| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. பட²மரூபாராமஸுத்தவண்ணனா
3. Paṭhamarūpārāmasuttavaṇṇanā
136. ததியே ரூபஸம்முதி³தாதி ரூபே ஸம்முதி³தா பமோதி³தா. து³க்கா²தி து³க்கி²தா. ஸுகோ²தி நிப்³பா³னஸுகே²ன ஸுகி²தோ. கேவலாதி ஸகலா. யாவதத்தீ²தி வுச்சதீதி யத்தகா அத்தீ²தி வுச்சதி. ஏதே வோதி எத்த² வோ-காரோ நிபாதமத்தங். பச்சனீகமித³ங் ஹோதி, ஸப்³ப³லோகேன பஸ்ஸதந்தி யங் இத³ங் பஸ்ஸந்தானங் பண்டி³தானங் த³ஸ்ஸனங், தங் ஸப்³ப³லோகேன பச்சனீகங் ஹோதி விருத்³த⁴ங். லோகோ ஹி பஞ்சக்க²ந்தே⁴ நிச்சா ஸுகா² அத்தா ஸுபா⁴தி மஞ்ஞதி, பண்டி³தா அனிச்சா து³க்கா² அனத்தா அஸுபா⁴தி. ஸுக²தோ ஆஹூதி ஸுக²ந்தி கதெ²ந்தி. ஸுக²தோ விதூ³தி ஸுக²ந்தி ஜானந்தி. ஸப்³ப³மேதங் நிப்³பா³னமேவ ஸந்தா⁴ய வுத்தங்.
136. Tatiye rūpasammuditāti rūpe sammuditā pamoditā. Dukkhāti dukkhitā. Sukhoti nibbānasukhena sukhito. Kevalāti sakalā. Yāvatatthīti vuccatīti yattakā atthīti vuccati. Ete voti ettha vo-kāro nipātamattaṃ. Paccanīkamidaṃ hoti, sabbalokena passatanti yaṃ idaṃ passantānaṃ paṇḍitānaṃ dassanaṃ, taṃ sabbalokena paccanīkaṃ hoti viruddhaṃ. Loko hi pañcakkhandhe niccā sukhā attā subhāti maññati, paṇḍitā aniccā dukkhā anattā asubhāti. Sukhato āhūti sukhanti kathenti. Sukhato vidūti sukhanti jānanti. Sabbametaṃ nibbānameva sandhāya vuttaṃ.
ஸம்மூள்ஹெத்தா²தி எத்த² நிப்³பா³னே ஸம்மூள்ஹா. அவித்³த³ஸூதி பா³லா. ஸப்³பே³பி ஹி ச²ன்னவுதிபாஸண்டி³னோ ‘‘நிப்³பா³னங் பாபுணிஸ்ஸாமா’’தி ஸஞ்ஞினோ ஹொந்தி, தே பன ‘‘நிப்³பா³னங் நாம இத³’’ந்திபி ந ஜானந்தி. நிவுதானந்தி கிலேஸனீவரணேன நிவுதானங் பரியோனத்³தா⁴னங். அந்த⁴காரோ அபஸ்ஸதந்தி அபஸ்ஸந்தானங் அந்த⁴காரோ ஹோதி. கிங் தங் ஏவங் ஹோதி? நிப்³பா³னங் வா நிப்³பா³னத³ஸ்ஸனங் வா அபஸ்ஸந்தானஞ்ஹி பா³லானங் நிப்³பா³னம்பி நிப்³பா³னத³ஸ்ஸனம்பி காளமேக⁴அவச்சா²தி³தங் விய சந்த³மண்ட³லங் கடாஹேன படிகுஜ்ஜிதபத்தோ விய ச நிச்சகாலங் தமோ சேவ அந்த⁴காரோ ச ஸம்பஜ்ஜதி.
Sammūḷhetthāti ettha nibbāne sammūḷhā. Aviddasūti bālā. Sabbepi hi channavutipāsaṇḍino ‘‘nibbānaṃ pāpuṇissāmā’’ti saññino honti, te pana ‘‘nibbānaṃ nāma ida’’ntipi na jānanti. Nivutānanti kilesanīvaraṇena nivutānaṃ pariyonaddhānaṃ. Andhakāro apassatanti apassantānaṃ andhakāro hoti. Kiṃ taṃ evaṃ hoti? Nibbānaṃ vā nibbānadassanaṃ vā apassantānañhi bālānaṃ nibbānampi nibbānadassanampi kāḷameghaavacchāditaṃ viya candamaṇḍalaṃ kaṭāhena paṭikujjitapatto viya ca niccakālaṃ tamo ceva andhakāro ca sampajjati.
ஸதஞ்ச விவடங் ஹோதி, ஆலோகோ பஸ்ஸதாமிவாதி ஸதஞ்ச ஸப்புரிஸானங் பஞ்ஞாத³ஸ்ஸனேன பஸ்ஸந்தானங் நிப்³பா³னங் ஆலோகோ விய விவடங் ஹோதி. ஸந்திகே ந விஜானந்தி, மகா³ த⁴ம்மஸ்ஸ அகோவிதா³தி யங் அத்தனோ ஸரீரே கேஸே வா லோமாதீ³ஸு வா அஞ்ஞதரகொட்டா²ஸங் பரிச்சி²ந்தி³த்வா அனந்தரமேவ அதி⁴க³ந்தப்³ப³தோ அத்தனோ வா க²ந்தா⁴னங் நிரோத⁴மக்³க³தோ ஸந்திகே நிப்³பா³னங். தங் ஏவங் ஸந்திகே ஸமானம்பி மக்³க³பூ⁴தா ஜனா மக்³கா³மக்³க³த⁴ம்மஸ்ஸ சதுஸச்சத⁴ம்மஸ்ஸ வா அகோவிதா³ ந ஜானந்தி.
Satañca vivaṭaṃ hoti, āloko passatāmivāti satañca sappurisānaṃ paññādassanena passantānaṃ nibbānaṃ āloko viya vivaṭaṃ hoti. Santike na vijānanti, magā dhammassa akovidāti yaṃ attano sarīre kese vā lomādīsu vā aññatarakoṭṭhāsaṃ paricchinditvā anantarameva adhigantabbato attano vā khandhānaṃ nirodhamaggato santike nibbānaṃ. Taṃ evaṃ santike samānampi maggabhūtā janā maggāmaggadhammassa catusaccadhammassa vā akovidā na jānanti.
மாரதெ⁴ய்யானுபன்னேஹீதி தேபூ⁴மகவட்டங் மாரஸ்ஸ நிவாஸட்டா²னங் அனுபன்னேஹி. கோ நு அஞ்ஞத்ர அரியேபீ⁴தி ட²பெத்வா அரியே கோ நு அஞ்ஞோ நிப்³பா³னபத³ங் ஜானிதுங் அரஹதி. ஸம்மத³ஞ்ஞாய பரினிப்³ப³ந்தீதி அரஹத்தபஞ்ஞாய ஸம்மா ஜானித்வா அனந்தரமேவ அனாஸவா ஹுத்வா கிலேஸபரினிப்³பா³னேன பரினிப்³ப³ந்தி. அத² வா ஸம்மத³ஞ்ஞாய அனாஸவா ஹுத்வா அந்தே க²ந்த⁴பரினிப்³பா³னேன பரினிப்³பா³யந்தி.
Māradheyyānupannehīti tebhūmakavaṭṭaṃ mārassa nivāsaṭṭhānaṃ anupannehi. Konu aññatra ariyebhīti ṭhapetvā ariye ko nu añño nibbānapadaṃ jānituṃ arahati. Sammadaññāya parinibbantīti arahattapaññāya sammā jānitvā anantarameva anāsavā hutvā kilesaparinibbānena parinibbanti. Atha vā sammadaññāya anāsavā hutvā ante khandhaparinibbānena parinibbāyanti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. பட²மரூபாராமஸுத்தங் • 3. Paṭhamarūpārāmasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. பட²மரூபாராமஸுத்தவண்ணனா • 3. Paṭhamarūpārāmasuttavaṇṇanā
