| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៣. បឋមរូបារាមសុត្តវណ្ណនា
3. Paṭhamarūpārāmasuttavaṇṇanā
១៣៦. សម្មុទិតា សម្មោទប្បត្តា, បមោទិតា សញ្ជាតបមោទា។ ទុក្ខាតិ ទុក្ខវន្តោ សញ្ជាតទុក្ខា។ តេនាហ ‘‘ទុក្ខិតា’’តិ។ សុខំ ឯតស្ស អត្ថីតិ សុខោ, សុខី។ តេនាហ ‘‘សុខិតោ’’តិ។ យត្តកា រូបាទយោ ធម្មា លោកេ អត្ថីតិ វុច្ចតិ។ បស្សន្តានន្តិ សច្ចបដិវេធេន សម្មទេវ បស្សន្តានំ។ ‘‘បច្ចនីកំ ហោតី’’តិ វត្វា តំ បច្ចនីកភាវំ ទស្សេតុំ ‘‘លោកោ ហី’’តិអាទិ វុត្តំ។ អសុភាតិ ‘‘អាហូ’’តិបទំ អានេត្វា សម្ពន្ធោ។ សព្ពមេតន្តិ ‘‘សុខំ ទិដ្ឋមរិយេភិ…បេ.… តទរិយា សុខតោ វិទូ’’តិ ច វុត្តំ។ សព្ពមេតំ និព្ពានមេវ សន្ធាយ វុត្តំ។ និព្ពានមេវ ហិ ឯកន្តតោ សុខំ នាម។
136.Sammuditā sammodappattā, pamoditā sañjātapamodā. Dukkhāti dukkhavanto sañjātadukkhā. Tenāha ‘‘dukkhitā’’ti. Sukhaṃ etassa atthīti sukho, sukhī. Tenāha ‘‘sukhito’’ti. Yattakā rūpādayo dhammā loke atthīti vuccati. Passantānanti saccapaṭivedhena sammadeva passantānaṃ. ‘‘Paccanīkaṃ hotī’’ti vatvā taṃ paccanīkabhāvaṃ dassetuṃ ‘‘loko hī’’tiādi vuttaṃ. Asubhāti ‘‘āhū’’tipadaṃ ānetvā sambandho. Sabbametanti ‘‘sukhaṃ diṭṭhamariyebhi…pe… tadariyā sukhato vidū’’ti ca vuttaṃ. Sabbametaṃ nibbānameva sandhāya vuttaṃ. Nibbānameva hi ekantato sukhaṃ nāma.
បញ្ចនវុតិបាសណ្ឌិនោ តេសញ្ច បាសណ្ឌិភាវោ បបញ្ចសូទនិដ្ឋកថាយំ បកាសិតោ ឯវ។ កិលេសនីវរណេន និវុតានន្តិ កិលេសខន្ធា កិលេសនីវរណំ, តេន និវារិតានំ។ និព្ពានទស្សនំ នាម អរិយមគ្គោ, តេន តស្ស បដិវិជ្ឈនញ្ច កាឡមេឃអវច្ឆាទិតំ វិយ ចន្ទមណ្ឌលំ។
Pañcanavutipāsaṇḍino tesañca pāsaṇḍibhāvo papañcasūdaniṭṭhakathāyaṃ pakāsito eva. Kilesanīvaraṇena nivutānanti kilesakhandhā kilesanīvaraṇaṃ, tena nivāritānaṃ. Nibbānadassanaṃ nāma ariyamaggo, tena tassa paṭivijjhanañca kāḷameghaavacchāditaṃ viya candamaṇḍalaṃ.
បរិច្ឆិន្ទិត្វាតិ អសុភភាវបរិច្ឆិន្ទនេន សម្មាវិញ្ញាណទស្សនេន ច បរិច្ឆិន្ទិត្វា។ មគ្គធម្មស្សាតិ អរិយមគ្គធម្មស្ស។
Paricchinditvāti asubhabhāvaparicchindanena sammāviññāṇadassanena ca paricchinditvā. Maggadhammassāti ariyamaggadhammassa.
អនុបន្នេហីតិ អនុ អនុ អវិហាយ បដិបន្នេហិ។ កោ នុ អញ្ញោ ជានិតុំ អរហតិ, អញ្ញោ ន ជានាតីតិ ទស្សេតិ។
Anupannehīti anu anu avihāya paṭipannehi. Ko nu añño jānituṃ arahati, añño na jānātīti dasseti.
បឋមរូបារាមសុត្តវណ្ណនា និដ្ឋិតា។
Paṭhamarūpārāmasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៣. បឋមរូបារាមសុត្តំ • 3. Paṭhamarūpārāmasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៣. បឋមរូបារាមសុត្តវណ្ណនា • 3. Paṭhamarūpārāmasuttavaṇṇanā
