| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
৫. পঠমসহসেয্যসিক্খাপদৰণ্ণনা
5. Paṭhamasahaseyyasikkhāpadavaṇṇanā
৫০. ‘‘ন সহসেয্যং কপ্পেতব্ব’’ন্তি ভাৰৰসেন ৰুত্তং, কেসুচি ‘‘ন সহসেয্যা কপ্পেতব্বা’’তি পাঠো, ন কপ্পেতব্বা ভিক্খুনাতি পঞ্ঞত্তন্তি অধিপ্পাযো। ‘‘অপস্সেনং ৰাতি ৰাযিমমঞ্চকমেৰ হোতী’’তি লিখিতং। যং এতেসং ন কপ্পতি, তং তেসম্পীতি উপজ্ঝাযাদীনং সন্তিকং অগন্ত্ৰা সহসেয্যং কপ্পেয্যাতি পাঠসেসো।
50. ‘‘Na sahaseyyaṃ kappetabba’’nti bhāvavasena vuttaṃ, kesuci ‘‘na sahaseyyā kappetabbā’’ti pāṭho, na kappetabbā bhikkhunāti paññattanti adhippāyo. ‘‘Apassenaṃ vāti vāyimamañcakameva hotī’’ti likhitaṃ. Yaṃ etesaṃ na kappati, taṃ tesampīti upajjhāyādīnaṃ santikaṃ agantvā sahaseyyaṃ kappeyyāti pāṭhaseso.
৫২. ‘‘অনুপসম্পন্নো নাম ভিক্খুং ঠপেত্ৰা অৰসেসো’তি ৰুত্তত্তা মাতুগামো অনুপসম্পন্নোতি চতুত্থরত্তিযং মাতুগামো দ্ৰেপি সহসেয্যাপত্তিযো জনেতীতি অপরে’’তি ৰুত্তং, ‘‘ভিক্খুং ঠপেত্ৰা…পে॰… পন্নোতি পারাজিকৰত্থুভূতো তিরচ্ছানপুরিসো অধিপ্পেতো’’তি চ, উভযম্পি ৰীমংসিতব্বং। দুতিযসিক্খাপদে মাতুগামো নামাতি মনুস্সিত্থিংযেৰ গহেত্ৰা যক্খী পেতী তিরচ্ছানগতা পারাজিকৰত্থুভূতা ন গহিতা তেসু দুক্কটত্তা। ‘‘সচে পন অত্তনোপি সিক্খাপদে দুক্কটং ভৰেয্য, অথ কস্মা পঠমসিক্খাপদে পাচিত্তিয’’ন্তি চ ৰুত্তং। ‘‘অপরিক্খিত্তে পমুখে অনাপত্তী’’তি সীহল়ট্ঠকথাৰচনং, তস্সত্থং দীপেতুং অন্ধকট্ঠকথাযং ‘‘ভূমিযং ৰিনা জগতিযা পমুখং সন্ধায কথিত’’ন্তি ৰুত্তং। পুন ৰসতীতি চতুত্থদিৰসে ৰসতি। ভিক্খুনিপন্নেতি ভিক্খুম্হি নিপন্নে। সন্নিপতিতমণ্ডপং নাম মহাৰিহারে সন্নিপাতট্ঠানং। ‘‘তীণি চ দিৰসানি দুক্কটখেত্তে ৰসিত্ৰা চতুত্থে দিৰসে সহসেয্যাপত্তিপহোনকে সযতি, পাচিত্তিযেৰা’’তি একচ্চে ৰদন্তি কির, তং ন যুত্তং।
52. ‘‘Anupasampanno nāma bhikkhuṃ ṭhapetvā avaseso’ti vuttattā mātugāmo anupasampannoti catuttharattiyaṃ mātugāmo dvepi sahaseyyāpattiyo janetīti apare’’ti vuttaṃ, ‘‘bhikkhuṃ ṭhapetvā…pe… pannoti pārājikavatthubhūto tiracchānapuriso adhippeto’’ti ca, ubhayampi vīmaṃsitabbaṃ. Dutiyasikkhāpade mātugāmo nāmāti manussitthiṃyeva gahetvā yakkhī petī tiracchānagatā pārājikavatthubhūtā na gahitā tesu dukkaṭattā. ‘‘Sace pana attanopi sikkhāpade dukkaṭaṃ bhaveyya, atha kasmā paṭhamasikkhāpade pācittiya’’nti ca vuttaṃ. ‘‘Aparikkhitte pamukhe anāpattī’’ti sīhaḷaṭṭhakathāvacanaṃ, tassatthaṃ dīpetuṃ andhakaṭṭhakathāyaṃ ‘‘bhūmiyaṃ vinā jagatiyā pamukhaṃ sandhāya kathita’’nti vuttaṃ. Puna vasatīti catutthadivase vasati. Bhikkhunipanneti bhikkhumhi nipanne. Sannipatitamaṇḍapaṃ nāma mahāvihāre sannipātaṭṭhānaṃ. ‘‘Tīṇi ca divasāni dukkaṭakhette vasitvā catutthe divase sahaseyyāpattipahonake sayati, pācittiyevā’’ti ekacce vadanti kira, taṃ na yuttaṃ.
পঠমসহসেয্যসিক্খাপদৰণ্ণনা নিট্ঠিতা।
Paṭhamasahaseyyasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১. মুসাৰাদৰগ্গো • 1. Musāvādavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৫. সহসেয্যসিক্খাপদৰণ্ণনা • 5. Sahaseyyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৫. সহসেয্যসিক্খাপদৰণ্ণনা • 5. Sahaseyyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৫. সহসেয্যসিক্খাপদৰণ্ণনা • 5. Sahaseyyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৫. সহসেয্যসিক্খাপদং • 5. Sahaseyyasikkhāpadaṃ
