| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༣. པཋམརཱུཔཱརཱམསུཏྟཝཎྞནཱ
3. Paṭhamarūpārāmasuttavaṇṇanā
༡༣༦. སམྨུདིཏཱ སམྨོདཔྤཏྟཱ, པམོདིཏཱ སཉྫཱཏཔམོདཱ། དུཀྑཱཏི དུཀྑཝནྟོ སཉྫཱཏདུཀྑཱ། ཏེནཱཧ ‘‘དུཀྑིཏཱ’’ཏི། སུཁཾ ཨེཏསྶ ཨཏྠཱིཏི སུཁོ, སུཁཱི། ཏེནཱཧ ‘‘སུཁིཏོ’’ཏི། ཡཏྟཀཱ རཱུཔཱདཡོ དྷམྨཱ ལོཀེ ཨཏྠཱིཏི ཝུཙྩཏི། པསྶནྟཱནནྟི སཙྩཔཊིཝེདྷེན སམྨདེཝ པསྶནྟཱནཾ། ‘‘པཙྩནཱིཀཾ ཧོཏཱི’’ཏི ཝཏྭཱ ཏཾ པཙྩནཱིཀབྷཱཝཾ དསྶེཏུཾ ‘‘ལོཀོ ཧཱི’’ཏིཨཱདི ཝུཏྟཾ། ཨསུབྷཱཏི ‘‘ཨཱཧཱུ’’ཏིཔདཾ ཨཱནེཏྭཱ སམྦནྡྷོ། སབྦམེཏནྟི ‘‘སུཁཾ དིཊྛམརིཡེབྷི…པེ॰… ཏདརིཡཱ སུཁཏོ ཝིདཱུ’’ཏི ཙ ཝུཏྟཾ། སབྦམེཏཾ ནིབྦཱནམེཝ སནྡྷཱཡ ཝུཏྟཾ། ནིབྦཱནམེཝ ཧི ཨེཀནྟཏོ སུཁཾ ནཱམ།
136.Sammuditā sammodappattā, pamoditā sañjātapamodā. Dukkhāti dukkhavanto sañjātadukkhā. Tenāha ‘‘dukkhitā’’ti. Sukhaṃ etassa atthīti sukho, sukhī. Tenāha ‘‘sukhito’’ti. Yattakā rūpādayo dhammā loke atthīti vuccati. Passantānanti saccapaṭivedhena sammadeva passantānaṃ. ‘‘Paccanīkaṃ hotī’’ti vatvā taṃ paccanīkabhāvaṃ dassetuṃ ‘‘loko hī’’tiādi vuttaṃ. Asubhāti ‘‘āhū’’tipadaṃ ānetvā sambandho. Sabbametanti ‘‘sukhaṃ diṭṭhamariyebhi…pe… tadariyā sukhato vidū’’ti ca vuttaṃ. Sabbametaṃ nibbānameva sandhāya vuttaṃ. Nibbānameva hi ekantato sukhaṃ nāma.
པཉྩནཝུཏིཔཱསཎྜིནོ ཏེསཉྩ པཱསཎྜིབྷཱཝོ པཔཉྩསཱུདནིཊྛཀཐཱཡཾ པཀཱསིཏོ ཨེཝ། ཀིལེསནཱིཝརཎེན ནིཝུཏཱནནྟི ཀིལེསཁནྡྷཱ ཀིལེསནཱིཝརཎཾ, ཏེན ནིཝཱརིཏཱནཾ། ནིབྦཱནདསྶནཾ ནཱམ ཨརིཡམགྒོ, ཏེན ཏསྶ པཊིཝིཛ྄ཛྷནཉྩ ཀཱལ༹མེགྷཨཝཙྪཱདིཏཾ ཝིཡ ཙནྡམཎྜལཾ།
Pañcanavutipāsaṇḍino tesañca pāsaṇḍibhāvo papañcasūdaniṭṭhakathāyaṃ pakāsito eva. Kilesanīvaraṇena nivutānanti kilesakhandhā kilesanīvaraṇaṃ, tena nivāritānaṃ. Nibbānadassanaṃ nāma ariyamaggo, tena tassa paṭivijjhanañca kāḷameghaavacchāditaṃ viya candamaṇḍalaṃ.
པརིཙྪིནྡིཏྭཱཏི ཨསུབྷབྷཱཝཔརིཙྪིནྡནེན སམྨཱཝིཉྙཱཎདསྶནེན ཙ པརིཙྪིནྡིཏྭཱ། མགྒདྷམྨསྶཱཏི ཨརིཡམགྒདྷམྨསྶ།
Paricchinditvāti asubhabhāvaparicchindanena sammāviññāṇadassanena ca paricchinditvā. Maggadhammassāti ariyamaggadhammassa.
ཨནུཔནྣེཧཱིཏི ཨནུ ཨནུ ཨཝིཧཱཡ པཊིཔནྣེཧི། ཀོ ནུ ཨཉྙོ ཛཱནིཏུཾ ཨརཧཏི, ཨཉྙོ ན ཛཱནཱཏཱིཏི དསྶེཏི།
Anupannehīti anu anu avihāya paṭipannehi. Ko nu añño jānituṃ arahati, añño na jānātīti dasseti.
པཋམརཱུཔཱརཱམསུཏྟཝཎྞནཱ ནིཊྛིཏཱ།
Paṭhamarūpārāmasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༣. པཋམརཱུཔཱརཱམསུཏྟཾ • 3. Paṭhamarūpārāmasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༣. པཋམརཱུཔཱརཱམསུཏྟཝཎྞནཱ • 3. Paṭhamarūpārāmasuttavaṇṇanā
