| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. பட²மஸங்கி²த்தஸுத்தவண்ணனா
2. Paṭhamasaṃkhittasuttavaṇṇanā
482. து³தியே ததோதி விபஸ்ஸனாமக்³க³ப²லவஸேன நிஸ்ஸக்கங் வேதி³தப்³ப³ங். ஸமத்தாநி ஹி பரிபுண்ணானி பஞ்சிந்த்³ரியானி அரஹத்தமக்³க³ஸ்ஸ விபஸ்ஸனிந்த்³ரியானி நாம ஹொந்தி. ததோ முது³தரேஹீதி தேஹி அரஹத்தமக்³க³ஸ்ஸ விபஸ்ஸனிந்த்³ரியேஹி முது³தரானி அனாகா³மிமக்³க³ஸ்ஸ விபஸ்ஸனிந்த்³ரியானி நாம ஹொந்தி, ததோ முது³தரானி ஸகதா³கா³மிமக்³க³ஸ்ஸ, ததோ முது³தரானி ஸோதாபத்திமக்³க³ஸ்ஸ விபஸ்ஸனிந்த்³ரியானி நாம ஹொந்தி, ததோ முது³தரானி த⁴ம்மானுஸாரிமக்³க³ஸ்ஸ, ததோ முது³தரானி ஸத்³தா⁴னுஸாரிமக்³க³ஸ்ஸ விபஸ்ஸனிந்த்³ரியானி நாம ஹொந்தி.
482. Dutiye tatoti vipassanāmaggaphalavasena nissakkaṃ veditabbaṃ. Samattāni hi paripuṇṇāni pañcindriyāni arahattamaggassa vipassanindriyāni nāma honti. Tato mudutarehīti tehi arahattamaggassa vipassanindriyehi mudutarāni anāgāmimaggassa vipassanindriyāni nāma honti, tato mudutarāni sakadāgāmimaggassa, tato mudutarāni sotāpattimaggassa vipassanindriyāni nāma honti, tato mudutarāni dhammānusārimaggassa, tato mudutarāni saddhānusārimaggassa vipassanindriyāni nāma honti.
ததா² ஸமத்தானி பரிபுண்ணானி பஞ்சிந்த்³ரியானி அரஹத்தமக்³கி³ந்த்³ரியானி நாம ஹொந்தி, ததோ முது³தரானி அனாகா³மிமக்³கி³ந்த்³ரியானி நாம ஹொந்தி, ததோ முது³தரானி ஸகதா³கா³மிமக்³கி³ந்த்³ரியானி நாம ஹொந்தி, ததோ முது³தரானி ஸோதாபத்திமக்³கி³ந்த்³ரியானி நாம ஹொந்தி, ததோ முது³தரானி த⁴ம்மானுஸாரிமக்³கி³ந்த்³ரியானி, ததோ முது³தரானி ஸத்³தா⁴னுஸாரிமக்³கி³ந்த்³ரியானி நாம ஹொந்தி.
Tathā samattāni paripuṇṇāni pañcindriyāni arahattamaggindriyāni nāma honti, tato mudutarāni anāgāmimaggindriyāni nāma honti, tato mudutarāni sakadāgāmimaggindriyāni nāma honti, tato mudutarāni sotāpattimaggindriyāni nāma honti, tato mudutarāni dhammānusārimaggindriyāni, tato mudutarāni saddhānusārimaggindriyāni nāma honti.
ஸமத்தானி பரிபுண்ணானி பஞ்சிந்த்³ரியானி அரஹத்தப²லிந்த்³ரியானி நாம ஹொந்தி, ததோ முது³தரானி அனாகா³மிப²லிந்த்³ரியானி, ததோ முது³தரானி ஸகதா³கா³மிப²லிந்த்³ரியானி, ததோ முது³தரானி ஸோதாபத்திப²லிந்த்³ரியானி நாம ஹொந்தி. த⁴ம்மானுஸாரிஸத்³தா⁴னுஸாரினோ பன த்³வேபி ஸோதாபத்திமக்³க³ட்ட²புக்³க³லா, மக்³க³ட்ட²புக்³க³லவஸேன நேஸங் நானத்தங் ஜாதந்தி ஆக³மனேனபி மக்³கே³னபி. ஸத்³தா⁴னுஸாரீ புக்³க³லோ ஹி உத்³தி³ஸாபெந்தோ பரிபுச்ச²ந்தோ அனுபுப்³பே³ன மக்³க³ங் பாபுணாதி, த⁴ம்மானுஸாரீ ஏகேன வா த்³வீஹி வா ஸவனேஹி. ஏவங் தாவ நேஸங் ஆக³மனேன நானத்தங் வேதி³தப்³ப³ங்.
Samattāni paripuṇṇāni pañcindriyāni arahattaphalindriyāni nāma honti, tato mudutarāni anāgāmiphalindriyāni, tato mudutarāni sakadāgāmiphalindriyāni, tato mudutarāni sotāpattiphalindriyāni nāma honti. Dhammānusārisaddhānusārino pana dvepi sotāpattimaggaṭṭhapuggalā, maggaṭṭhapuggalavasena nesaṃ nānattaṃ jātanti āgamanenapi maggenapi. Saddhānusārī puggalo hi uddisāpento paripucchanto anupubbena maggaṃ pāpuṇāti, dhammānusārī ekena vā dvīhi vā savanehi. Evaṃ tāva nesaṃ āgamanena nānattaṃ veditabbaṃ.
த⁴ம்மானுஸாரிஸ்ஸ பன மக்³கோ³ திக்கோ² ஹோதி, ஸூரங் ஞாணங் வஹதி, அஸங்கா²ரேன அப்பயோகே³ன கிலேஸே சி²ந்த³தி கத³லிக்க²ந்த⁴ங் விய திகி²ணா அஸிதா⁴ரா. ஸத்³தா⁴னுஸாரிஸ்ஸ ந தஸ்ஸ விய மக்³கோ³ திக்கோ² ஹோதி, ந ஸூரங் ஞாணங் வஹதி, ஸஸங்கா²ரேன ஸப்பயோகே³ன கிலேஸே சி²ந்த³தி கத³லிக்க²ந்த⁴ங் விய அதிகி²ணா அஸிதா⁴ரா. கிலேஸக்க²யே பன தேஸங் நானத்தங் நத்தி². அவஸேஸா ச கிலேஸா கீ²யந்தி.
Dhammānusārissa pana maggo tikkho hoti, sūraṃ ñāṇaṃ vahati, asaṅkhārena appayogena kilese chindati kadalikkhandhaṃ viya tikhiṇā asidhārā. Saddhānusārissa na tassa viya maggo tikkho hoti, na sūraṃ ñāṇaṃ vahati, sasaṅkhārena sappayogena kilese chindati kadalikkhandhaṃ viya atikhiṇā asidhārā. Kilesakkhaye pana tesaṃ nānattaṃ natthi. Avasesā ca kilesā khīyanti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. பட²மஸங்கி²த்தஸுத்தங் • 2. Paṭhamasaṃkhittasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. பட²மஸங்கி²த்தஸுத்தவண்ணனா • 2. Paṭhamasaṃkhittasuttavaṇṇanā
