| Library / Tipiṭaka / तिपिटक • Tipiṭaka / संयुत्तनिकाय (अट्ठकथा) • Saṃyuttanikāya (aṭṭhakathā) |
२. पठमसंखित्तसुत्तवण्णना
2. Paṭhamasaṃkhittasuttavaṇṇanā
४८२. दुतिये ततोति विपस्सनामग्गफलवसेन निस्सक्कं वेदितब्बं। समत्तानि हि परिपुण्णानि पञ्चिन्द्रियानि अरहत्तमग्गस्स विपस्सनिन्द्रियानि नाम होन्ति। ततो मुदुतरेहीति तेहि अरहत्तमग्गस्स विपस्सनिन्द्रियेहि मुदुतरानि अनागामिमग्गस्स विपस्सनिन्द्रियानि नाम होन्ति, ततो मुदुतरानि सकदागामिमग्गस्स, ततो मुदुतरानि सोतापत्तिमग्गस्स विपस्सनिन्द्रियानि नाम होन्ति, ततो मुदुतरानि धम्मानुसारिमग्गस्स, ततो मुदुतरानि सद्धानुसारिमग्गस्स विपस्सनिन्द्रियानि नाम होन्ति।
482. Dutiye tatoti vipassanāmaggaphalavasena nissakkaṃ veditabbaṃ. Samattāni hi paripuṇṇāni pañcindriyāni arahattamaggassa vipassanindriyāni nāma honti. Tato mudutarehīti tehi arahattamaggassa vipassanindriyehi mudutarāni anāgāmimaggassa vipassanindriyāni nāma honti, tato mudutarāni sakadāgāmimaggassa, tato mudutarāni sotāpattimaggassa vipassanindriyāni nāma honti, tato mudutarāni dhammānusārimaggassa, tato mudutarāni saddhānusārimaggassa vipassanindriyāni nāma honti.
तथा समत्तानि परिपुण्णानि पञ्चिन्द्रियानि अरहत्तमग्गिन्द्रियानि नाम होन्ति, ततो मुदुतरानि अनागामिमग्गिन्द्रियानि नाम होन्ति, ततो मुदुतरानि सकदागामिमग्गिन्द्रियानि नाम होन्ति, ततो मुदुतरानि सोतापत्तिमग्गिन्द्रियानि नाम होन्ति, ततो मुदुतरानि धम्मानुसारिमग्गिन्द्रियानि, ततो मुदुतरानि सद्धानुसारिमग्गिन्द्रियानि नाम होन्ति।
Tathā samattāni paripuṇṇāni pañcindriyāni arahattamaggindriyāni nāma honti, tato mudutarāni anāgāmimaggindriyāni nāma honti, tato mudutarāni sakadāgāmimaggindriyāni nāma honti, tato mudutarāni sotāpattimaggindriyāni nāma honti, tato mudutarāni dhammānusārimaggindriyāni, tato mudutarāni saddhānusārimaggindriyāni nāma honti.
समत्तानि परिपुण्णानि पञ्चिन्द्रियानि अरहत्तफलिन्द्रियानि नाम होन्ति, ततो मुदुतरानि अनागामिफलिन्द्रियानि, ततो मुदुतरानि सकदागामिफलिन्द्रियानि, ततो मुदुतरानि सोतापत्तिफलिन्द्रियानि नाम होन्ति। धम्मानुसारिसद्धानुसारिनो पन द्वेपि सोतापत्तिमग्गट्ठपुग्गला, मग्गट्ठपुग्गलवसेन नेसं नानत्तं जातन्ति आगमनेनपि मग्गेनपि। सद्धानुसारी पुग्गलो हि उद्दिसापेन्तो परिपुच्छन्तो अनुपुब्बेन मग्गं पापुणाति, धम्मानुसारी एकेन वा द्वीहि वा सवनेहि। एवं ताव नेसं आगमनेन नानत्तं वेदितब्बं।
Samattāni paripuṇṇāni pañcindriyāni arahattaphalindriyāni nāma honti, tato mudutarāni anāgāmiphalindriyāni, tato mudutarāni sakadāgāmiphalindriyāni, tato mudutarāni sotāpattiphalindriyāni nāma honti. Dhammānusārisaddhānusārino pana dvepi sotāpattimaggaṭṭhapuggalā, maggaṭṭhapuggalavasena nesaṃ nānattaṃ jātanti āgamanenapi maggenapi. Saddhānusārī puggalo hi uddisāpento paripucchanto anupubbena maggaṃ pāpuṇāti, dhammānusārī ekena vā dvīhi vā savanehi. Evaṃ tāva nesaṃ āgamanena nānattaṃ veditabbaṃ.
धम्मानुसारिस्स पन मग्गो तिक्खो होति, सूरं ञाणं वहति, असङ्खारेन अप्पयोगेन किलेसे छिन्दति कदलिक्खन्धं विय तिखिणा असिधारा। सद्धानुसारिस्स न तस्स विय मग्गो तिक्खो होति, न सूरं ञाणं वहति, ससङ्खारेन सप्पयोगेन किलेसे छिन्दति कदलिक्खन्धं विय अतिखिणा असिधारा। किलेसक्खये पन तेसं नानत्तं नत्थि। अवसेसा च किलेसा खीयन्ति।
Dhammānusārissa pana maggo tikkho hoti, sūraṃ ñāṇaṃ vahati, asaṅkhārena appayogena kilese chindati kadalikkhandhaṃ viya tikhiṇā asidhārā. Saddhānusārissa na tassa viya maggo tikkho hoti, na sūraṃ ñāṇaṃ vahati, sasaṅkhārena sappayogena kilese chindati kadalikkhandhaṃ viya atikhiṇā asidhārā. Kilesakkhaye pana tesaṃ nānattaṃ natthi. Avasesā ca kilesā khīyanti.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / २. पठमसंखित्तसुत्तं • 2. Paṭhamasaṃkhittasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / २. पठमसंखित्तसुत्तवण्णना • 2. Paṭhamasaṃkhittasuttavaṇṇanā
