| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. பட²மஸமித்³தி⁴மாரபஞ்ஹாஸுத்தங்
3. Paṭhamasamiddhimārapañhāsuttaṃ
65. ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² ஆயஸ்மா ஸமித்³தி⁴ யேன ப⁴க³வா…பே॰… ப⁴க³வந்தங் ஏதத³வோச – ‘‘‘மாரோ, மாரோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, மாரோ வா அஸ்ஸ மாரபஞ்ஞத்தி வா’’தி?
65. Ekaṃ samayaṃ bhagavā rājagahe viharati veḷuvane kalandakanivāpe. Atha kho āyasmā samiddhi yena bhagavā…pe… bhagavantaṃ etadavoca – ‘‘‘māro, māro’ti, bhante, vuccati. Kittāvatā nu kho, bhante, māro vā assa mārapaññatti vā’’ti?
‘‘யத்த² கோ², ஸமித்³தி⁴, அத்தி² சக்கு², அத்தி² ரூபா, அத்தி² சக்கு²விஞ்ஞாணங் , அத்தி² சக்கு²விஞ்ஞாணவிஞ்ஞாதப்³பா³ த⁴ம்மா, அத்தி² தத்த² மாரோ வா மாரபஞ்ஞத்தி வா. அத்தி² ஸோதங், அத்தி² ஸத்³தா³, அத்தி² ஸோதவிஞ்ஞாணங், அத்தி² ஸோதவிஞ்ஞாணவிஞ்ஞாதப்³பா³ த⁴ம்மா, அத்தி² தத்த² மாரோ வா மாரபஞ்ஞத்தி வா. அத்தி² கா⁴னங், அத்தி² க³ந்தா⁴, அத்தி² கா⁴னவிஞ்ஞாணங், அத்தி² கா⁴னவிஞ்ஞாணவிஞ்ஞாதப்³பா³ த⁴ம்மா, அத்தி² தத்த² மாரோ வா மாரபஞ்ஞத்தி வா. அத்தி² ஜிவ்ஹா, அத்தி² ரஸா, அத்தி² ஜிவ்ஹாவிஞ்ஞாணங், அத்தி² ஜிவ்ஹாவிஞ்ஞாணவிஞ்ஞாதப்³பா³ த⁴ம்மா, அத்தி² தத்த² மாரோ வா மாரபஞ்ஞத்தி வா. அத்தி² காயோ, அத்தி² பொ²ட்ட²ப்³பா³, அத்தி² காயவிஞ்ஞாணங், அத்தி² காயவிஞ்ஞாணவிஞ்ஞாதப்³பா³ த⁴ம்மா, அத்தி² தத்த² மாரோ வா மாரபஞ்ஞத்தி வா. அத்தி² மனோ, அத்தி² த⁴ம்மா, அத்தி² மனோவிஞ்ஞாணங், அத்தி² மனோவிஞ்ஞாணவிஞ்ஞாதப்³பா³ த⁴ம்மா, அத்தி² தத்த² மாரோ வா மாரபஞ்ஞத்தி வா.
‘‘Yattha kho, samiddhi, atthi cakkhu, atthi rūpā, atthi cakkhuviññāṇaṃ , atthi cakkhuviññāṇaviññātabbā dhammā, atthi tattha māro vā mārapaññatti vā. Atthi sotaṃ, atthi saddā, atthi sotaviññāṇaṃ, atthi sotaviññāṇaviññātabbā dhammā, atthi tattha māro vā mārapaññatti vā. Atthi ghānaṃ, atthi gandhā, atthi ghānaviññāṇaṃ, atthi ghānaviññāṇaviññātabbā dhammā, atthi tattha māro vā mārapaññatti vā. Atthi jivhā, atthi rasā, atthi jivhāviññāṇaṃ, atthi jivhāviññāṇaviññātabbā dhammā, atthi tattha māro vā mārapaññatti vā. Atthi kāyo, atthi phoṭṭhabbā, atthi kāyaviññāṇaṃ, atthi kāyaviññāṇaviññātabbā dhammā, atthi tattha māro vā mārapaññatti vā. Atthi mano, atthi dhammā, atthi manoviññāṇaṃ, atthi manoviññāṇaviññātabbā dhammā, atthi tattha māro vā mārapaññatti vā.
‘‘யத்த² ச கோ², ஸமித்³தி⁴, நத்தி² சக்கு², நத்தி² ரூபா, நத்தி² சக்கு²விஞ்ஞாணங், நத்தி² சக்கு²விஞ்ஞாணவிஞ்ஞாதப்³பா³ த⁴ம்மா, நத்தி² தத்த² மாரோ வா மாரபஞ்ஞத்தி வா. நத்தி² ஸோதங்…பே॰… நத்தி² கா⁴னங்…பே॰… நத்தி² ஜிவ்ஹா, நத்தி² ரஸா, நத்தி² ஜிவ்ஹாவிஞ்ஞாணங், நத்தி² ஜிவ்ஹாவிஞ்ஞாணவிஞ்ஞாதப்³பா³ த⁴ம்மா, நத்தி² தத்த² மாரோ வா மாரபஞ்ஞத்தி வா. நத்தி² காயோ…பே॰…. நத்தி² மனோ, நத்தி² த⁴ம்மா, நத்தி² மனோவிஞ்ஞாணங், நத்தி² மனோவிஞ்ஞாணவிஞ்ஞாதப்³பா³ த⁴ம்மா, நத்தி² தத்த² மாரோ வா மாரபஞ்ஞத்தி வா’’தி. ததியங்.
‘‘Yattha ca kho, samiddhi, natthi cakkhu, natthi rūpā, natthi cakkhuviññāṇaṃ, natthi cakkhuviññāṇaviññātabbā dhammā, natthi tattha māro vā mārapaññatti vā. Natthi sotaṃ…pe… natthi ghānaṃ…pe… natthi jivhā, natthi rasā, natthi jivhāviññāṇaṃ, natthi jivhāviññāṇaviññātabbā dhammā, natthi tattha māro vā mārapaññatti vā. Natthi kāyo…pe…. Natthi mano, natthi dhammā, natthi manoviññāṇaṃ, natthi manoviññāṇaviññātabbā dhammā, natthi tattha māro vā mārapaññatti vā’’ti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3-5. பட²மஸமித்³தி⁴மாரபஞ்ஹாஸுத்தாதி³வண்ணனா • 3-5. Paṭhamasamiddhimārapañhāsuttādivaṇṇanā
