| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
5. பட²மஸஹஸெய்யஸிக்கா²பத³வண்ணனா
5. Paṭhamasahaseyyasikkhāpadavaṇṇanā
50. ‘‘ந ஸஹஸெய்யங் கப்பேதப்³ப³’’ந்தி பா⁴வவஸேன வுத்தங், கேஸுசி ‘‘ந ஸஹஸெய்யா கப்பேதப்³பா³’’தி பாடோ², ந கப்பேதப்³பா³ பி⁴க்கு²னாதி பஞ்ஞத்தந்தி அதி⁴ப்பாயோ. ‘‘அபஸ்ஸேனங் வாதி வாயிமமஞ்சகமேவ ஹோதீ’’தி லிகி²தங். யங் ஏதேஸங் ந கப்பதி, தங் தேஸம்பீதி உபஜ்ஜா²யாதீ³னங் ஸந்திகங் அக³ந்த்வா ஸஹஸெய்யங் கப்பெய்யாதி பாட²ஸேஸோ.
50. ‘‘Na sahaseyyaṃ kappetabba’’nti bhāvavasena vuttaṃ, kesuci ‘‘na sahaseyyā kappetabbā’’ti pāṭho, na kappetabbā bhikkhunāti paññattanti adhippāyo. ‘‘Apassenaṃ vāti vāyimamañcakameva hotī’’ti likhitaṃ. Yaṃ etesaṃ na kappati, taṃ tesampīti upajjhāyādīnaṃ santikaṃ agantvā sahaseyyaṃ kappeyyāti pāṭhaseso.
52. ‘‘அனுபஸம்பன்னோ நாம பி⁴க்கு²ங் ட²பெத்வா அவஸேஸோ’தி வுத்தத்தா மாதுகா³மோ அனுபஸம்பன்னோதி சதுத்த²ரத்தியங் மாதுகா³மோ த்³வேபி ஸஹஸெய்யாபத்தியோ ஜனேதீதி அபரே’’தி வுத்தங், ‘‘பி⁴க்கு²ங் ட²பெத்வா…பே॰… பன்னோதி பாராஜிகவத்து²பூ⁴தோ திரச்சா²னபுரிஸோ அதி⁴ப்பேதோ’’தி ச, உப⁴யம்பி வீமங்ஸிதப்³ப³ங். து³தியஸிக்கா²பதே³ மாதுகா³மோ நாமாதி மனுஸ்ஸித்தி²ங்யேவ க³ஹெத்வா யக்கீ² பேதீ திரச்சா²னக³தா பாராஜிகவத்து²பூ⁴தா ந க³ஹிதா தேஸு து³க்கடத்தா. ‘‘ஸசே பன அத்தனோபி ஸிக்கா²பதே³ து³க்கடங் ப⁴வெய்ய, அத² கஸ்மா பட²மஸிக்கா²பதே³ பாசித்திய’’ந்தி ச வுத்தங். ‘‘அபரிக்கி²த்தே பமுகே² அனாபத்தீ’’தி ஸீஹளட்ட²கதா²வசனங், தஸ்ஸத்த²ங் தீ³பேதுங் அந்த⁴கட்ட²கதா²யங் ‘‘பூ⁴மியங் வினா ஜக³தியா பமுக²ங் ஸந்தா⁴ய கதி²த’’ந்தி வுத்தங். புன வஸதீதி சதுத்த²தி³வஸே வஸதி. பி⁴க்கு²னிபன்னேதி பி⁴க்கு²ம்ஹி நிபன்னே. ஸன்னிபதிதமண்ட³பங் நாம மஹாவிஹாரே ஸன்னிபாதட்டா²னங். ‘‘தீணி ச தி³வஸானி து³க்கடகெ²த்தே வஸித்வா சதுத்தே² தி³வஸே ஸஹஸெய்யாபத்திபஹோனகே ஸயதி, பாசித்தியேவா’’தி ஏகச்சே வத³ந்தி கிர, தங் ந யுத்தங்.
52. ‘‘Anupasampanno nāma bhikkhuṃ ṭhapetvā avaseso’ti vuttattā mātugāmo anupasampannoti catuttharattiyaṃ mātugāmo dvepi sahaseyyāpattiyo janetīti apare’’ti vuttaṃ, ‘‘bhikkhuṃ ṭhapetvā…pe… pannoti pārājikavatthubhūto tiracchānapuriso adhippeto’’ti ca, ubhayampi vīmaṃsitabbaṃ. Dutiyasikkhāpade mātugāmo nāmāti manussitthiṃyeva gahetvā yakkhī petī tiracchānagatā pārājikavatthubhūtā na gahitā tesu dukkaṭattā. ‘‘Sace pana attanopi sikkhāpade dukkaṭaṃ bhaveyya, atha kasmā paṭhamasikkhāpade pācittiya’’nti ca vuttaṃ. ‘‘Aparikkhitte pamukhe anāpattī’’ti sīhaḷaṭṭhakathāvacanaṃ, tassatthaṃ dīpetuṃ andhakaṭṭhakathāyaṃ ‘‘bhūmiyaṃ vinā jagatiyā pamukhaṃ sandhāya kathita’’nti vuttaṃ. Puna vasatīti catutthadivase vasati. Bhikkhunipanneti bhikkhumhi nipanne. Sannipatitamaṇḍapaṃ nāma mahāvihāre sannipātaṭṭhānaṃ. ‘‘Tīṇi ca divasāni dukkaṭakhette vasitvā catutthe divase sahaseyyāpattipahonake sayati, pācittiyevā’’ti ekacce vadanti kira, taṃ na yuttaṃ.
பட²மஸஹஸெய்யஸிக்கா²பத³வண்ணனா நிட்டி²தா.
Paṭhamasahaseyyasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 5. ஸஹஸெய்யஸிக்கா²பத³வண்ணனா • 5. Sahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. ஸஹஸெய்யஸிக்கா²பத³வண்ணனா • 5. Sahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 5. ஸஹஸெய்யஸிக்கா²பத³வண்ணனா • 5. Sahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. ஸஹஸெய்யஸிக்கா²பத³ங் • 5. Sahaseyyasikkhāpadaṃ
