| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. பட²மஸமுக்³கா⁴தஸப்பாயஸுத்தங்
9. Paṭhamasamugghātasappāyasuttaṃ
31. ‘‘ஸப்³ப³மஞ்ஞிதஸமுக்³கா⁴தஸப்பாயங் வோ, பி⁴க்க²வே, படிபத³ங் தே³ஸெஸ்ஸாமி. தங் ஸுணாத². கதமா ச ஸா, பி⁴க்க²வே, ஸப்³ப³மஞ்ஞிதஸமுக்³கா⁴தஸப்பாயா படிபதா³? இத⁴, பி⁴க்க²வே, பி⁴க்கு² சக்கு²ங் ந மஞ்ஞதி, சக்கு²ஸ்மிங் ந மஞ்ஞதி, சக்கு²தோ ந மஞ்ஞதி, சக்கு²ங் மேதி ந மஞ்ஞதி. ரூபே ந மஞ்ஞதி…பே॰… சக்கு²விஞ்ஞாணங் ந மஞ்ஞதி, சக்கு²ஸம்ப²ஸ்ஸங் ந மஞ்ஞதி, யம்பித³ங் சக்கு²ஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ந மஞ்ஞதி, தஸ்மிம்பி ந மஞ்ஞதி, ததோபி ந மஞ்ஞதி, தங் மேதி ந மஞ்ஞதி. யஞ்ஹி, பி⁴க்க²வே, மஞ்ஞதி, யஸ்மிங் மஞ்ஞதி, யதோ மஞ்ஞதி, யங் மேதி மஞ்ஞதி, ததோ தங் ஹோதி அஞ்ஞதா². அஞ்ஞதா²பா⁴வீ ப⁴வஸத்தோ லோகோ ப⁴வமேவாபி⁴னந்த³தி…பே॰… ஜிவ்ஹங் ந மஞ்ஞதி, ஜிவ்ஹாய ந மஞ்ஞதி, ஜிவ்ஹாதோ ந மஞ்ஞதி, ஜிவ்ஹா மேதி ந மஞ்ஞதி. ரஸே ந மஞ்ஞதி…பே॰… ஜிவ்ஹாவிஞ்ஞாணங் ந மஞ்ஞதி, ஜிவ்ஹாஸம்ப²ஸ்ஸங் ந மஞ்ஞதி. யம்பித³ங் ஜிவ்ஹாஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ந மஞ்ஞதி, தஸ்மிம்பி ந மஞ்ஞதி, ததோபி ந மஞ்ஞதி, தங் மேதி ந மஞ்ஞதி. யஞ்ஹி, பி⁴க்க²வே, மஞ்ஞதி, யஸ்மிங் மஞ்ஞதி, யதோ மஞ்ஞதி, யங் மேதி மஞ்ஞதி, ததோ தங் ஹோதி அஞ்ஞதா². அஞ்ஞதா²பா⁴வீ ப⁴வஸத்தோ லோகோ ப⁴வமேவாபி⁴னந்த³தி…பே॰… மனங் ந மஞ்ஞதி, மனஸ்மிங் ந மஞ்ஞதி, மனதோ ந மஞ்ஞதி, மனோ மேதி ந மஞ்ஞதி. த⁴ம்மே ந மஞ்ஞதி…பே॰… மனோவிஞ்ஞாணங் ந மஞ்ஞதி, மனோஸம்ப²ஸ்ஸங் ந மஞ்ஞதி. யம்பித³ங் மனோஸம்ப²ஸ்ஸபச்சயா உப்பஜ்ஜதி வேத³யிதங் ஸுக²ங் வா து³க்க²ங் வா அது³க்க²மஸுக²ங் வா தம்பி ந மஞ்ஞதி, தஸ்மிம்பி ந மஞ்ஞதி, ததோபி ந மஞ்ஞதி, தங் மேதி ந மஞ்ஞதி. யஞ்ஹி, பி⁴க்க²வே, மஞ்ஞதி, யஸ்மிங் மஞ்ஞதி, யதோ மஞ்ஞதி, யங் மேதி மஞ்ஞதி, ததோ தங் ஹோதி அஞ்ஞதா². அஞ்ஞதா²பா⁴வீ ப⁴வஸத்தோ லோகோ ப⁴வமேவாபி⁴னந்த³தி. யாவதா, பி⁴க்க²வே, க²ந்த⁴தா⁴துஆயதனங் தம்பி ந மஞ்ஞதி, தஸ்மிம்பி ந மஞ்ஞதி, ததோபி ந மஞ்ஞதி, தங் மேதி ந மஞ்ஞதி. ஸோ ஏவங் அமஞ்ஞமானோ ந ச கிஞ்சி லோகே உபாதி³யதி. அனுபாதி³யங் ந பரிதஸ்ஸதி. அபரிதஸ்ஸங் பச்சத்தஞ்ஞேவ பரினிப்³பா³யதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதி . அயங் கோ² ஸா, பி⁴க்க²வே, ஸப்³ப³மஞ்ஞிதஸமுக்³கா⁴தஸப்பாயா படிபதா³’’தி. நவமங்.
31. ‘‘Sabbamaññitasamugghātasappāyaṃ vo, bhikkhave, paṭipadaṃ desessāmi. Taṃ suṇātha. Katamā ca sā, bhikkhave, sabbamaññitasamugghātasappāyā paṭipadā? Idha, bhikkhave, bhikkhu cakkhuṃ na maññati, cakkhusmiṃ na maññati, cakkhuto na maññati, cakkhuṃ meti na maññati. Rūpe na maññati…pe… cakkhuviññāṇaṃ na maññati, cakkhusamphassaṃ na maññati, yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññati, tasmimpi na maññati, tatopi na maññati, taṃ meti na maññati. Yañhi, bhikkhave, maññati, yasmiṃ maññati, yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavamevābhinandati…pe… jivhaṃ na maññati, jivhāya na maññati, jivhāto na maññati, jivhā meti na maññati. Rase na maññati…pe… jivhāviññāṇaṃ na maññati, jivhāsamphassaṃ na maññati. Yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññati, tasmimpi na maññati, tatopi na maññati, taṃ meti na maññati. Yañhi, bhikkhave, maññati, yasmiṃ maññati, yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavamevābhinandati…pe… manaṃ na maññati, manasmiṃ na maññati, manato na maññati, mano meti na maññati. Dhamme na maññati…pe… manoviññāṇaṃ na maññati, manosamphassaṃ na maññati. Yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na maññati, tasmimpi na maññati, tatopi na maññati, taṃ meti na maññati. Yañhi, bhikkhave, maññati, yasmiṃ maññati, yato maññati, yaṃ meti maññati, tato taṃ hoti aññathā. Aññathābhāvī bhavasatto loko bhavamevābhinandati. Yāvatā, bhikkhave, khandhadhātuāyatanaṃ tampi na maññati, tasmimpi na maññati, tatopi na maññati, taṃ meti na maññati. So evaṃ amaññamāno na ca kiñci loke upādiyati. Anupādiyaṃ na paritassati. Aparitassaṃ paccattaññeva parinibbāyati. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāti . Ayaṃ kho sā, bhikkhave, sabbamaññitasamugghātasappāyā paṭipadā’’ti. Navamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. பட²மஸமுக்³கா⁴தஸப்பாயஸுத்தவண்ணனா • 9. Paṭhamasamugghātasappāyasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. பட²மஸமுக்³கா⁴தஸப்பாயஸுத்தவண்ணனா • 9. Paṭhamasamugghātasappāyasuttavaṇṇanā
