| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
5. பட²மஸஹஸெய்யஸிக்கா²பத³வண்ணனா
5. Paṭhamasahaseyyasikkhāpadavaṇṇanā
இத⁴ ‘‘பி⁴க்கு²ங் ட²பெத்வா அவஸேஸோ அனுபஸம்பன்னோ நாமா’’தி (பாசி॰ 52) வசனதோ திரச்சா²னக³தோபி அனுபஸம்பன்னோயேவ, ஸோ ச கோ² ந ஸப்³போ³, மேது²னத⁴ம்மாபத்தியா வத்து²பூ⁴தோவாதி ஆஹ ‘‘அந்தமஸோ’’திஆதி³. தஸ்ஸ ச பரிச்சே²தோ³ மேது²னத⁴ம்மாபத்தியா வுத்தனயேனேவ வேதி³தப்³போ³. தி³ரத்ததிரத்தந்தி எத்த² தி³ரத்தவசனேன ந கோசி விஸேஸத்தோ² லப்³ப⁴தி, கேவலங் லோகவோஹாரவஸேன ப்³யஞ்ஜனஸிலிட்ட²தாய, முகா²ருள்ஹதாய ஏவங் வுத்தந்தி வேதி³தப்³ப³ங். த்³வின்னங் வா திண்ணங் வா ரத்தீனந்தி பன வசனத்த²மத்தத³ஸ்ஸனத்த²ங் வுத்தங், நிரந்தரதிரத்தத³ஸ்ஸனத்த²ங் வா தி³ரத்தக்³க³ஹணங் கதந்தி த³ட்ட²ப்³ப³ங். ஸஹஸெய்யந்தி ஏகதோ ஸெய்யங். ஸெய்யாதி ச காயப்பஸாரணஸங்கா²தங் ஸயனம்பி வுச்சதி ‘‘ஸயனங் ஸெய்யா’’தி கத்வா, யஸ்மிங் ஸேனாஸனே ஸயந்தி, தம்பி ‘‘ஸயந்தி எத்தா²தி ஸெய்யா’’தி கத்வா. தது³ப⁴யம்பி இத⁴ ஸாமஞ்ஞேன, ஏகஸேஸனயேன வா க³ஹிதந்தி ஆஹ ‘‘ஸப்³ப³ச்ச²ன்னபரிச்ச²ன்னே’’திஆதி³.
Idha ‘‘bhikkhuṃ ṭhapetvā avaseso anupasampanno nāmā’’ti (pāci. 52) vacanato tiracchānagatopi anupasampannoyeva, so ca kho na sabbo, methunadhammāpattiyā vatthubhūtovāti āha ‘‘antamaso’’tiādi. Tassa ca paricchedo methunadhammāpattiyā vuttanayeneva veditabbo. Dirattatirattanti ettha dirattavacanena na koci visesattho labbhati, kevalaṃ lokavohāravasena byañjanasiliṭṭhatāya, mukhāruḷhatāya evaṃ vuttanti veditabbaṃ. Dvinnaṃ vā tiṇṇaṃ vā rattīnanti pana vacanatthamattadassanatthaṃ vuttaṃ, nirantaratirattadassanatthaṃ vā dirattaggahaṇaṃ katanti daṭṭhabbaṃ. Sahaseyyanti ekato seyyaṃ. Seyyāti ca kāyappasāraṇasaṅkhātaṃ sayanampi vuccati ‘‘sayanaṃ seyyā’’ti katvā, yasmiṃ senāsane sayanti, tampi ‘‘sayanti etthāti seyyā’’ti katvā. Tadubhayampi idha sāmaññena, ekasesanayena vā gahitanti āha ‘‘sabbacchannaparicchanne’’tiādi.
தத்த² யங் ஸேனாஸனங் உபரி பஞ்சஹி ச²த³னேஹி (பாசி॰ அட்ட²॰ 51), அஞ்ஞேன வா கேனசி அந்தமஸோ வத்தே²னாபி ஸப்³ப³மேவ பரிச்ச²ன்னங், பூ⁴மிதோ பட்டா²ய யாவ ச²த³னங் ஆஹச்ச, அனாஹச்சாபி வா ஸப்³ப³ந்திமேன பரியாயேன தி³யட்³ட⁴ஹத்து²ப்³பே³தே⁴ன பாகாரேன வா அஞ்ஞேன வா கேனசி அந்தமஸோ வத்தே²னாபி பரிக்கி²த்தங், இத³ங் ஸப்³ப³ச்ச²ன்னஸப்³ப³பரிச்ச²ன்னங் நாம. யஸ்ஸ பன உபரி ப³ஹுதரங் டா²னங் ச²ன்னங், அப்பங் அச்ச²ன்னங், ஸமந்ததோ ச ப³ஹுதரங் பரிக்கி²த்தங், அப்பங் அபரிக்கி²த்தங், இத³ங் யேபு⁴ய்யேன ச²ன்னங் யேபு⁴ய்யேன பரிச்ச²ன்னங் நாம. தஸ்மிங் ஸப்³ப³ச்ச²ன்னபரிச்ச²ன்னே, யேபு⁴ய்யேன ச²ன்னபரிச்ச²ன்னே வா.
Tattha yaṃ senāsanaṃ upari pañcahi chadanehi (pāci. aṭṭha. 51), aññena vā kenaci antamaso vatthenāpi sabbameva paricchannaṃ, bhūmito paṭṭhāya yāva chadanaṃ āhacca, anāhaccāpi vā sabbantimena pariyāyena diyaḍḍhahatthubbedhena pākārena vā aññena vā kenaci antamaso vatthenāpi parikkhittaṃ, idaṃ sabbacchannasabbaparicchannaṃ nāma. Yassa pana upari bahutaraṃ ṭhānaṃ channaṃ, appaṃ acchannaṃ, samantato ca bahutaraṃ parikkhittaṃ, appaṃ aparikkhittaṃ, idaṃ yebhuyyena channaṃ yebhuyyena paricchannaṃ nāma. Tasmiṃ sabbacchannaparicchanne, yebhuyyena channaparicchanne vā.
வித³ஹெய்யாதி கரெய்ய, தஞ்ச கோ² அத்த²தோ ஸம்பாத³னந்தி ஆஹ ‘‘ஸம்பாதெ³ய்யா’’தி. அயஞ்ஹெத்த² ஸங்கே²பத்தோ² ‘‘ஸேனாஸனஸங்கா²தங் ஸெய்யங் பவிஸித்வா காயப்பஸாரணஸங்கா²தங் ஸெய்யங் கப்பெய்ய வித³ஹெய்ய ஸம்பாதெ³ய்யா’’தி. தி³யட்³ட⁴ஹத்து²ப்³பே³தோ⁴ வட்³ட⁴கிஹத்தே²ன க³ஹேதப்³போ³. ஏகூபசாரோதி வலஞ்ஜனத்³வாரஸ்ஸ ஏகத்தங் ஸந்தா⁴ய வுத்தங். ஸதக³ப்³ப⁴ங் வா சதுஸாலங் ஏகூபசாரங் ஹோதீதி ஸம்ப³ந்தோ⁴. தத்த² வாதி புரிமபுரிமதி³வஸே யத்த² வுட்ட²ங், தஸ்மிங்யேவ ஸேனாஸனே வா. அஞ்ஞத்த² வா தாதி³ஸேதி யதா²வுத்தலக்க²ணேன ஸமன்னாக³தே அஞ்ஞஸ்மிங் புப்³பே³ அவுட்ட²ஸேனாஸனே வா. தேன வாதி யேன ஸஹ புரிமபுரிமதி³வஸே வுட்ட²ங், தேன வா. அஞ்ஞேன வாதி யேன ஸஹ புரிமபுரிமஸ்மிங் தி³வஸே வுட்ட²ங், ததோ அஞ்ஞேன வா. ஸங்கே²போதி ஸங்கே²பவண்ணனா. யதி³ ஏவங் வித்தா²ரோ கத²ங் வேதி³தப்³போ³தி ஆஹ ‘‘வித்தா²ரோ பனா’’திஆதி³.
Vidaheyyāti kareyya, tañca kho atthato sampādananti āha ‘‘sampādeyyā’’ti. Ayañhettha saṅkhepattho ‘‘senāsanasaṅkhātaṃ seyyaṃ pavisitvā kāyappasāraṇasaṅkhātaṃ seyyaṃ kappeyya vidaheyya sampādeyyā’’ti. Diyaḍḍhahatthubbedho vaḍḍhakihatthena gahetabbo. Ekūpacāroti valañjanadvārassa ekattaṃ sandhāya vuttaṃ. Satagabbhaṃ vā catusālaṃ ekūpacāraṃ hotīti sambandho. Tattha vāti purimapurimadivase yattha vuṭṭhaṃ, tasmiṃyeva senāsane vā. Aññattha vā tādiseti yathāvuttalakkhaṇena samannāgate aññasmiṃ pubbe avuṭṭhasenāsane vā. Tena vāti yena saha purimapurimadivase vuṭṭhaṃ, tena vā. Aññena vāti yena saha purimapurimasmiṃ divase vuṭṭhaṃ, tato aññena vā. Saṅkhepoti saṅkhepavaṇṇanā. Yadi evaṃ vitthāro kathaṃ veditabboti āha ‘‘vitthāro panā’’tiādi.
உபட்³ட⁴ச்ச²ன்னபரிச்ச²ன்னாதீ³ஸூதி ஆதி³ஸத்³தே³ன ‘‘ஸப்³ப³ச்ச²ன்னே சூளகபரிச்ச²ன்னே து³க்கடங், யேபு⁴ய்யேன ச²ன்னே சூளகபரிச்ச²ன்னே து³க்கடங், ஸப்³ப³பரிச்ச²ன்னே சூளகச்ச²ன்னே து³க்கடங், யேபு⁴ய்யேன பரிச்ச²ன்னே சூளகச்ச²ன்னே து³க்கட’’ந்தி (பாசி॰ அட்ட²॰ 53) அட்ட²கதா²யங் வுத்தானங் க³ஹணங். ததியாய ரத்தியா புராருணா நிக்க²மித்வா புன வஸந்தஸ்ஸாதி ததியாய ரத்தியா அருணதோ புரேதரமேவ நிக்க²மித்வா அருணங் ப³ஹி உட்டா²பெத்வா சதுத்த²தி³வஸே அத்த²ங்க³தே ஸூரியே புன வஸந்தஸ்ஸ. ஸப்³ப³ச்ச²ன்னஸப்³பா³பரிச்ச²ன்னாதீ³ஸூதி எத்த² பன ஆதி³ஸத்³தே³ன ‘‘ஸப்³ப³பரிச்ச²ன்னே ஸப்³ப³அச்ச²ன்னே, யேபு⁴ய்யேன அச்ச²ன்னே யேபு⁴ய்யேன அபரிச்ச²ன்னே’’தி (பாசி॰ 54) பாளியங் ஆக³தானங், ‘‘உபட்³ட⁴ச்ச²ன்னே சூளகபரிச்ச²ன்னே அனாபத்தி, உபட்³ட⁴பரிச்ச²ன்னே சூளகச்ச²ன்னே அனாபத்தி, சூளகச்ச²ன்னே சூளகபரிச்ச²ன்னே அனாபத்தீ’’தி (பாசி॰ அட்ட²॰ 53) அட்ட²கதா²யங் ஆக³தானஞ்ச க³ஹணங்.
Upaḍḍhacchannaparicchannādīsūti ādisaddena ‘‘sabbacchanne cūḷakaparicchanne dukkaṭaṃ, yebhuyyena channe cūḷakaparicchanne dukkaṭaṃ, sabbaparicchanne cūḷakacchanne dukkaṭaṃ, yebhuyyena paricchanne cūḷakacchanne dukkaṭa’’nti (pāci. aṭṭha. 53) aṭṭhakathāyaṃ vuttānaṃ gahaṇaṃ. Tatiyāya rattiyā purāruṇā nikkhamitvā puna vasantassāti tatiyāya rattiyā aruṇato puretarameva nikkhamitvā aruṇaṃ bahi uṭṭhāpetvā catutthadivase atthaṅgate sūriye puna vasantassa. Sabbacchannasabbāparicchannādīsūti ettha pana ādisaddena ‘‘sabbaparicchanne sabbaacchanne, yebhuyyena acchanne yebhuyyena aparicchanne’’ti (pāci. 54) pāḷiyaṃ āgatānaṃ, ‘‘upaḍḍhacchanne cūḷakaparicchanne anāpatti, upaḍḍhaparicchanne cūḷakacchanne anāpatti, cūḷakacchanne cūḷakaparicchanne anāpattī’’ti (pāci. aṭṭha. 53) aṭṭhakathāyaṃ āgatānañca gahaṇaṃ.
பட²மஸஹஸெய்யஸிக்கா²பத³வண்ணனா நிட்டி²தா.
Paṭhamasahaseyyasikkhāpadavaṇṇanā niṭṭhitā.
