| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. පඨමසංභෙජ්‌ජසුත්‌තං
3. Paṭhamasaṃbhejjasuttaṃ
1123. ‘‘සෙය්‍යථාපි , භික්‌ඛවෙ, යත්‌ථිමා මහානදියො සංසන්‌දන්‌ති සමෙන්‌ති, සෙය්‍යථිදං – ගඞ්‌ගා, යමුනා, අචිරවතී, සරභූ, මහී, තතො පුරිසො ද්‌වෙ වා තීණි වා උදකඵුසිතානි උද්‌ධරෙය්‍ය. තං කිං මඤ්‌ඤථ, භික්‌ඛවෙ කතමං නු ඛො බහුතරං – යානි ද්‌වෙ වා තීණි වා උදකඵුසිතානි උබ්‌භතානි, යං වා සංභෙජ්‌ජඋදක’’න්‌ති? ‘‘එතදෙව, භන්‌තෙ, බහුතරං, යදිදං – සංභෙජ්‌ජඋදකං; අප්‌පමත්‌තකානි ද්‌වෙ වා තීණි වා උදකඵුසිතානි උබ්‌භතානි. සඞ්‌ඛම්‌පි න උපෙන්‌ති , උපනිධම්‌පි න උපෙන්‌ති, කලභාගම්‌පි න උපෙන්‌ති සංභෙජ්‌ජඋදකං උපනිධාය ද්‌වෙ වා තීණි වා උදකඵුසිතානි උබ්‌භතානී’’ති. ‘‘එවමෙව ඛො, භික්‌ඛවෙ, අරියසාවකස්‌ස…පෙ.… යොගො කරණීයො’’ති. තතියං.
1123. ‘‘Seyyathāpi , bhikkhave, yatthimā mahānadiyo saṃsandanti samenti, seyyathidaṃ – gaṅgā, yamunā, aciravatī, sarabhū, mahī, tato puriso dve vā tīṇi vā udakaphusitāni uddhareyya. Taṃ kiṃ maññatha, bhikkhave katamaṃ nu kho bahutaraṃ – yāni dve vā tīṇi vā udakaphusitāni ubbhatāni, yaṃ vā saṃbhejjaudaka’’nti? ‘‘Etadeva, bhante, bahutaraṃ, yadidaṃ – saṃbhejjaudakaṃ; appamattakāni dve vā tīṇi vā udakaphusitāni ubbhatāni. Saṅkhampi na upenti , upanidhampi na upenti, kalabhāgampi na upenti saṃbhejjaudakaṃ upanidhāya dve vā tīṇi vā udakaphusitāni ubbhatānī’’ti. ‘‘Evameva kho, bhikkhave, ariyasāvakassa…pe… yogo karaṇīyo’’ti. Tatiyaṃ.
