| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
3. පඨමරූපාරාමසුත්‌තවණ්‌ණනා
3. Paṭhamarūpārāmasuttavaṇṇanā
136. සම්‌මුදිතා සම්‌මොදප්‌පත්‌තා, පමොදිතා සඤ්‌ජාතපමොදා. දුක්‌ඛාති දුක්‌ඛවන්‌තො සඤ්‌ජාතදුක්‌ඛා. තෙනාහ ‘‘දුක්‌ඛිතා’’ති. සුඛං එතස්‌ස අත්‌ථීති සුඛො, සුඛී. තෙනාහ ‘‘සුඛිතො’’ති. යත්‌තකා රූපාදයො ධම්‌මා ලොකෙ අත්‌ථීති වුච්‌චති. පස්‌සන්‌තානන්‌ති සච්‌චපටිවෙධෙන සම්‌මදෙව පස්‌සන්‌තානං. ‘‘පච්‌චනීකං හොතී’’ති වත්‌වා තං පච්‌චනීකභාවං දස්‌සෙතුං ‘‘ලොකො හී’’තිආදි වුත්‌තං. අසුභාති ‘‘ආහූ’’තිපදං ආනෙත්‌වා සම්‌බන්‌ධො. සබ්‌බමෙතන්‌ති ‘‘සුඛං දිට්‌ඨමරියෙභි…පෙ.… තදරියා සුඛතො විදූ’’ති ච වුත්‌තං. සබ්‌බමෙතං නිබ්‌බානමෙව සන්‌ධාය වුත්‌තං. නිබ්‌බානමෙව හි එකන්‌තතො සුඛං නාම.
136.Sammuditā sammodappattā, pamoditā sañjātapamodā. Dukkhāti dukkhavanto sañjātadukkhā. Tenāha ‘‘dukkhitā’’ti. Sukhaṃ etassa atthīti sukho, sukhī. Tenāha ‘‘sukhito’’ti. Yattakā rūpādayo dhammā loke atthīti vuccati. Passantānanti saccapaṭivedhena sammadeva passantānaṃ. ‘‘Paccanīkaṃ hotī’’ti vatvā taṃ paccanīkabhāvaṃ dassetuṃ ‘‘loko hī’’tiādi vuttaṃ. Asubhāti ‘‘āhū’’tipadaṃ ānetvā sambandho. Sabbametanti ‘‘sukhaṃ diṭṭhamariyebhi…pe… tadariyā sukhato vidū’’ti ca vuttaṃ. Sabbametaṃ nibbānameva sandhāya vuttaṃ. Nibbānameva hi ekantato sukhaṃ nāma.
පඤ්‌චනවුතිපාසණ්‌ඩිනො තෙසඤ්‌ච පාසණ්‌ඩිභාවො පපඤ්‌චසූදනිට්‌ඨකථායං පකාසිතො එව. කිලෙසනීවරණෙන නිවුතානන්‌ති කිලෙසඛන්‌ධා කිලෙසනීවරණං, තෙන නිවාරිතානං. නිබ්‌බානදස්‌සනං නාම අරියමග්‌ගො, තෙන තස්‌ස පටිවිජ්‌ඣනඤ්‌ච කාළමෙඝඅවච්‌ඡාදිතං විය චන්‌දමණ්‌ඩලං.
Pañcanavutipāsaṇḍino tesañca pāsaṇḍibhāvo papañcasūdaniṭṭhakathāyaṃ pakāsito eva. Kilesanīvaraṇena nivutānanti kilesakhandhā kilesanīvaraṇaṃ, tena nivāritānaṃ. Nibbānadassanaṃ nāma ariyamaggo, tena tassa paṭivijjhanañca kāḷameghaavacchāditaṃ viya candamaṇḍalaṃ.
පරිච්‌ඡින්‌දිත්‌වාති අසුභභාවපරිච්‌ඡින්‌දනෙන සම්‌මාවිඤ්‌ඤාණදස්‌සනෙන ච පරිච්‌ඡින්‌දිත්‌වා. මග්‌ගධම්‌මස්‌සාති අරියමග්‌ගධම්‌මස්‌ස.
Paricchinditvāti asubhabhāvaparicchindanena sammāviññāṇadassanena ca paricchinditvā. Maggadhammassāti ariyamaggadhammassa.
අනුපන්‌නෙහීති අනු අනු අවිහාය පටිපන්‌නෙහි. කො නු අඤ්‌ඤො ජානිතුං අරහති, අඤ්‌ඤො න ජානාතීති දස්‌සෙති.
Anupannehīti anu anu avihāya paṭipannehi. Ko nu añño jānituṃ arahati, añño na jānātīti dasseti.
පඨමරූපාරාමසුත්‌තවණ්‌ණනා නිට්‌ඨිතා.
Paṭhamarūpārāmasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 3. පඨමරූපාරාමසුත්‌තං • 3. Paṭhamarūpārāmasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. පඨමරූපාරාමසුත්‌තවණ්‌ණනා • 3. Paṭhamarūpārāmasuttavaṇṇanā
