| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
3. පඨමරූපාරාමසුත්‌තවණ්‌ණනා
3. Paṭhamarūpārāmasuttavaṇṇanā
136. තතියෙ රූපසම්‌මුදිතාති රූපෙ සම්‌මුදිතා පමොදිතා. දුක්‌ඛාති දුක්‌ඛිතා. සුඛොති නිබ්‌බානසුඛෙන සුඛිතො. කෙවලාති සකලා. යාවතත්‌ථීති වුච්‌චතීති යත්‌තකා අත්‌ථීති වුච්‌චති. එතෙ වොති එත්‌ථ වො-කාරො නිපාතමත්‌තං. පච්‌චනීකමිදං හොති, සබ්‌බලොකෙන පස්‌සතන්‌ති යං ඉදං පස්‌සන්‌තානං පණ්‌ඩිතානං දස්‌සනං, තං සබ්‌බලොකෙන පච්‌චනීකං හොති විරුද්‌ධං. ලොකො හි පඤ්‌චක්‌ඛන්‌ධෙ නිච්‌චා සුඛා අත්‌තා සුභාති මඤ්‌ඤති, පණ්‌ඩිතා අනිච්‌චා දුක්‌ඛා අනත්‌තා අසුභාති. සුඛතො ආහූති සුඛන්‌ති කථෙන්‌ති. සුඛතො විදූති සුඛන්‌ති ජානන්‌ති. සබ්‌බමෙතං නිබ්‌බානමෙව සන්‌ධාය වුත්‌තං.
136. Tatiye rūpasammuditāti rūpe sammuditā pamoditā. Dukkhāti dukkhitā. Sukhoti nibbānasukhena sukhito. Kevalāti sakalā. Yāvatatthīti vuccatīti yattakā atthīti vuccati. Ete voti ettha vo-kāro nipātamattaṃ. Paccanīkamidaṃ hoti, sabbalokena passatanti yaṃ idaṃ passantānaṃ paṇḍitānaṃ dassanaṃ, taṃ sabbalokena paccanīkaṃ hoti viruddhaṃ. Loko hi pañcakkhandhe niccā sukhā attā subhāti maññati, paṇḍitā aniccā dukkhā anattā asubhāti. Sukhato āhūti sukhanti kathenti. Sukhato vidūti sukhanti jānanti. Sabbametaṃ nibbānameva sandhāya vuttaṃ.
සම්‌මූළ්‌හෙත්‌ථාති එත්‌ථ නිබ්‌බානෙ සම්‌මූළ්‌හා. අවිද්‌දසූති බාලා. සබ්‌බෙපි හි ඡන්‌නවුතිපාසණ්‌ඩිනො ‘‘නිබ්‌බානං පාපුණිස්‌සාමා’’ති සඤ්‌ඤිනො හොන්‌ති, තෙ පන ‘‘නිබ්‌බානං නාම ඉද’’න්‌තිපි න ජානන්‌ති. නිවුතානන්‌ති කිලෙසනීවරණෙන නිවුතානං පරියොනද්‌ධානං. අන්‌ධකාරො අපස්‌සතන්‌ති අපස්‌සන්‌තානං අන්‌ධකාරො හොති. කිං තං එවං හොති? නිබ්‌බානං වා නිබ්‌බානදස්‌සනං වා අපස්‌සන්‌තානඤ්‌හි බාලානං නිබ්‌බානම්‌පි නිබ්‌බානදස්‌සනම්‌පි කාළමෙඝඅවච්‌ඡාදිතං විය චන්‌දමණ්‌ඩලං කටාහෙන පටිකුජ්‌ජිතපත්‌තො විය ච නිච්‌චකාලං තමො චෙව අන්‌ධකාරො ච සම්‌පජ්‌ජති.
Sammūḷhetthāti ettha nibbāne sammūḷhā. Aviddasūti bālā. Sabbepi hi channavutipāsaṇḍino ‘‘nibbānaṃ pāpuṇissāmā’’ti saññino honti, te pana ‘‘nibbānaṃ nāma ida’’ntipi na jānanti. Nivutānanti kilesanīvaraṇena nivutānaṃ pariyonaddhānaṃ. Andhakāro apassatanti apassantānaṃ andhakāro hoti. Kiṃ taṃ evaṃ hoti? Nibbānaṃ vā nibbānadassanaṃ vā apassantānañhi bālānaṃ nibbānampi nibbānadassanampi kāḷameghaavacchāditaṃ viya candamaṇḍalaṃ kaṭāhena paṭikujjitapatto viya ca niccakālaṃ tamo ceva andhakāro ca sampajjati.
සතඤ්‌ච විවටං හොති, ආලොකො පස්‌සතාමිවාති සතඤ්‌ච සප්‌පුරිසානං පඤ්‌ඤාදස්‌සනෙන පස්‌සන්‌තානං නිබ්‌බානං ආලොකො විය විවටං හොති. සන්‌තිකෙ න විජානන්‌ති, මගා ධම්‌මස්‌ස අකොවිදාති යං අත්‌තනො සරීරෙ කෙසෙ වා ලොමාදීසු වා අඤ්‌ඤතරකොට්‌ඨාසං පරිච්‌ඡින්‌දිත්‌වා අනන්‌තරමෙව අධිගන්‌තබ්‌බතො අත්‌තනො වා ඛන්‌ධානං නිරොධමග්‌ගතො සන්‌තිකෙ නිබ්‌බානං. තං එවං සන්‌තිකෙ සමානම්‌පි මග්‌ගභූතා ජනා මග්‌ගාමග්‌ගධම්‌මස්‌ස චතුසච්‌චධම්‌මස්‌ස වා අකොවිදා න ජානන්‌ති.
Satañca vivaṭaṃ hoti, āloko passatāmivāti satañca sappurisānaṃ paññādassanena passantānaṃ nibbānaṃ āloko viya vivaṭaṃ hoti. Santike na vijānanti, magā dhammassa akovidāti yaṃ attano sarīre kese vā lomādīsu vā aññatarakoṭṭhāsaṃ paricchinditvā anantarameva adhigantabbato attano vā khandhānaṃ nirodhamaggato santike nibbānaṃ. Taṃ evaṃ santike samānampi maggabhūtā janā maggāmaggadhammassa catusaccadhammassa vā akovidā na jānanti.
මාරධෙය්‍යානුපන්‌නෙහීති තෙභූමකවට්‌ටං මාරස්‌ස නිවාසට්‌ඨානං අනුපන්‌නෙහි. කො නු අඤ්‌ඤත්‍ර අරියෙභීති ඨපෙත්‌වා අරියෙ කො නු අඤ්‌ඤො නිබ්‌බානපදං ජානිතුං අරහති. සම්‌මදඤ්‌ඤාය පරිනිබ්‌බන්‌තීති අරහත්‌තපඤ්‌ඤාය සම්‌මා ජානිත්‌වා අනන්‌තරමෙව අනාසවා හුත්‌වා කිලෙසපරිනිබ්‌බානෙන පරිනිබ්‌බන්‌ති. අථ වා සම්‌මදඤ්‌ඤාය අනාසවා හුත්‌වා අන්‌තෙ ඛන්‌ධපරිනිබ්‌බානෙන පරිනිබ්‌බායන්‌ති.
Māradheyyānupannehīti tebhūmakavaṭṭaṃ mārassa nivāsaṭṭhānaṃ anupannehi. Konu aññatra ariyebhīti ṭhapetvā ariye ko nu añño nibbānapadaṃ jānituṃ arahati. Sammadaññāya parinibbantīti arahattapaññāya sammā jānitvā anantarameva anāsavā hutvā kilesaparinibbānena parinibbanti. Atha vā sammadaññāya anāsavā hutvā ante khandhaparinibbānena parinibbāyanti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 3. පඨමරූපාරාමසුත්‌තං • 3. Paṭhamarūpārāmasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3. පඨමරූපාරාමසුත්‌තවණ්‌ණනා • 3. Paṭhamarūpārāmasuttavaṇṇanā
