| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. பட²மஸம்ப³ஹுலஸுத்தங்
7. Paṭhamasambahulasuttaṃ
265. அத² கோ² ஸம்ப³ஹுலா பி⁴க்கூ² யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² தே பி⁴க்கூ² ப⁴க³வந்தங் ஏதத³வோசுங் – ‘‘கதமா நு கோ², ப⁴ந்தே, வேத³னா, கதமோ வேத³னாஸமுத³யோ, கதமோ வேத³னானிரோதோ⁴, கதமா வேத³னானிரோத⁴கா³மினீ படிபதா³? கோ வேத³னாய அஸ்ஸாதோ³, கோ ஆதீ³னவோ, கிங் நிஸ்ஸரண’’ந்தி? ‘‘திஸ்ஸோ இமா, பி⁴க்க²வே, வேத³னா – ஸுகா² வேத³னா, து³க்கா² வேத³னா, அது³க்க²மஸுகா² வேத³னா – இமா வுச்சந்தி, பி⁴க்க²வே, வேத³னா. ப²ஸ்ஸஸமுத³யா வேத³னாஸமுத³யோ; ப²ஸ்ஸனிரோதா⁴ வேத³னானிரோதோ⁴. அயமேவ அரியோ அட்ட²ங்கி³கோ மக்³கோ³ வேத³னானிரோத⁴கா³மினீ படிபதா³, ஸெய்யதி²த³ங் – ஸம்மாதி³ட்டி²…பே॰… ஸம்மாஸமாதி⁴. யங் வேத³னங் படிச்ச உப்பஜ்ஜதி ஸுக²ங் ஸோமனஸ்ஸங், அயங் வேத³னாய அஸ்ஸாதோ³. யா வேத³னா அனிச்சா து³க்கா² விபரிணாமத⁴ம்மா, அயங் வேத³னாய ஆதீ³னவோ. யோ வேத³னாய ச²ந்த³ராக³வினயோ ச²ந்த³ராக³ப்பஹானங், இத³ங் வேத³னாய நிஸ்ஸரணங்.
265. Atha kho sambahulā bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘katamā nu kho, bhante, vedanā, katamo vedanāsamudayo, katamo vedanānirodho, katamā vedanānirodhagāminī paṭipadā? Ko vedanāya assādo, ko ādīnavo, kiṃ nissaraṇa’’nti? ‘‘Tisso imā, bhikkhave, vedanā – sukhā vedanā, dukkhā vedanā, adukkhamasukhā vedanā – imā vuccanti, bhikkhave, vedanā. Phassasamudayā vedanāsamudayo; phassanirodhā vedanānirodho. Ayameva ariyo aṭṭhaṅgiko maggo vedanānirodhagāminī paṭipadā, seyyathidaṃ – sammādiṭṭhi…pe… sammāsamādhi. Yaṃ vedanaṃ paṭicca uppajjati sukhaṃ somanassaṃ, ayaṃ vedanāya assādo. Yā vedanā aniccā dukkhā vipariṇāmadhammā, ayaṃ vedanāya ādīnavo. Yo vedanāya chandarāgavinayo chandarāgappahānaṃ, idaṃ vedanāya nissaraṇaṃ.
‘‘அத² கோ² பன, பி⁴க்க²வே, மயா அனுபுப்³ப³ஸங்கா²ரானங் நிரோதோ⁴ அக்கா²தோ. பட²மங் ஜா²னங் ஸமாபன்னஸ்ஸ வாசா நிருத்³தா⁴ ஹோதி…பே॰… கீ²ணாஸவஸ்ஸ பி⁴க்கு²னோ ராகோ³ நிருத்³தோ⁴ ஹோதி, தோ³ஸோ நிருத்³தோ⁴ ஹோதி, மோஹோ நிருத்³தோ⁴ ஹோதி. அத² கோ² பன, பி⁴க்க²வே, மயா அனுபுப்³ப³ஸங்கா²ரானங் வூபஸமோ அக்கா²தோ. பட²மங் ஜா²னங் ஸமாபன்னஸ்ஸ வாசா வூபஸந்தா ஹோதி…பே॰… கீ²ணாஸவஸ்ஸ பி⁴க்கு²னோ ராகோ³ வூபஸந்தோ ஹோதி, தோ³ஸோ வூபஸந்தோ ஹோதி, மோஹோ வூபஸந்தோ ஹோதி. ச²யிமா, பி⁴க்க²வே, பஸ்ஸத்³தி⁴யோ. பட²மங் ஜா²னங் ஸமாபன்னஸ்ஸ வாசா படிப்பஸ்ஸத்³தா⁴ ஹோதி. து³தியங் ஜா²னங் ஸமாபன்னஸ்ஸ விதக்கவிசாரா படிப்பஸ்ஸத்³தா⁴ ஹொந்தி. ததியங் ஜா²னங் ஸமாபன்னஸ்ஸ பீதி படிப்பஸ்ஸத்³தா⁴ ஹோதி. சதுத்த²ங் ஜா²னங் ஸமாபன்னஸ்ஸ அஸ்ஸாஸபஸ்ஸாஸா படிப்பஸ்ஸத்³தா⁴ ஹொந்தி. ஸஞ்ஞாவேத³யிதனிரோத⁴ங் ஸமாபன்னஸ்ஸ ஸஞ்ஞா ச வேத³னா ச படிப்பஸ்ஸத்³தா⁴ ஹொந்தி. கீ²ணாஸவஸ்ஸ பி⁴க்கு²னோ ராகோ³ படிப்பஸ்ஸத்³தோ⁴ ஹோதி, தோ³ஸோ படிப்பஸ்ஸத்³தோ⁴ ஹோதி, மோஹோ படிப்பஸ்ஸத்³தோ⁴ ஹோதீ’’தி. ஸத்தமங்.
‘‘Atha kho pana, bhikkhave, mayā anupubbasaṅkhārānaṃ nirodho akkhāto. Paṭhamaṃ jhānaṃ samāpannassa vācā niruddhā hoti…pe… khīṇāsavassa bhikkhuno rāgo niruddho hoti, doso niruddho hoti, moho niruddho hoti. Atha kho pana, bhikkhave, mayā anupubbasaṅkhārānaṃ vūpasamo akkhāto. Paṭhamaṃ jhānaṃ samāpannassa vācā vūpasantā hoti…pe… khīṇāsavassa bhikkhuno rāgo vūpasanto hoti, doso vūpasanto hoti, moho vūpasanto hoti. Chayimā, bhikkhave, passaddhiyo. Paṭhamaṃ jhānaṃ samāpannassa vācā paṭippassaddhā hoti. Dutiyaṃ jhānaṃ samāpannassa vitakkavicārā paṭippassaddhā honti. Tatiyaṃ jhānaṃ samāpannassa pīti paṭippassaddhā hoti. Catutthaṃ jhānaṃ samāpannassa assāsapassāsā paṭippassaddhā honti. Saññāvedayitanirodhaṃ samāpannassa saññā ca vedanā ca paṭippassaddhā honti. Khīṇāsavassa bhikkhuno rāgo paṭippassaddho hoti, doso paṭippassaddho hoti, moho paṭippassaddho hotī’’ti. Sattamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5-8. பட²மஆனந்த³ஸுத்தாதி³வண்ணனா • 5-8. Paṭhamaānandasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5-8. பட²மஆனந்த³ஸுத்தாதி³வண்ணனா • 5-8. Paṭhamaānandasuttādivaṇṇanā
