| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៣. បឋមសមិទ្ធិមារបញ្ហាសុត្តំ
3. Paṭhamasamiddhimārapañhāsuttaṃ
៦៥. ឯកំ សមយំ ភគវា រាជគហេ វិហរតិ វេឡុវនេ កលន្ទកនិវាបេ។ អថ ខោ អាយស្មា សមិទ្ធិ យេន ភគវា…បេ.… ភគវន្តំ ឯតទវោច – ‘‘‘មារោ, មារោ’តិ, ភន្តេ, វុច្ចតិ។ កិត្តាវតា នុ ខោ, ភន្តេ, មារោ វា អស្ស មារបញ្ញត្តិ វា’’តិ?
65. Ekaṃ samayaṃ bhagavā rājagahe viharati veḷuvane kalandakanivāpe. Atha kho āyasmā samiddhi yena bhagavā…pe… bhagavantaṃ etadavoca – ‘‘‘māro, māro’ti, bhante, vuccati. Kittāvatā nu kho, bhante, māro vā assa mārapaññatti vā’’ti?
‘‘យត្ថ ខោ, សមិទ្ធិ, អត្ថិ ចក្ខុ, អត្ថិ រូបា, អត្ថិ ចក្ខុវិញ្ញាណំ , អត្ថិ ចក្ខុវិញ្ញាណវិញ្ញាតព្ពា ធម្មា, អត្ថិ តត្ថ មារោ វា មារបញ្ញត្តិ វា។ អត្ថិ សោតំ, អត្ថិ សទ្ទា, អត្ថិ សោតវិញ្ញាណំ, អត្ថិ សោតវិញ្ញាណវិញ្ញាតព្ពា ធម្មា, អត្ថិ តត្ថ មារោ វា មារបញ្ញត្តិ វា។ អត្ថិ ឃានំ, អត្ថិ គន្ធា, អត្ថិ ឃានវិញ្ញាណំ, អត្ថិ ឃានវិញ្ញាណវិញ្ញាតព្ពា ធម្មា, អត្ថិ តត្ថ មារោ វា មារបញ្ញត្តិ វា។ អត្ថិ ជិវ្ហា, អត្ថិ រសា, អត្ថិ ជិវ្ហាវិញ្ញាណំ, អត្ថិ ជិវ្ហាវិញ្ញាណវិញ្ញាតព្ពា ធម្មា, អត្ថិ តត្ថ មារោ វា មារបញ្ញត្តិ វា។ អត្ថិ កាយោ, អត្ថិ ផោដ្ឋព្ពា, អត្ថិ កាយវិញ្ញាណំ, អត្ថិ កាយវិញ្ញាណវិញ្ញាតព្ពា ធម្មា, អត្ថិ តត្ថ មារោ វា មារបញ្ញត្តិ វា។ អត្ថិ មនោ, អត្ថិ ធម្មា, អត្ថិ មនោវិញ្ញាណំ, អត្ថិ មនោវិញ្ញាណវិញ្ញាតព្ពា ធម្មា, អត្ថិ តត្ថ មារោ វា មារបញ្ញត្តិ វា។
‘‘Yattha kho, samiddhi, atthi cakkhu, atthi rūpā, atthi cakkhuviññāṇaṃ , atthi cakkhuviññāṇaviññātabbā dhammā, atthi tattha māro vā mārapaññatti vā. Atthi sotaṃ, atthi saddā, atthi sotaviññāṇaṃ, atthi sotaviññāṇaviññātabbā dhammā, atthi tattha māro vā mārapaññatti vā. Atthi ghānaṃ, atthi gandhā, atthi ghānaviññāṇaṃ, atthi ghānaviññāṇaviññātabbā dhammā, atthi tattha māro vā mārapaññatti vā. Atthi jivhā, atthi rasā, atthi jivhāviññāṇaṃ, atthi jivhāviññāṇaviññātabbā dhammā, atthi tattha māro vā mārapaññatti vā. Atthi kāyo, atthi phoṭṭhabbā, atthi kāyaviññāṇaṃ, atthi kāyaviññāṇaviññātabbā dhammā, atthi tattha māro vā mārapaññatti vā. Atthi mano, atthi dhammā, atthi manoviññāṇaṃ, atthi manoviññāṇaviññātabbā dhammā, atthi tattha māro vā mārapaññatti vā.
‘‘យត្ថ ច ខោ, សមិទ្ធិ, នត្ថិ ចក្ខុ, នត្ថិ រូបា, នត្ថិ ចក្ខុវិញ្ញាណំ, នត្ថិ ចក្ខុវិញ្ញាណវិញ្ញាតព្ពា ធម្មា, នត្ថិ តត្ថ មារោ វា មារបញ្ញត្តិ វា។ នត្ថិ សោតំ…បេ.… នត្ថិ ឃានំ…បេ.… នត្ថិ ជិវ្ហា, នត្ថិ រសា, នត្ថិ ជិវ្ហាវិញ្ញាណំ, នត្ថិ ជិវ្ហាវិញ្ញាណវិញ្ញាតព្ពា ធម្មា, នត្ថិ តត្ថ មារោ វា មារបញ្ញត្តិ វា។ នត្ថិ កាយោ…បេ.…។ នត្ថិ មនោ, នត្ថិ ធម្មា, នត្ថិ មនោវិញ្ញាណំ, នត្ថិ មនោវិញ្ញាណវិញ្ញាតព្ពា ធម្មា, នត្ថិ តត្ថ មារោ វា មារបញ្ញត្តិ វា’’តិ។ តតិយំ។
‘‘Yattha ca kho, samiddhi, natthi cakkhu, natthi rūpā, natthi cakkhuviññāṇaṃ, natthi cakkhuviññāṇaviññātabbā dhammā, natthi tattha māro vā mārapaññatti vā. Natthi sotaṃ…pe… natthi ghānaṃ…pe… natthi jivhā, natthi rasā, natthi jivhāviññāṇaṃ, natthi jivhāviññāṇaviññātabbā dhammā, natthi tattha māro vā mārapaññatti vā. Natthi kāyo…pe…. Natthi mano, natthi dhammā, natthi manoviññāṇaṃ, natthi manoviññāṇaviññātabbā dhammā, natthi tattha māro vā mārapaññatti vā’’ti. Tatiyaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៣-៥. បឋមសមិទ្ធិមារបញ្ហាសុត្តាទិវណ្ណនា • 3-5. Paṭhamasamiddhimārapañhāsuttādivaṇṇanā
