| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3-4. பட²மஸங்வாஸஸுத்தாதி³வண்ணனா
3-4. Paṭhamasaṃvāsasuttādivaṇṇanā
53-54. ததியே யதா²கம்மங் தா தா க³தியோ அரந்தி உபக³ச்ச²ந்தீதி அரியா, ஸத்தா. இமே பன குச்சி²தா அரியாதி கத³ரியா. த²த்³த⁴மச்ச²ரினோ, த²த்³தே⁴ன மச்ச²ரேன ஸமன்னாக³தாதி அத்தோ². த²த்³த⁴மச்ச²ரியஸதி³ஸஞ்ஹி குச்சி²தங் ஸப்³ப³தா³ நிஹீனங் நத்தி² ஸப்³ப³கு³ணானங் ஆதி³பூ⁴தஸ்ஸ போ⁴க³ஸம்பத்திஆதி³ஸப்³ப³ஸம்பத்தீனங் மூலபூ⁴தஸ்ஸ தா³னஸ்ஸ நிஸேத⁴னதோ. தேனாஹ ‘‘கத³ரியாதி த²த்³த⁴மச்ச²ரினோ’’தி. ஏகச்சோ ஹி அத்தனோ வஸனட்டா²னே பி⁴க்கூ² ஹத்த²ங் பஸாரெத்வாபி ந வந்த³தி. அஞ்ஞத்த² க³தோ விஹாரங் பவிஸித்வா ஸக்கச்சங் வந்தி³த்வா மது⁴ரப்படிஸந்தா²ரங் கரோதி ‘‘கிங், ப⁴ந்தே, அம்ஹாகங் வஸனட்டா²னங் நாக³ச்ச²த², ஸம்பன்னோ பதே³ஸோ, படிப³லாஹங் அய்யானங் யாகு³ப⁴த்தாதீ³ஹி உபட்டா²னங் காது’’ந்தி. பி⁴க்கு² ‘‘ஸத்³தோ⁴ அயங் உபாஸகோ’’தி யாகு³ப⁴த்தாதீ³ஹி ஸங்க³ண்ஹாதி.
53-54. Tatiye yathākammaṃ tā tā gatiyo aranti upagacchantīti ariyā, sattā. Ime pana kucchitā ariyāti kadariyā. Thaddhamaccharino, thaddhena maccharena samannāgatāti attho. Thaddhamacchariyasadisañhi kucchitaṃ sabbadā nihīnaṃ natthi sabbaguṇānaṃ ādibhūtassa bhogasampattiādisabbasampattīnaṃ mūlabhūtassa dānassa nisedhanato. Tenāha ‘‘kadariyāti thaddhamaccharino’’ti. Ekacco hi attano vasanaṭṭhāne bhikkhū hatthaṃ pasāretvāpi na vandati. Aññattha gato vihāraṃ pavisitvā sakkaccaṃ vanditvā madhurappaṭisanthāraṃ karoti ‘‘kiṃ, bhante, amhākaṃ vasanaṭṭhānaṃ nāgacchatha, sampanno padeso, paṭibalāhaṃ ayyānaṃ yāgubhattādīhi upaṭṭhānaṃ kātu’’nti. Bhikkhu ‘‘saddho ayaṃ upāsako’’ti yāgubhattādīhi saṅgaṇhāti.
அதே²கோ தே²ரோ தஸ்ஸ கா³மங் க³ந்த்வா பிண்டா³ய சரதி. ஸோ தங் தி³ஸ்வா அஞ்ஞேன வா க³ச்ச²தி, க⁴ரங் வா பவிஸதி. ஸசேபி ஸம்முகீ²பா⁴வங் ஆக³ச்ச²தி, ஹத்தே²ன வந்தி³த்வா ‘‘அய்யஸ்ஸ பி⁴க்க²ங் தே³த², அஹங் ஏகேன கம்மேன க³ச்சா²மீ’’தி பக்கமதி. தே²ரோ ஸகலகா³மங் சரித்வா துச்ச²பத்தோவ நிக்க²மதி. இத³ங் தாவ முது³மச்ச²ரியங் நாம. யேன அதா³யகோபி தா³யகோ விய பஞ்ஞாயதி. இத⁴ பன த²த்³த⁴மச்ச²ரியங் அதி⁴ப்பேதங். யேன ஸமன்னாக³தோ பி⁴க்கூ²ஸு பிண்டா³ய பவிட்டே²ஸு ‘‘தே²ரா டி²தா’’தி வுத்தே ‘‘கிங் மய்ஹங் பாதா³ ருஜ்ஜந்தீ’’திஆதீ³னி வத்வா ஸிலாத²ம்போ⁴ விய கா²ணுகோ விய ச த²த்³தோ⁴ ஹுத்வா திட்ட²தி, ஸாமீசிம்பி ந கரோதி, குதோ தா³னங். அயமித⁴ அதி⁴ப்பேதோ. தேன வுத்தங் ‘‘த²த்³த⁴மச்ச²ரினோதி த²த்³தே⁴ன மச்ச²ரேன ஸமன்னாக³தாதி அத்தோ²’’தி. மச்ச²ரங் மச்சே²ரங் மச்ச²ரியந்தி அத்த²தோ ஏகங்.
Atheko thero tassa gāmaṃ gantvā piṇḍāya carati. So taṃ disvā aññena vā gacchati, gharaṃ vā pavisati. Sacepi sammukhībhāvaṃ āgacchati, hatthena vanditvā ‘‘ayyassa bhikkhaṃ detha, ahaṃ ekena kammena gacchāmī’’ti pakkamati. Thero sakalagāmaṃ caritvā tucchapattova nikkhamati. Idaṃ tāva mudumacchariyaṃ nāma. Yena adāyakopi dāyako viya paññāyati. Idha pana thaddhamacchariyaṃ adhippetaṃ. Yena samannāgato bhikkhūsu piṇḍāya paviṭṭhesu ‘‘therā ṭhitā’’ti vutte ‘‘kiṃ mayhaṃ pādā rujjantī’’tiādīni vatvā silāthambho viya khāṇuko viya ca thaddho hutvā tiṭṭhati, sāmīcimpi na karoti, kuto dānaṃ. Ayamidha adhippeto. Tena vuttaṃ ‘‘thaddhamaccharinoti thaddhena maccharena samannāgatāti attho’’ti. Maccharaṃ maccheraṃ macchariyanti atthato ekaṃ.
பரிபா⁴ஸகாதி பி⁴க்கூ² க⁴ரத்³வாரே டி²தே தி³ஸ்வா ‘‘கிங் தும்ஹே கஸித்வா ஆக³தா வபித்வா லாயித்வா, மயங் அத்தனோபி ந லபா⁴ம, குதோ தும்ஹாகங், ஸீக⁴ங் நிக்க²மதா²’’திஆதீ³ஹி ஸந்தஜ்ஜகா. யாசகானங் வசனஸ்ஸ அத்த²ங் ஜானந்தீதி எத்த² கிஞ்சாபி பி⁴க்கூ² க⁴ரத்³வாரே டி²தா துண்ஹீ ஹொந்தி, அத்த²தோ பன ‘‘பி⁴க்க²ங் தே³தா²’’தி வத³ந்தி நாம அரியாய யாசனாய. வுத்தஞ்ஹேதங் ‘‘உத்³தி³ஸ்ஸ அரியா திட்ட²ந்தி, ஏஸா அரியான யாசனா’’தி (மி॰ ப॰ 4.5.9). தத்ர யே ‘‘மயங் பசாம, இமே ந பசந்தி, பசமானே பத்வா அலப⁴ந்தா குஹிங் லபி⁴ஸ்ஸதீ’’தி தெ³ய்யத⁴ம்மங் ஸங்விப⁴ஜந்தி, தே வத³ஞ்ஞூ யாசகானங் வசனஸ்ஸ அத்த²ங் ஜானந்தி நாம ஞத்வா கத்தப்³ப³கரணதோ. சதுத்த²ங் உத்தானமேவ.
Paribhāsakāti bhikkhū gharadvāre ṭhite disvā ‘‘kiṃ tumhe kasitvā āgatā vapitvā lāyitvā, mayaṃ attanopi na labhāma, kuto tumhākaṃ, sīghaṃ nikkhamathā’’tiādīhi santajjakā. Yācakānaṃ vacanassa atthaṃ jānantīti ettha kiñcāpi bhikkhū gharadvāre ṭhitā tuṇhī honti, atthato pana ‘‘bhikkhaṃ dethā’’ti vadanti nāma ariyāya yācanāya. Vuttañhetaṃ ‘‘uddissa ariyā tiṭṭhanti, esā ariyāna yācanā’’ti (mi. pa. 4.5.9). Tatra ye ‘‘mayaṃ pacāma, ime na pacanti, pacamāne patvā alabhantā kuhiṃ labhissatī’’ti deyyadhammaṃ saṃvibhajanti, te vadaññū yācakānaṃ vacanassa atthaṃ jānanti nāma ñatvā kattabbakaraṇato. Catutthaṃ uttānameva.
பட²மஸங்வாஸஸுத்தாதி³வண்ணனா நிட்டி²தா.
Paṭhamasaṃvāsasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
3. பட²மஸங்வாஸஸுத்தங் • 3. Paṭhamasaṃvāsasuttaṃ
4. து³தியஸங்வாஸஸுத்தங் • 4. Dutiyasaṃvāsasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
3. பட²மஸங்வாஸஸுத்தவண்ணனா • 3. Paṭhamasaṃvāsasuttavaṇṇanā
4. து³தியஸங்வாஸஸுத்தவண்ணனா • 4. Dutiyasaṃvāsasuttavaṇṇanā
