| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၂. ပဌမသံခိတ္တသုတ္တဝဏ္ဏနာ
2. Paṭhamasaṃkhittasuttavaṇṇanā
၄၈၂. ဒုတိယေ တတောတိ ဝိပသ္သနာမဂ္ဂဖလဝသေန နိသ္သက္ကံ ဝေဒိတဗ္ဗံ။ သမတ္တာနိ ဟိ ပရိပုဏ္ဏာနိ ပဉ္စိန္ဒ္ရိယာနိ အရဟတ္တမဂ္ဂသ္သ ဝိပသ္သနိန္ဒ္ရိယာနိ နာမ ဟောန္တိ။ တတော မုဒုတရေဟီတိ တေဟိ အရဟတ္တမဂ္ဂသ္သ ဝိပသ္သနိန္ဒ္ရိယေဟိ မုဒုတရာနိ အနာဂာမိမဂ္ဂသ္သ ဝိပသ္သနိန္ဒ္ရိယာနိ နာမ ဟောန္တိ, တတော မုဒုတရာနိ သကဒာဂာမိမဂ္ဂသ္သ, တတော မုဒုတရာနိ သောတာပတ္တိမဂ္ဂသ္သ ဝိပသ္သနိန္ဒ္ရိယာနိ နာမ ဟောန္တိ, တတော မုဒုတရာနိ ဓမ္မာနုသာရိမဂ္ဂသ္သ, တတော မုဒုတရာနိ သဒ္ဓာနုသာရိမဂ္ဂသ္သ ဝိပသ္သနိန္ဒ္ရိယာနိ နာမ ဟောန္တိ။
482. Dutiye tatoti vipassanāmaggaphalavasena nissakkaṃ veditabbaṃ. Samattāni hi paripuṇṇāni pañcindriyāni arahattamaggassa vipassanindriyāni nāma honti. Tato mudutarehīti tehi arahattamaggassa vipassanindriyehi mudutarāni anāgāmimaggassa vipassanindriyāni nāma honti, tato mudutarāni sakadāgāmimaggassa, tato mudutarāni sotāpattimaggassa vipassanindriyāni nāma honti, tato mudutarāni dhammānusārimaggassa, tato mudutarāni saddhānusārimaggassa vipassanindriyāni nāma honti.
တထာ သမတ္တာနိ ပရိပုဏ္ဏာနိ ပဉ္စိန္ဒ္ရိယာနိ အရဟတ္တမဂ္ဂိန္ဒ္ရိယာနိ နာမ ဟောန္တိ, တတော မုဒုတရာနိ အနာဂာမိမဂ္ဂိန္ဒ္ရိယာနိ နာမ ဟောန္တိ, တတော မုဒုတရာနိ သကဒာဂာမိမဂ္ဂိန္ဒ္ရိယာနိ နာမ ဟောန္တိ, တတော မုဒုတရာနိ သောတာပတ္တိမဂ္ဂိန္ဒ္ရိယာနိ နာမ ဟောန္တိ, တတော မုဒုတရာနိ ဓမ္မာနုသာရိမဂ္ဂိန္ဒ္ရိယာနိ, တတော မုဒုတရာနိ သဒ္ဓာနုသာရိမဂ္ဂိန္ဒ္ရိယာနိ နာမ ဟောန္တိ။
Tathā samattāni paripuṇṇāni pañcindriyāni arahattamaggindriyāni nāma honti, tato mudutarāni anāgāmimaggindriyāni nāma honti, tato mudutarāni sakadāgāmimaggindriyāni nāma honti, tato mudutarāni sotāpattimaggindriyāni nāma honti, tato mudutarāni dhammānusārimaggindriyāni, tato mudutarāni saddhānusārimaggindriyāni nāma honti.
သမတ္တာနိ ပရိပုဏ္ဏာနိ ပဉ္စိန္ဒ္ရိယာနိ အရဟတ္တဖလိန္ဒ္ရိယာနိ နာမ ဟောန္တိ, တတော မုဒုတရာနိ အနာဂာမိဖလိန္ဒ္ရိယာနိ, တတော မုဒုတရာနိ သကဒာဂာမိဖလိန္ဒ္ရိယာနိ, တတော မုဒုတရာနိ သောတာပတ္တိဖလိန္ဒ္ရိယာနိ နာမ ဟောန္တိ။ ဓမ္မာနုသာရိသဒ္ဓာနုသာရိနော ပန ဒ္ဝေပိ သောတာပတ္တိမဂ္ဂဋ္ဌပုဂ္ဂလာ, မဂ္ဂဋ္ဌပုဂ္ဂလဝသေန နေသံ နာနတ္တံ ဇာတန္တိ အာဂမနေနပိ မဂ္ဂေနပိ။ သဒ္ဓာနုသာရီ ပုဂ္ဂလော ဟိ ဥဒ္ဒိသာပေန္တော ပရိပုစ္ဆန္တော အနုပုဗ္ဗေန မဂ္ဂံ ပာပုဏာတိ, ဓမ္မာနုသာရီ ဧကေန ဝာ ဒ္ဝီဟိ ဝာ သဝနေဟိ။ ဧဝံ တာဝ နေသံ အာဂမနေန နာနတ္တံ ဝေဒိတဗ္ဗံ။
Samattāni paripuṇṇāni pañcindriyāni arahattaphalindriyāni nāma honti, tato mudutarāni anāgāmiphalindriyāni, tato mudutarāni sakadāgāmiphalindriyāni, tato mudutarāni sotāpattiphalindriyāni nāma honti. Dhammānusārisaddhānusārino pana dvepi sotāpattimaggaṭṭhapuggalā, maggaṭṭhapuggalavasena nesaṃ nānattaṃ jātanti āgamanenapi maggenapi. Saddhānusārī puggalo hi uddisāpento paripucchanto anupubbena maggaṃ pāpuṇāti, dhammānusārī ekena vā dvīhi vā savanehi. Evaṃ tāva nesaṃ āgamanena nānattaṃ veditabbaṃ.
ဓမ္မာနုသာရိသ္သ ပန မဂ္ဂော တိက္ခော ဟောတိ, သူရံ ဉာဏံ ဝဟတိ, အသင္ခာရေန အပ္ပယောဂေန ကိလေသေ ဆိန္ဒတိ ကဒလိက္ခန္ဓံ ဝိယ တိခိဏာ အသိဓာရာ။ သဒ္ဓာနုသာရိသ္သ န တသ္သ ဝိယ မဂ္ဂော တိက္ခော ဟောတိ, န သူရံ ဉာဏံ ဝဟတိ, သသင္ခာရေန သပ္ပယောဂေန ကိလေသေ ဆိန္ဒတိ ကဒလိက္ခန္ဓံ ဝိယ အတိခိဏာ အသိဓာရာ။ ကိလေသက္ခယေ ပန တေသံ နာနတ္တံ နတ္ထိ။ အဝသေသာ စ ကိလေသာ ခီယန္တိ။
Dhammānusārissa pana maggo tikkho hoti, sūraṃ ñāṇaṃ vahati, asaṅkhārena appayogena kilese chindati kadalikkhandhaṃ viya tikhiṇā asidhārā. Saddhānusārissa na tassa viya maggo tikkho hoti, na sūraṃ ñāṇaṃ vahati, sasaṅkhārena sappayogena kilese chindati kadalikkhandhaṃ viya atikhiṇā asidhārā. Kilesakkhaye pana tesaṃ nānattaṃ natthi. Avasesā ca kilesā khīyanti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. ပဌမသံခိတ္တသုတ္တံ • 2. Paṭhamasaṃkhittasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၂. ပဌမသံခိတ္တသုတ္တဝဏ္ဏနာ • 2. Paṭhamasaṃkhittasuttavaṇṇanā
