| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༨. པཋམསམཱདྷིསུཏྟཾ
8. Paṭhamasamādhisuttaṃ
༡༨. 1 ཨཐ ཁོ སམྦཧུལཱ བྷིཀྑཱུ ཡེན བྷགཝཱ ཏེནུཔསངྐམིཾསུ; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣཱ ཁོ ཏེ བྷིཀྑཱུ བྷགཝནྟཾ ཨེཏདཝོཙུཾ –
18.2 Atha kho sambahulā bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ –
‘‘སིཡཱ ནུ ཁོ, བྷནྟེ, བྷིཀྑུནོ ཏཐཱརཱུཔོ སམཱདྷིཔཊིལཱབྷོ ཡཐཱ ནེཝ པཐཝིཡཾ པཐཝིསཉྙཱི ཨསྶ, ན ཨཱཔསྨིཾ ཨཱཔོསཉྙཱི ཨསྶ, ན ཏེཛསྨིཾ ཏེཛོསཉྙཱི ཨསྶ, ན ཝཱཡསྨིཾ ཝཱཡོསཉྙཱི ཨསྶ, ན ཨཱཀཱསཱནཉྩཱཡཏནེ ཨཱཀཱསཱནཉྩཱཡཏནསཉྙཱི ཨསྶ, ན ཝིཉྙཱཎཉྩཱཡཏནེ ཝིཉྙཱཎཉྩཱཡཏནསཉྙཱི ཨསྶ, ན ཨཱཀིཉྩཉྙཱཡཏནེ ཨཱཀིཉྩཉྙཱཡཏནསཉྙཱི ཨསྶ, ན ནེཝསཉྙཱནཱསཉྙཱཡཏནེ ནེཝསཉྙཱནཱསཉྙཱཡཏནསཉྙཱི ཨསྶ, ན ཨིདྷལོཀེ ཨིདྷལོཀསཉྙཱི ཨསྶ, ན པརལོཀེ པརལོཀསཉྙཱི ཨསྶ, ཡམྤིདཾ དིཊྛཾ སུཏཾ མུཏཾ ཝིཉྙཱཏཾ པཏྟཾ པརིཡེསིཏཾ ཨནུཝིཙརིཏཾ མནསཱ ཏཏྲཱཔི ན སཉྙཱི ཨསྶ; སཉྙཱི ཙ པན ཨསྶཱ’’ཏི?
‘‘Siyā nu kho, bhante, bhikkhuno tathārūpo samādhipaṭilābho yathā neva pathaviyaṃ pathavisaññī assa, na āpasmiṃ āposaññī assa, na tejasmiṃ tejosaññī assa, na vāyasmiṃ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa, yampidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā tatrāpi na saññī assa; saññī ca pana assā’’ti?
‘‘སིཡཱ, བྷིཀྑཝེ, བྷིཀྑུནོ ཏཐཱརཱུཔོ སམཱདྷིཔཊིལཱབྷོ ཡཐཱ ནེཝ པཐཝིཡཾ པཐཝིསཉྙཱི ཨསྶ…པེ॰ … ཡམྤིདཾ དིཊྛཾ སུཏཾ མུཏཾ ཝིཉྙཱཏཾ པཏྟཾ པརིཡེསིཏཾ ཨནུཝིཙརིཏཾ མནསཱ ཏཏྲཱཔི ན སཉྙཱི ཨསྶ; སཉྙཱི ཙ པན ཨསྶཱ’’ཏི།
‘‘Siyā, bhikkhave, bhikkhuno tathārūpo samādhipaṭilābho yathā neva pathaviyaṃ pathavisaññī assa…pe. … yampidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā tatrāpi na saññī assa; saññī ca pana assā’’ti.
‘‘ཡཐཱ ཀཐཾ པན, བྷནྟེ, སིཡཱ བྷིཀྑུནོ ཏཐཱརཱུཔོ སམཱདྷིཔཊིལཱབྷོ ཡཐཱ ནེཝ པཐཝིཡཾ པཐཝིསཉྙཱི ཨསྶ…པེ॰… ཡམྤིདཾ དིཊྛཾ སུཏཾ མུཏཾ ཝིཉྙཱཏཾ པཏྟཾ པརིཡེསིཏཾ ཨནུཝིཙརིཏཾ མནསཱ ཏཏྲཱཔི ན སཉྙཱི ཨསྶ; སཉྙཱི ཙ པན ཨསྶཱ’’ཏི?
‘‘Yathā kathaṃ pana, bhante, siyā bhikkhuno tathārūpo samādhipaṭilābho yathā neva pathaviyaṃ pathavisaññī assa…pe… yampidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā tatrāpi na saññī assa; saññī ca pana assā’’ti?
‘‘ཨིདྷ, བྷིཀྑཝེ, བྷིཀྑུ ཨེཝཾསཉྙཱི ཧོཏི – ‘ཨེཏཾ སནྟཾ ཨེཏཾ པཎཱིཏཾ, ཡདིདཾ སབྦསངྑཱརསམཐོ སབྦཱུཔདྷིཔཊིནིསྶགྒོ ཏཎྷཱཀྑཡོ ཝིརཱགོ ནིརོདྷོ ནིབྦཱན’ནྟི། ཨེཝཾ ཁོ, བྷིཀྑཝེ, སིཡཱ བྷིཀྑུནོ ཏཐཱརཱུཔོ སམཱདྷིཔཊིལཱབྷོ ཡཐཱ ནེཝ པཐཝིཡཾ པཐཝིསཉྙཱི ཨསྶ, ན ཨཱཔསྨིཾ ཨཱཔོསཉྙཱི ཨསྶ, ན ཏེཛསྨིཾ ཏེཛོསཉྙཱི ཨསྶ, ན ཝཱཡསྨིཾ ཝཱཡོསཉྙཱི ཨསྶ, ན ཨཱཀཱསཱནཉྩཱཡཏནེ ཨཱཀཱསཱནཉྩཱཡཏནསཉྙཱི ཨསྶ, ན ཝིཉྙཱཎཉྩཱཡཏནེ ཝིཉྙཱཎཉྩཱཡཏནསཉྙཱི ཨསྶ, ན ཨཱཀིཉྩཉྙཱཡཏནེ ཨཱཀིཉྩཉྙཱཡཏནསཉྙཱི ཨསྶ, ན ནེཝསཉྙཱནཱསཉྙཱཡཏནེ ནེཝསཉྙཱནཱསཉྙཱཡཏནསཉྙཱི ཨསྶ, ན ཨིདྷལོཀེ ཨིདྷལོཀསཉྙཱི ཨསྶ, ན པརལོཀེ པརལོཀསཉྙཱི ཨསྶ, ཡམྤིདཾ དིཊྛཾ སུཏཾ མུཏཾ ཝིཉྙཱཏཾ པཏྟཾ པརིཡེསིཏཾ ཨནུཝིཙརིཏཾ མནསཱ ཏཏྲཱཔི ན སཉྙཱི ཨསྶ; སཉྙཱི ཙ པན ཨསྶཱ’’ཏི། ཨཊྛམཾ།
‘‘Idha, bhikkhave, bhikkhu evaṃsaññī hoti – ‘etaṃ santaṃ etaṃ paṇītaṃ, yadidaṃ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbāna’nti. Evaṃ kho, bhikkhave, siyā bhikkhuno tathārūpo samādhipaṭilābho yathā neva pathaviyaṃ pathavisaññī assa, na āpasmiṃ āposaññī assa, na tejasmiṃ tejosaññī assa, na vāyasmiṃ vāyosaññī assa, na ākāsānañcāyatane ākāsānañcāyatanasaññī assa, na viññāṇañcāyatane viññāṇañcāyatanasaññī assa, na ākiñcaññāyatane ākiñcaññāyatanasaññī assa, na nevasaññānāsaññāyatane nevasaññānāsaññāyatanasaññī assa, na idhaloke idhalokasaññī assa, na paraloke paralokasaññī assa, yampidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā tatrāpi na saññī assa; saññī ca pana assā’’ti. Aṭṭhamaṃ.
Footnotes:
