| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༩. པཋམསམུགྒྷཱཏསཔྤཱཡསུཏྟཝཎྞནཱ
9. Paṭhamasamugghātasappāyasuttavaṇṇanā
༣༡. ཨུཔཀཱརབྷཱུཏཱ ཏདཱཝཧཏྟཱ། ཏཏོཏི མཉྙིཏཱཀཱརཏོ། ཏནྟི མཉྙནཱཝཏྠུཾ། ཨཉྙེནཱཀཱརེནཱཏི ཡཐཱ མཉྙཏི ཨནིཙྩཱདིཨཱཀཱརཏོ, ཨཉྙེན ཨནིཙྩཱདིནཱ ཨཱཀཱརེན ཧོཏི། ཨཉྙཐཱབྷཱཝཾ ཝིཔརིཎཱམནྟི ཨུཔྤཱདཝཡཏཱཡ ཨཉྙཐཱབྷཱཝཾ ཛརཱཡ མརཎེན ཙ དྭེདྷཱ ཝིཔརིཎཱམེཏབྦཾ། ཏཾ ཨུཔགམནེན ཨཉྙཐཱབྷཱཝཱི, ཨེཝཾབྷཱུཏོ ཧུཏྭཱཔི ཛཱིརཎབྷིཛྫནསབྷཱཝེསུ། བྷཝེསུ སཏྟོ ལོཀོ ཨུཔརིཔི བྷཝཾཡེཝ ཨབྷིནནྡཏི། ཧེཊྛཱ གཧིཏམེཝ སངྐཌྜྷིཏྭཱཏི ‘‘ཙཀྑུཾ ན མཉྙཏཱི’’ཏིཨཱདིནཱ ཧེཊྛཱ གཧིཏམེཝ ཁནྡྷདྷཱཏུཨཱཡཏནཱཏི ཁནྡྷཱདིཔརིཡཱཡེན ཨེཀཏོ གཧེཏྭཱ པུནཔི མཉྙནཱཝཏྠུཾ དསྶེཏི། ཨཝསཱནེ ‘‘ཏཏོ ཏཾ ཧོཏཱི’’ཏི ཝུཏྟཔདེན སདྡྷིཾ སབྦཝཱརེསུ ཨཊྛ ཨཊྛ ཧོནྟཱིཏི ‘‘ཨཊྛཙཏྟཱལཱིསཱཡ ཋཱནེསཱུ’’ཏི ཝུཏྟཾ།
31.Upakārabhūtā tadāvahattā. Tatoti maññitākārato. Tanti maññanāvatthuṃ. Aññenākārenāti yathā maññati aniccādiākārato, aññena aniccādinā ākārena hoti. Aññathābhāvaṃ vipariṇāmanti uppādavayatāya aññathābhāvaṃ jarāya maraṇena ca dvedhā vipariṇāmetabbaṃ. Taṃ upagamanena aññathābhāvī, evaṃbhūto hutvāpi jīraṇabhijjanasabhāvesu. Bhavesu satto loko uparipi bhavaṃyeva abhinandati. Heṭṭhā gahitameva saṅkaḍḍhitvāti ‘‘cakkhuṃ na maññatī’’tiādinā heṭṭhā gahitameva khandhadhātuāyatanāti khandhādipariyāyena ekato gahetvā punapi maññanāvatthuṃ dasseti. Avasāne ‘‘tato taṃ hotī’’ti vuttapadena saddhiṃ sabbavāresu aṭṭha aṭṭha hontīti ‘‘aṭṭhacattālīsāya ṭhānesū’’ti vuttaṃ.
པཋམསམུགྒྷཱཏསཔྤཱཡསུཏྟཝཎྞནཱ ནིཊྛིཏཱ།
Paṭhamasamugghātasappāyasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༩. པཋམསམུགྒྷཱཏསཔྤཱཡསུཏྟཾ • 9. Paṭhamasamugghātasappāyasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༩. པཋམསམུགྒྷཱཏསཔྤཱཡསུཏྟཝཎྞནཱ • 9. Paṭhamasamugghātasappāyasuttavaṇṇanā
