| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
18. ஸமுத்³த³வக்³கோ³
18. Samuddavaggo
1. பட²மஸமுத்³த³ஸுத்தவண்ணனா
1. Paṭhamasamuddasuttavaṇṇanā
228. ஸமுத்³த³வக்³க³ஸ்ஸ பட²மே சக்கு², பி⁴க்க²வே, புரிஸஸ்ஸ ஸமுத்³தோ³தி யதி³ து³ப்பூரணட்டே²ன யதி³ வா ஸமுத்³த³னட்டே²ன ஸமுத்³தோ³, சக்கு²மேவ ஸமுத்³தோ³. தஸ்ஸ ஹி பத²விதோ யாவ அகனிட்ட²ப்³ரஹ்மலோகா நீலாதி³ஆரம்மணங் ஸமோஸரந்தங் பரிபுண்ணபா⁴வங் காதுங் ந ஸக்கோதி, ஏவங் து³ப்பூரணட்டே²னபி ஸமுத்³தோ³. சக்கு² ச தேஸு தேஸு நீலாதீ³ஸு ஆரம்மணேஸு ஸமுத்³த³தி, அஸங்வுதங் ஹுத்வா ஓஸரமானங் கிலேஸுப்பத்தியா காரணபா⁴வேன ஸதோ³ஸக³மனேன க³ச்ச²தீதி ஸமுத்³த³னட்டே²னபி ஸமுத்³தோ³. தஸ்ஸ ரூபமயோ வேகோ³தி ஸமுத்³த³ஸ்ஸ அப்பமாணோ ஊமிமயோ வேகோ³ விய தஸ்ஸாபி சக்கு²ஸமுத்³த³ஸ்ஸ ஸமோஸரந்தஸ்ஸ நீலாதி³பே⁴த³ஸ்ஸ ஆரம்மணஸ்ஸ வஸேன அப்பமெய்யோ ரூபமயோ வேகோ³ வேதி³தப்³போ³. யோ தங் ரூபமயங் வேக³ங் ஸஹதீதி யோ தங் சக்கு²ஸமுத்³தே³ ஸமோஸடங் ரூபமயங் வேக³ங், மனாபே ரூபே ராக³ங், அமனாபே தோ³ஸங், அஸமபெக்கி²தே மோஹந்தி ஏவங் ராகா³தி³கிலேஸே அனுப்பாதெ³ந்தோ உபெக்க²கபா⁴வேன ஸஹதி.
228. Samuddavaggassa paṭhame cakkhu, bhikkhave, purisassa samuddoti yadi duppūraṇaṭṭhena yadi vā samuddanaṭṭhena samuddo, cakkhumeva samuddo. Tassa hi pathavito yāva akaniṭṭhabrahmalokā nīlādiārammaṇaṃ samosarantaṃ paripuṇṇabhāvaṃ kātuṃ na sakkoti, evaṃ duppūraṇaṭṭhenapi samuddo. Cakkhu ca tesu tesu nīlādīsu ārammaṇesu samuddati, asaṃvutaṃ hutvā osaramānaṃ kilesuppattiyā kāraṇabhāvena sadosagamanena gacchatīti samuddanaṭṭhenapi samuddo. Tassa rūpamayo vegoti samuddassa appamāṇo ūmimayo vego viya tassāpi cakkhusamuddassa samosarantassa nīlādibhedassa ārammaṇassa vasena appameyyo rūpamayo vego veditabbo. Yo taṃ rūpamayaṃ vegaṃ sahatīti yo taṃ cakkhusamudde samosaṭaṃ rūpamayaṃ vegaṃ, manāpe rūpe rāgaṃ, amanāpe dosaṃ, asamapekkhite mohanti evaṃ rāgādikilese anuppādento upekkhakabhāvena sahati.
ஸஊமிந்திஆதீ³ஸு கிலேஸஊமீஹி ஸஊமிங். கிலேஸாவட்டேஹி ஸாவட்டங். கிலேஸகா³ஹேஹி ஸகா³ஹங் . கிலேஸரக்க²ஸேஹி ஸரக்க²ஸங். கோதூ⁴பாயாஸஸ்ஸ ச வஸேன ஸஊமிங். வுதஞ்ஹேதங் ‘‘ஊமிப⁴யந்தி கோ², பி⁴க்க²வே, கோதூ⁴பாயாஸஸ்ஸேதங் அதி⁴வசன’’ந்தி (இதிவு॰ 109; ம॰ நி॰ 2.162; அ॰ நி॰ 4.122). காமகு³ணவஸேன ஸாவட்டங். வுதஞ்ஹேதங் ‘‘ஆவட்டக்³கா³ஹோதி கோ², பி⁴க்க²வே, பஞ்சன்னேதங் காமகு³ணானங் அதி⁴வசன’’ந்தி (ஸங்॰ நி॰ 4.241). மாதுகா³மவஸேன ஸகா³ஹங் ஸரக்க²ஸங். வுத்தஞ்ஹேதங் ‘‘கா³ஹரக்க²ஸோதி கோ², பி⁴க்க²வே, மாதுகா³மஸ்ஸேதங் அதி⁴வசன’’ந்தி (இதிவு॰ 109). ஸேஸவாரேஸுபி ஏஸேவ நயோ. ஸப⁴யங் து³த்தரங் அச்சதரீதி ஊமிப⁴யேன ஸப⁴யங் து³ரதிக்கமங் அதிக்கமி. லோகந்தகூ³தி ஸங்கா²ரலோகஸ்ஸ அந்தங் க³தோ. பாரக³தோதி வுச்சதீதி நிப்³பா³னங் க³தோதி கதீ²யதி.
Saūmintiādīsu kilesaūmīhi saūmiṃ. Kilesāvaṭṭehi sāvaṭṭaṃ. Kilesagāhehi sagāhaṃ. Kilesarakkhasehi sarakkhasaṃ. Kodhūpāyāsassa ca vasena saūmiṃ. Vutañhetaṃ ‘‘ūmibhayanti kho, bhikkhave, kodhūpāyāsassetaṃ adhivacana’’nti (itivu. 109; ma. ni. 2.162; a. ni. 4.122). Kāmaguṇavasena sāvaṭṭaṃ. Vutañhetaṃ ‘‘āvaṭṭaggāhoti kho, bhikkhave, pañcannetaṃ kāmaguṇānaṃ adhivacana’’nti (saṃ. ni. 4.241). Mātugāmavasena sagāhaṃ sarakkhasaṃ. Vuttañhetaṃ ‘‘gāharakkhasoti kho, bhikkhave, mātugāmassetaṃ adhivacana’’nti (itivu. 109). Sesavāresupi eseva nayo. Sabhayaṃ duttaraṃ accatarīti ūmibhayena sabhayaṃ duratikkamaṃ atikkami. Lokantagūti saṅkhāralokassa antaṃ gato. Pāragatoti vuccatīti nibbānaṃ gatoti kathīyati.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. பட²மஸமுத்³த³ஸுத்தங் • 1. Paṭhamasamuddasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. பட²மஸமுத்³த³ஸுத்தவண்ணனா • 1. Paṭhamasamuddasuttavaṇṇanā
