| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৩. পঠমরূপারামসুত্তৰণ্ণনা
3. Paṭhamarūpārāmasuttavaṇṇanā
১৩৬. ততিযে রূপসম্মুদিতাতি রূপে সম্মুদিতা পমোদিতা। দুক্খাতি দুক্খিতা। সুখোতি নিব্বানসুখেন সুখিতো। কেৰলাতি সকলা। যাৰতত্থীতি ৰুচ্চতীতি যত্তকা অত্থীতি ৰুচ্চতি। এতে ৰোতি এত্থ ৰো-কারো নিপাতমত্তং। পচ্চনীকমিদং হোতি, সব্বলোকেন পস্সতন্তি যং ইদং পস্সন্তানং পণ্ডিতানং দস্সনং, তং সব্বলোকেন পচ্চনীকং হোতি ৰিরুদ্ধং। লোকো হি পঞ্চক্খন্ধে নিচ্চা সুখা অত্তা সুভাতি মঞ্ঞতি, পণ্ডিতা অনিচ্চা দুক্খা অনত্তা অসুভাতি। সুখতো আহূতি সুখন্তি কথেন্তি। সুখতো ৰিদূতি সুখন্তি জানন্তি। সব্বমেতং নিব্বানমেৰ সন্ধায ৰুত্তং।
136. Tatiye rūpasammuditāti rūpe sammuditā pamoditā. Dukkhāti dukkhitā. Sukhoti nibbānasukhena sukhito. Kevalāti sakalā. Yāvatatthīti vuccatīti yattakā atthīti vuccati. Ete voti ettha vo-kāro nipātamattaṃ. Paccanīkamidaṃ hoti, sabbalokena passatanti yaṃ idaṃ passantānaṃ paṇḍitānaṃ dassanaṃ, taṃ sabbalokena paccanīkaṃ hoti viruddhaṃ. Loko hi pañcakkhandhe niccā sukhā attā subhāti maññati, paṇḍitā aniccā dukkhā anattā asubhāti. Sukhato āhūti sukhanti kathenti. Sukhato vidūti sukhanti jānanti. Sabbametaṃ nibbānameva sandhāya vuttaṃ.
সম্মূল়্হেত্থাতি এত্থ নিব্বানে সম্মূল়্হা। অৰিদ্দসূতি বালা। সব্বেপি হি ছন্নৰুতিপাসণ্ডিনো ‘‘নিব্বানং পাপুণিস্সামা’’তি সঞ্ঞিনো হোন্তি, তে পন ‘‘নিব্বানং নাম ইদ’’ন্তিপি ন জানন্তি। নিৰুতানন্তি কিলেসনীৰরণেন নিৰুতানং পরিযোনদ্ধানং। অন্ধকারো অপস্সতন্তি অপস্সন্তানং অন্ধকারো হোতি। কিং তং এৰং হোতি? নিব্বানং ৰা নিব্বানদস্সনং ৰা অপস্সন্তানঞ্হি বালানং নিব্বানম্পি নিব্বানদস্সনম্পি কাল়মেঘঅৰচ্ছাদিতং ৰিয চন্দমণ্ডলং কটাহেন পটিকুজ্জিতপত্তো ৰিয চ নিচ্চকালং তমো চেৰ অন্ধকারো চ সম্পজ্জতি।
Sammūḷhetthāti ettha nibbāne sammūḷhā. Aviddasūti bālā. Sabbepi hi channavutipāsaṇḍino ‘‘nibbānaṃ pāpuṇissāmā’’ti saññino honti, te pana ‘‘nibbānaṃ nāma ida’’ntipi na jānanti. Nivutānanti kilesanīvaraṇena nivutānaṃ pariyonaddhānaṃ. Andhakāro apassatanti apassantānaṃ andhakāro hoti. Kiṃ taṃ evaṃ hoti? Nibbānaṃ vā nibbānadassanaṃ vā apassantānañhi bālānaṃ nibbānampi nibbānadassanampi kāḷameghaavacchāditaṃ viya candamaṇḍalaṃ kaṭāhena paṭikujjitapatto viya ca niccakālaṃ tamo ceva andhakāro ca sampajjati.
সতঞ্চ ৰিৰটং হোতি, আলোকো পস্সতামিৰাতি সতঞ্চ সপ্পুরিসানং পঞ্ঞাদস্সনেন পস্সন্তানং নিব্বানং আলোকো ৰিয ৰিৰটং হোতি। সন্তিকে ন ৰিজানন্তি, মগা ধম্মস্স অকোৰিদাতি যং অত্তনো সরীরে কেসে ৰা লোমাদীসু ৰা অঞ্ঞতরকোট্ঠাসং পরিচ্ছিন্দিত্ৰা অনন্তরমেৰ অধিগন্তব্বতো অত্তনো ৰা খন্ধানং নিরোধমগ্গতো সন্তিকে নিব্বানং। তং এৰং সন্তিকে সমানম্পি মগ্গভূতা জনা মগ্গামগ্গধম্মস্স চতুসচ্চধম্মস্স ৰা অকোৰিদা ন জানন্তি।
Satañca vivaṭaṃ hoti, āloko passatāmivāti satañca sappurisānaṃ paññādassanena passantānaṃ nibbānaṃ āloko viya vivaṭaṃ hoti. Santike na vijānanti, magā dhammassa akovidāti yaṃ attano sarīre kese vā lomādīsu vā aññatarakoṭṭhāsaṃ paricchinditvā anantarameva adhigantabbato attano vā khandhānaṃ nirodhamaggato santike nibbānaṃ. Taṃ evaṃ santike samānampi maggabhūtā janā maggāmaggadhammassa catusaccadhammassa vā akovidā na jānanti.
মারধেয্যানুপন্নেহীতি তেভূমকৰট্টং মারস্স নিৰাসট্ঠানং অনুপন্নেহি। কো নু অঞ্ঞত্র অরিযেভীতি ঠপেত্ৰা অরিযে কো নু অঞ্ঞো নিব্বানপদং জানিতুং অরহতি। সম্মদঞ্ঞায পরিনিব্বন্তীতি অরহত্তপঞ্ঞায সম্মা জানিত্ৰা অনন্তরমেৰ অনাসৰা হুত্ৰা কিলেসপরিনিব্বানেন পরিনিব্বন্তি। অথ ৰা সম্মদঞ্ঞায অনাসৰা হুত্ৰা অন্তে খন্ধপরিনিব্বানেন পরিনিব্বাযন্তি।
Māradheyyānupannehīti tebhūmakavaṭṭaṃ mārassa nivāsaṭṭhānaṃ anupannehi. Konu aññatra ariyebhīti ṭhapetvā ariye ko nu añño nibbānapadaṃ jānituṃ arahati. Sammadaññāya parinibbantīti arahattapaññāya sammā jānitvā anantarameva anāsavā hutvā kilesaparinibbānena parinibbanti. Atha vā sammadaññāya anāsavā hutvā ante khandhaparinibbānena parinibbāyanti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৩. পঠমরূপারামসুত্তং • 3. Paṭhamarūpārāmasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. পঠমরূপারামসুত্তৰণ্ণনা • 3. Paṭhamarūpārāmasuttavaṇṇanā
