| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. পঠমসমিদ্ধিমারপঞ্হাসুত্তং
3. Paṭhamasamiddhimārapañhāsuttaṃ
৬৫. একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে। অথ খো আযস্মা সমিদ্ধি যেন ভগৰা…পে॰… ভগৰন্তং এতদৰোচ – ‘‘‘মারো, মারো’তি, ভন্তে, ৰুচ্চতি। কিত্তাৰতা নু খো, ভন্তে, মারো ৰা অস্স মারপঞ্ঞত্তি ৰা’’তি?
65. Ekaṃ samayaṃ bhagavā rājagahe viharati veḷuvane kalandakanivāpe. Atha kho āyasmā samiddhi yena bhagavā…pe… bhagavantaṃ etadavoca – ‘‘‘māro, māro’ti, bhante, vuccati. Kittāvatā nu kho, bhante, māro vā assa mārapaññatti vā’’ti?
‘‘যত্থ খো, সমিদ্ধি, অত্থি চক্খু, অত্থি রূপা, অত্থি চক্খুৰিঞ্ঞাণং , অত্থি চক্খুৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা। অত্থি সোতং, অত্থি সদ্দা, অত্থি সোতৰিঞ্ঞাণং, অত্থি সোতৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা। অত্থি ঘানং, অত্থি গন্ধা, অত্থি ঘানৰিঞ্ঞাণং, অত্থি ঘানৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা। অত্থি জিৰ্হা, অত্থি রসা, অত্থি জিৰ্হাৰিঞ্ঞাণং, অত্থি জিৰ্হাৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা। অত্থি কাযো, অত্থি ফোট্ঠব্বা, অত্থি কাযৰিঞ্ঞাণং, অত্থি কাযৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা। অত্থি মনো, অত্থি ধম্মা, অত্থি মনোৰিঞ্ঞাণং, অত্থি মনোৰিঞ্ঞাণৰিঞ্ঞাতব্বা ধম্মা, অত্থি তত্থ মারো ৰা মারপঞ্ঞত্তি ৰা।
‘‘Yattha kho, samiddhi, atthi cakkhu, atthi rūpā, atthi cakkhuviññāṇaṃ , atthi cakkhuviññāṇaviññātabbā dhammā, atthi tattha māro vā mārapaññatti vā. Atthi sotaṃ, atthi saddā, atthi sotaviññāṇaṃ, atthi sotaviññāṇaviññātabbā dhammā, atthi tattha māro vā mārapaññatti vā. Atthi ghānaṃ, atthi gandhā, atthi ghānaviññāṇaṃ, atthi ghānaviññāṇaviññātabbā dhammā, atthi tattha māro vā mārapaññatti vā. Atthi jivhā, atthi rasā, atthi jivhāviññāṇaṃ, atthi jivhāviññāṇaviññātabbā dhammā, atthi tattha māro vā mārapaññatti vā. Atthi kāyo, atthi phoṭṭhabbā, atthi kāyaviññāṇaṃ, atthi kāyaviññāṇaviññātabbā dhammā, atthi tattha māro vā mārapaññatti vā. Atthi mano, atthi dhammā, atthi manoviññāṇaṃ, atthi manoviññāṇaviññātabbā dhammā, atthi tattha māro vā mārapaññatti vā.
‘‘যত্থ চ খো, সমিদ্ধি, নত্থি চক্খু, নত্থি রূপা, নত্থি চক্খুৰিঞ্ঞাণং, নত্থি চক্খুৰিঞ্ঞাণৰিঞ্ঞাতব্বা ধম্মা, নত্থি তত্থ মারো ৰা মারপঞ্ঞত্তি ৰা। নত্থি সোতং…পে॰… নত্থি ঘানং…পে॰… নত্থি জিৰ্হা, নত্থি রসা, নত্থি জিৰ্হাৰিঞ্ঞাণং, নত্থি জিৰ্হাৰিঞ্ঞাণৰিঞ্ঞাতব্বা ধম্মা, নত্থি তত্থ মারো ৰা মারপঞ্ঞত্তি ৰা। নত্থি কাযো…পে॰…। নত্থি মনো, নত্থি ধম্মা, নত্থি মনোৰিঞ্ঞাণং, নত্থি মনোৰিঞ্ঞাণৰিঞ্ঞাতব্বা ধম্মা, নত্থি তত্থ মারো ৰা মারপঞ্ঞত্তি ৰা’’তি। ততিযং।
‘‘Yattha ca kho, samiddhi, natthi cakkhu, natthi rūpā, natthi cakkhuviññāṇaṃ, natthi cakkhuviññāṇaviññātabbā dhammā, natthi tattha māro vā mārapaññatti vā. Natthi sotaṃ…pe… natthi ghānaṃ…pe… natthi jivhā, natthi rasā, natthi jivhāviññāṇaṃ, natthi jivhāviññāṇaviññātabbā dhammā, natthi tattha māro vā mārapaññatti vā. Natthi kāyo…pe…. Natthi mano, natthi dhammā, natthi manoviññāṇaṃ, natthi manoviññāṇaviññātabbā dhammā, natthi tattha māro vā mārapaññatti vā’’ti. Tatiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩-৫. পঠমসমিদ্ধিমারপঞ্হাসুত্তাদিৰণ্ণনা • 3-5. Paṭhamasamiddhimārapañhāsuttādivaṇṇanā
