| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. පඨමසමිද්‌ධිමාරපඤ්‌හාසුත්‌තං
3. Paṭhamasamiddhimārapañhāsuttaṃ
65. එකං සමයං භගවා රාජගහෙ විහරති වෙළුවනෙ කලන්‌දකනිවාපෙ. අථ ඛො ආයස්‌මා සමිද්‌ධි යෙන භගවා…පෙ.… භගවන්‌තං එතදවොච – ‘‘‘මාරො, මාරො’ති, භන්‌තෙ, වුච්‌චති. කිත්‌තාවතා නු ඛො, භන්‌තෙ, මාරො වා අස්‌ස මාරපඤ්‌ඤත්‌ති වා’’ති?
65. Ekaṃ samayaṃ bhagavā rājagahe viharati veḷuvane kalandakanivāpe. Atha kho āyasmā samiddhi yena bhagavā…pe… bhagavantaṃ etadavoca – ‘‘‘māro, māro’ti, bhante, vuccati. Kittāvatā nu kho, bhante, māro vā assa mārapaññatti vā’’ti?
‘‘යත්‌ථ ඛො, සමිද්‌ධි, අත්‌ථි චක්‌ඛු, අත්‌ථි රූපා, අත්‌ථි චක්‌ඛුවිඤ්‌ඤාණං , අත්‌ථි චක්‌ඛුවිඤ්‌ඤාණවිඤ්‌ඤාතබ්‌බා ධම්‌මා, අත්‌ථි තත්‌ථ මාරො වා මාරපඤ්‌ඤත්‌ති වා. අත්‌ථි සොතං, අත්‌ථි සද්‌දා, අත්‌ථි සොතවිඤ්‌ඤාණං, අත්‌ථි සොතවිඤ්‌ඤාණවිඤ්‌ඤාතබ්‌බා ධම්‌මා, අත්‌ථි තත්‌ථ මාරො වා මාරපඤ්‌ඤත්‌ති වා. අත්‌ථි ඝානං, අත්‌ථි ගන්‌ධා, අත්‌ථි ඝානවිඤ්‌ඤාණං, අත්‌ථි ඝානවිඤ්‌ඤාණවිඤ්‌ඤාතබ්‌බා ධම්‌මා, අත්‌ථි තත්‌ථ මාරො වා මාරපඤ්‌ඤත්‌ති වා. අත්‌ථි ජිව්‌හා, අත්‌ථි රසා, අත්‌ථි ජිව්‌හාවිඤ්‌ඤාණං, අත්‌ථි ජිව්‌හාවිඤ්‌ඤාණවිඤ්‌ඤාතබ්‌බා ධම්‌මා, අත්‌ථි තත්‌ථ මාරො වා මාරපඤ්‌ඤත්‌ති වා. අත්‌ථි කායො, අත්‌ථි ඵොට්‌ඨබ්‌බා, අත්‌ථි කායවිඤ්‌ඤාණං, අත්‌ථි කායවිඤ්‌ඤාණවිඤ්‌ඤාතබ්‌බා ධම්‌මා, අත්‌ථි තත්‌ථ මාරො වා මාරපඤ්‌ඤත්‌ති වා. අත්‌ථි මනො, අත්‌ථි ධම්‌මා, අත්‌ථි මනොවිඤ්‌ඤාණං, අත්‌ථි මනොවිඤ්‌ඤාණවිඤ්‌ඤාතබ්‌බා ධම්‌මා, අත්‌ථි තත්‌ථ මාරො වා මාරපඤ්‌ඤත්‌ති වා.
‘‘Yattha kho, samiddhi, atthi cakkhu, atthi rūpā, atthi cakkhuviññāṇaṃ , atthi cakkhuviññāṇaviññātabbā dhammā, atthi tattha māro vā mārapaññatti vā. Atthi sotaṃ, atthi saddā, atthi sotaviññāṇaṃ, atthi sotaviññāṇaviññātabbā dhammā, atthi tattha māro vā mārapaññatti vā. Atthi ghānaṃ, atthi gandhā, atthi ghānaviññāṇaṃ, atthi ghānaviññāṇaviññātabbā dhammā, atthi tattha māro vā mārapaññatti vā. Atthi jivhā, atthi rasā, atthi jivhāviññāṇaṃ, atthi jivhāviññāṇaviññātabbā dhammā, atthi tattha māro vā mārapaññatti vā. Atthi kāyo, atthi phoṭṭhabbā, atthi kāyaviññāṇaṃ, atthi kāyaviññāṇaviññātabbā dhammā, atthi tattha māro vā mārapaññatti vā. Atthi mano, atthi dhammā, atthi manoviññāṇaṃ, atthi manoviññāṇaviññātabbā dhammā, atthi tattha māro vā mārapaññatti vā.
‘‘යත්‌ථ ච ඛො, සමිද්‌ධි, නත්‌ථි චක්‌ඛු, නත්‌ථි රූපා, නත්‌ථි චක්‌ඛුවිඤ්‌ඤාණං, නත්‌ථි චක්‌ඛුවිඤ්‌ඤාණවිඤ්‌ඤාතබ්‌බා ධම්‌මා, නත්‌ථි තත්‌ථ මාරො වා මාරපඤ්‌ඤත්‌ති වා. නත්‌ථි සොතං…පෙ.… නත්‌ථි ඝානං…පෙ.… නත්‌ථි ජිව්‌හා, නත්‌ථි රසා, නත්‌ථි ජිව්‌හාවිඤ්‌ඤාණං, නත්‌ථි ජිව්‌හාවිඤ්‌ඤාණවිඤ්‌ඤාතබ්‌බා ධම්‌මා, නත්‌ථි තත්‌ථ මාරො වා මාරපඤ්‌ඤත්‌ති වා. නත්‌ථි කායො…පෙ.…. නත්‌ථි මනො, නත්‌ථි ධම්‌මා, නත්‌ථි මනොවිඤ්‌ඤාණං, නත්‌ථි මනොවිඤ්‌ඤාණවිඤ්‌ඤාතබ්‌බා ධම්‌මා, නත්‌ථි තත්‌ථ මාරො වා මාරපඤ්‌ඤත්‌ති වා’’ති. තතියං.
‘‘Yattha ca kho, samiddhi, natthi cakkhu, natthi rūpā, natthi cakkhuviññāṇaṃ, natthi cakkhuviññāṇaviññātabbā dhammā, natthi tattha māro vā mārapaññatti vā. Natthi sotaṃ…pe… natthi ghānaṃ…pe… natthi jivhā, natthi rasā, natthi jivhāviññāṇaṃ, natthi jivhāviññāṇaviññātabbā dhammā, natthi tattha māro vā mārapaññatti vā. Natthi kāyo…pe…. Natthi mano, natthi dhammā, natthi manoviññāṇaṃ, natthi manoviññāṇaviññātabbā dhammā, natthi tattha māro vā mārapaññatti vā’’ti. Tatiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3-5. පඨමසමිද්‌ධිමාරපඤ්‌හාසුත්‌තාදිවණ්‌ණනා • 3-5. Paṭhamasamiddhimārapañhāsuttādivaṇṇanā
