| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೨. ಪಠಮಸಂಖಿತ್ತಸುತ್ತವಣ್ಣನಾ
2. Paṭhamasaṃkhittasuttavaṇṇanā
೪೮೨. ದುತಿಯೇ ತತೋತಿ ವಿಪಸ್ಸನಾಮಗ್ಗಫಲವಸೇನ ನಿಸ್ಸಕ್ಕಂ ವೇದಿತಬ್ಬಂ। ಸಮತ್ತಾನಿ ಹಿ ಪರಿಪುಣ್ಣಾನಿ ಪಞ್ಚಿನ್ದ್ರಿಯಾನಿ ಅರಹತ್ತಮಗ್ಗಸ್ಸ ವಿಪಸ್ಸನಿನ್ದ್ರಿಯಾನಿ ನಾಮ ಹೋನ್ತಿ। ತತೋ ಮುದುತರೇಹೀತಿ ತೇಹಿ ಅರಹತ್ತಮಗ್ಗಸ್ಸ ವಿಪಸ್ಸನಿನ್ದ್ರಿಯೇಹಿ ಮುದುತರಾನಿ ಅನಾಗಾಮಿಮಗ್ಗಸ್ಸ ವಿಪಸ್ಸನಿನ್ದ್ರಿಯಾನಿ ನಾಮ ಹೋನ್ತಿ, ತತೋ ಮುದುತರಾನಿ ಸಕದಾಗಾಮಿಮಗ್ಗಸ್ಸ, ತತೋ ಮುದುತರಾನಿ ಸೋತಾಪತ್ತಿಮಗ್ಗಸ್ಸ ವಿಪಸ್ಸನಿನ್ದ್ರಿಯಾನಿ ನಾಮ ಹೋನ್ತಿ, ತತೋ ಮುದುತರಾನಿ ಧಮ್ಮಾನುಸಾರಿಮಗ್ಗಸ್ಸ, ತತೋ ಮುದುತರಾನಿ ಸದ್ಧಾನುಸಾರಿಮಗ್ಗಸ್ಸ ವಿಪಸ್ಸನಿನ್ದ್ರಿಯಾನಿ ನಾಮ ಹೋನ್ತಿ।
482. Dutiye tatoti vipassanāmaggaphalavasena nissakkaṃ veditabbaṃ. Samattāni hi paripuṇṇāni pañcindriyāni arahattamaggassa vipassanindriyāni nāma honti. Tato mudutarehīti tehi arahattamaggassa vipassanindriyehi mudutarāni anāgāmimaggassa vipassanindriyāni nāma honti, tato mudutarāni sakadāgāmimaggassa, tato mudutarāni sotāpattimaggassa vipassanindriyāni nāma honti, tato mudutarāni dhammānusārimaggassa, tato mudutarāni saddhānusārimaggassa vipassanindriyāni nāma honti.
ತಥಾ ಸಮತ್ತಾನಿ ಪರಿಪುಣ್ಣಾನಿ ಪಞ್ಚಿನ್ದ್ರಿಯಾನಿ ಅರಹತ್ತಮಗ್ಗಿನ್ದ್ರಿಯಾನಿ ನಾಮ ಹೋನ್ತಿ, ತತೋ ಮುದುತರಾನಿ ಅನಾಗಾಮಿಮಗ್ಗಿನ್ದ್ರಿಯಾನಿ ನಾಮ ಹೋನ್ತಿ, ತತೋ ಮುದುತರಾನಿ ಸಕದಾಗಾಮಿಮಗ್ಗಿನ್ದ್ರಿಯಾನಿ ನಾಮ ಹೋನ್ತಿ, ತತೋ ಮುದುತರಾನಿ ಸೋತಾಪತ್ತಿಮಗ್ಗಿನ್ದ್ರಿಯಾನಿ ನಾಮ ಹೋನ್ತಿ, ತತೋ ಮುದುತರಾನಿ ಧಮ್ಮಾನುಸಾರಿಮಗ್ಗಿನ್ದ್ರಿಯಾನಿ, ತತೋ ಮುದುತರಾನಿ ಸದ್ಧಾನುಸಾರಿಮಗ್ಗಿನ್ದ್ರಿಯಾನಿ ನಾಮ ಹೋನ್ತಿ।
Tathā samattāni paripuṇṇāni pañcindriyāni arahattamaggindriyāni nāma honti, tato mudutarāni anāgāmimaggindriyāni nāma honti, tato mudutarāni sakadāgāmimaggindriyāni nāma honti, tato mudutarāni sotāpattimaggindriyāni nāma honti, tato mudutarāni dhammānusārimaggindriyāni, tato mudutarāni saddhānusārimaggindriyāni nāma honti.
ಸಮತ್ತಾನಿ ಪರಿಪುಣ್ಣಾನಿ ಪಞ್ಚಿನ್ದ್ರಿಯಾನಿ ಅರಹತ್ತಫಲಿನ್ದ್ರಿಯಾನಿ ನಾಮ ಹೋನ್ತಿ, ತತೋ ಮುದುತರಾನಿ ಅನಾಗಾಮಿಫಲಿನ್ದ್ರಿಯಾನಿ, ತತೋ ಮುದುತರಾನಿ ಸಕದಾಗಾಮಿಫಲಿನ್ದ್ರಿಯಾನಿ, ತತೋ ಮುದುತರಾನಿ ಸೋತಾಪತ್ತಿಫಲಿನ್ದ್ರಿಯಾನಿ ನಾಮ ಹೋನ್ತಿ। ಧಮ್ಮಾನುಸಾರಿಸದ್ಧಾನುಸಾರಿನೋ ಪನ ದ್ವೇಪಿ ಸೋತಾಪತ್ತಿಮಗ್ಗಟ್ಠಪುಗ್ಗಲಾ, ಮಗ್ಗಟ್ಠಪುಗ್ಗಲವಸೇನ ನೇಸಂ ನಾನತ್ತಂ ಜಾತನ್ತಿ ಆಗಮನೇನಪಿ ಮಗ್ಗೇನಪಿ। ಸದ್ಧಾನುಸಾರೀ ಪುಗ್ಗಲೋ ಹಿ ಉದ್ದಿಸಾಪೇನ್ತೋ ಪರಿಪುಚ್ಛನ್ತೋ ಅನುಪುಬ್ಬೇನ ಮಗ್ಗಂ ಪಾಪುಣಾತಿ, ಧಮ್ಮಾನುಸಾರೀ ಏಕೇನ ವಾ ದ್ವೀಹಿ ವಾ ಸವನೇಹಿ। ಏವಂ ತಾವ ನೇಸಂ ಆಗಮನೇನ ನಾನತ್ತಂ ವೇದಿತಬ್ಬಂ।
Samattāni paripuṇṇāni pañcindriyāni arahattaphalindriyāni nāma honti, tato mudutarāni anāgāmiphalindriyāni, tato mudutarāni sakadāgāmiphalindriyāni, tato mudutarāni sotāpattiphalindriyāni nāma honti. Dhammānusārisaddhānusārino pana dvepi sotāpattimaggaṭṭhapuggalā, maggaṭṭhapuggalavasena nesaṃ nānattaṃ jātanti āgamanenapi maggenapi. Saddhānusārī puggalo hi uddisāpento paripucchanto anupubbena maggaṃ pāpuṇāti, dhammānusārī ekena vā dvīhi vā savanehi. Evaṃ tāva nesaṃ āgamanena nānattaṃ veditabbaṃ.
ಧಮ್ಮಾನುಸಾರಿಸ್ಸ ಪನ ಮಗ್ಗೋ ತಿಕ್ಖೋ ಹೋತಿ, ಸೂರಂ ಞಾಣಂ ವಹತಿ, ಅಸಙ್ಖಾರೇನ ಅಪ್ಪಯೋಗೇನ ಕಿಲೇಸೇ ಛಿನ್ದತಿ ಕದಲಿಕ್ಖನ್ಧಂ ವಿಯ ತಿಖಿಣಾ ಅಸಿಧಾರಾ। ಸದ್ಧಾನುಸಾರಿಸ್ಸ ನ ತಸ್ಸ ವಿಯ ಮಗ್ಗೋ ತಿಕ್ಖೋ ಹೋತಿ, ನ ಸೂರಂ ಞಾಣಂ ವಹತಿ, ಸಸಙ್ಖಾರೇನ ಸಪ್ಪಯೋಗೇನ ಕಿಲೇಸೇ ಛಿನ್ದತಿ ಕದಲಿಕ್ಖನ್ಧಂ ವಿಯ ಅತಿಖಿಣಾ ಅಸಿಧಾರಾ। ಕಿಲೇಸಕ್ಖಯೇ ಪನ ತೇಸಂ ನಾನತ್ತಂ ನತ್ಥಿ। ಅವಸೇಸಾ ಚ ಕಿಲೇಸಾ ಖೀಯನ್ತಿ।
Dhammānusārissa pana maggo tikkho hoti, sūraṃ ñāṇaṃ vahati, asaṅkhārena appayogena kilese chindati kadalikkhandhaṃ viya tikhiṇā asidhārā. Saddhānusārissa na tassa viya maggo tikkho hoti, na sūraṃ ñāṇaṃ vahati, sasaṅkhārena sappayogena kilese chindati kadalikkhandhaṃ viya atikhiṇā asidhārā. Kilesakkhaye pana tesaṃ nānattaṃ natthi. Avasesā ca kilesā khīyanti.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೨. ಪಠಮಸಂಖಿತ್ತಸುತ್ತಂ • 2. Paṭhamasaṃkhittasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೨. ಪಠಮಸಂಖಿತ್ತಸುತ್ತವಣ್ಣನಾ • 2. Paṭhamasaṃkhittasuttavaṇṇanā
