹਮ੍ਪਿ ਤਂਯੇવ ਪਿਣ੍ਡਪਾਤਂ ਪਰਿਭੁਞ੍ਜਮਾਨੋ ਨਾਮ ਹੋਤਿ। ਏਕਸ੍ਮਿਂ ਪਨ ਸੇਨਾਸਨੇ ਰਤ੍ਤਿਟ੍ਠਾਨਦਿવਾਟ੍ਠਾਨਾਦੀਸੁ ਚਙ੍ਕਮਨ੍ਤੋਪਿ ਯਾવ ਤਂ ਸੇਨਾਸਨਂ ਪਹਾਯ ਅਞ੍ਞਂ ਨ ਗਣ੍ਹਾਤਿ, ਤਾવ ਪਰਿਭੁਞ੍ਜਮਾਨੋ ਨਾਮ ਹੋਤਿ। ਏਕੇਨ ਪਨ ਭੇਸਜ੍ਜੇਨ ਬ੍ਯਾਧਿਮ੍ਹਿ વੂਪਸਨ੍ਤੇ ਯਾવ ਅਞ੍ਞਂ ਭੇਸਜ੍ਜਂ ਨ ਪਰਿਭੁਞ੍ਜਤਿ, ਤਾવਦੇવ ਪਰਿਭੁਞ੍ਜਮਾਨੋ ਨਾਮ ਹੋਤਿ।
51. Dutiyassa paṭhame puññābhisandāti puññassa abhisandā, puññappattiyoti attho. Kusalābhisandāti tasseva vevacanaṃ. Te panete sukhaṃ āharantīti sukhassāhārā. Suṭṭhu aggānaṃ rūpādīnaṃ dāyakāti sovaggikā. Sukho nesaṃ vipākoti sukhavipākā. Sagge upapatti saggo, saggāya saṃvattantīti saggasaṃvattanikā. Cīvaraṃ paribhuñjamānoti cīvaratthāya vatthaṃ labhitvā sūcisuttādīnaṃ abhāvena taṃ nikkhipantopi karontopi pārupantopi jiṇṇakāle paccattharaṇaṃ karontopi paccattharitumpi asakkuṇeyyaṃ bhūmattharaṇaṃ karontopi bhūmattharaṇassa ananucchavikaṃ phāletvā pādapuñchanaṃ karontopi ‘‘paribhuñjamāno’’tveva vuccati. Yadā pana ‘‘pādapuñchanampi na sakkā ida’’nti sammajjitvā chaḍḍitaṃ hoti, tadā paribhuñjamāno nāma na hoti. Appamāṇaṃ cetosamādhinti arahattaphalasamādhiṃ. Appamāṇo tassa puññābhisandoti iminā dāyakassa puññacetanāya appamāṇataṃ katheti. Tassa hi ‘‘khīṇāsavo me cīvaraṃ paribhuñjatī’’ti punappunaṃ anussaraṇavasena pavattā puññacetanā appamāṇā hoti. Taṃ sandhāyetaṃ vuttaṃ. Piṇḍapātādīsu pana yo piṇḍapātaṃ paribhuñjitvā sattāhampi teneva yāpeti, aññaṃ na paribhuñjati, so sattāhampi taṃyeva piṇḍapātaṃ paribhuñjamāno nāma hoti. Ekasmiṃ pana senāsane rattiṭṭhānadivāṭṭhānādīsu caṅkamantopi yāva taṃ senāsanaṃ pahāya aññaṃ na gaṇhāti, tāva paribhuñjamāno nāma hoti. Ekena pana bhesajjena byādhimhi vūpasante yāva aññaṃ bhesajjaṃ na paribhuñjati, tāvadeva paribhuñjamāno nāma hoti.
ਬਹੁਭੇਰવਨ੍ਤਿ ਬਹੂਹਿ ਭੇਰવਾਰਮ੍ਮਣੇਹਿ ਸਮਨ੍ਨਾਗਤਂ। ਰਤਨવਰਾਨਨ੍ਤਿ ਸਤ੍ਤਨ੍ਨਮ੍ਪਿ વਰਰਤਨਾਨਂ। ਆਲਯਨ੍ਤਿ ਨਿવਾਸਟ੍ਠਾਨਂ। ਪੁਥੂ ਸવਨ੍ਤੀਤਿ ਬਹੁਕਾ ਹੁਤ੍વਾ ਸਨ੍ਦਮਾਨਾ। ਸੇਸਮੇਤ੍ਥ ਉਤ੍ਤਾਨਮੇવ।
Bahubheravanti bahūhi bheravārammaṇehi samannāgataṃ. Ratanavarānanti sattannampi vararatanānaṃ. Ālayanti nivāsaṭṭhānaṃ. Puthū savantīti bahukā hutvā sandamānā. Sesamettha uttānameva.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧. ਪਠਮਪੁਞ੍ਞਾਭਿਸਨ੍ਦਸੁਤ੍ਤਂ • 1. Paṭhamapuññābhisandasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੧. ਪਠਮਪੁਞ੍ਞਾਭਿਸਨ੍ਦਸੁਤ੍ਤવਣ੍ਣਨਾ • 1. Paṭhamapuññābhisandasuttavaṇṇanā
