| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. পঠমসমণব্রাহ্মণসুত্তং
5. Paṭhamasamaṇabrāhmaṇasuttaṃ
১০৭৫. ‘‘যে হি কেচি, ভিক্খৰে, অতীতমদ্ধানং সমণা ৰা ব্রাহ্মণা ৰা যথাভূতং অভিসম্বোজ্ঝিংসু, সব্বে তে চত্তারি অরিযসচ্চানি যথাভূতং অভিসম্বোজ্ঝিংসু। যে হি কেচি, ভিক্খৰে, অনাগতমদ্ধানং সমণা ৰা ব্রাহ্মণা ৰা যথাভূতং অভিসম্বোজ্ঝিস্সন্তি, সব্বে তে চত্তারি অরিযসচ্চানি যথাভূতং অভিসম্বোজ্ঝিস্সন্তি। যে হি কেচি, ভিক্খৰে, এতরহি সমণা ৰা ব্রাহ্মণা ৰা যথাভূতং অভিসম্বোজ্ঝন্তি, সব্বে তে চত্তারি অরিযসচ্চানি যথাভূতং অভিসম্বোজ্ঝন্তি।
1075. ‘‘Ye hi keci, bhikkhave, atītamaddhānaṃ samaṇā vā brāhmaṇā vā yathābhūtaṃ abhisambojjhiṃsu, sabbe te cattāri ariyasaccāni yathābhūtaṃ abhisambojjhiṃsu. Ye hi keci, bhikkhave, anāgatamaddhānaṃ samaṇā vā brāhmaṇā vā yathābhūtaṃ abhisambojjhissanti, sabbe te cattāri ariyasaccāni yathābhūtaṃ abhisambojjhissanti. Ye hi keci, bhikkhave, etarahi samaṇā vā brāhmaṇā vā yathābhūtaṃ abhisambojjhanti, sabbe te cattāri ariyasaccāni yathābhūtaṃ abhisambojjhanti.
‘‘কতমানি চত্তারি? দুক্খং অরিযসচ্চং…পে॰… দুক্খনিরোধগামিনী পটিপদা অরিযসচ্চং। যে হি কেচি, ভিক্খৰে, অতীতমদ্ধানং সমণা ৰা ব্রাহ্মণা ৰা যথাভূতং অভিসম্বোজ্ঝিংসু…পে॰… অভিসম্বোজ্ঝিস্সন্তি…পে॰… অভিসম্বোজ্ঝন্তি, সব্বে তে ইমানি চত্তারি অরিযসচ্চানি যথাভূতং অভিসম্বোজ্ঝন্তি।
‘‘Katamāni cattāri? Dukkhaṃ ariyasaccaṃ…pe… dukkhanirodhagāminī paṭipadā ariyasaccaṃ. Ye hi keci, bhikkhave, atītamaddhānaṃ samaṇā vā brāhmaṇā vā yathābhūtaṃ abhisambojjhiṃsu…pe… abhisambojjhissanti…pe… abhisambojjhanti, sabbe te imāni cattāri ariyasaccāni yathābhūtaṃ abhisambojjhanti.
‘‘তস্মাতিহ , ভিক্খৰে, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। পঞ্চমং।
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Pañcamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. পঠমকুলপুত্তসুত্তাদিৰণ্ণনা • 3. Paṭhamakulaputtasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. পঠমকুলপুত্তসুত্তাদিৰণ্ণনা • 3. Paṭhamakulaputtasuttādivaṇṇanā
