| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೩. ಪಠಮಸಂವಾಸಸುತ್ತಂ
3. Paṭhamasaṃvāsasuttaṃ
೫೩. ಏಕಂ ಸಮಯಂ ಭಗವಾ ಅನ್ತರಾ ಚ ಮಧುರಂ ಅನ್ತರಾ ಚ ವೇರಞ್ಜಂ ಅದ್ಧಾನಮಗ್ಗಪ್ಪಟಿಪನ್ನೋ ಹೋತಿ। ಸಮ್ಬಹುಲಾಪಿ ಖೋ ಗಹಪತೀ ಚ ಗಹಪತಾನಿಯೋ ಚ ಅನ್ತರಾ ಚ ಮಧುರಂ ಅನ್ತರಾ ಚ ವೇರಞ್ಜಂ ಅದ್ಧಾನಮಗ್ಗಪ್ಪಟಿಪನ್ನಾ ಹೋನ್ತಿ। ಅಥ ಖೋ ಭಗವಾ ಮಗ್ಗಾ ಓಕ್ಕಮ್ಮ ಅಞ್ಞತರಸ್ಮಿಂ ರುಕ್ಖಮೂಲೇ ( ) 1 ನಿಸೀದಿ। ಅದ್ದಸಂಸು ಖೋ ಗಹಪತೀ ಚ ಗಹಪತಾನಿಯೋ ಚ ಭಗವನ್ತಂ ಅಞ್ಞತರಸ್ಮಿಂ ರುಕ್ಖಮೂಲೇ ನಿಸಿನ್ನಂ। ದಿಸ್ವಾ ಯೇನ ಭಗವಾ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿಂಸು। ಏಕಮನ್ತಂ ನಿಸಿನ್ನೇ ಖೋ ತೇ ಗಹಪತೀ ಚ ಗಹಪತಾನಿಯೋ ಚ ಭಗವಾ ಏತದವೋಚ –
53. Ekaṃ samayaṃ bhagavā antarā ca madhuraṃ antarā ca verañjaṃ addhānamaggappaṭipanno hoti. Sambahulāpi kho gahapatī ca gahapatāniyo ca antarā ca madhuraṃ antarā ca verañjaṃ addhānamaggappaṭipannā honti. Atha kho bhagavā maggā okkamma aññatarasmiṃ rukkhamūle ( ) 2 nisīdi. Addasaṃsu kho gahapatī ca gahapatāniyo ca bhagavantaṃ aññatarasmiṃ rukkhamūle nisinnaṃ. Disvā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinne kho te gahapatī ca gahapatāniyo ca bhagavā etadavoca –
‘‘ಚತ್ತಾರೋಮೇ, ಗಹಪತಯೋ, ಸಂವಾಸಾ। ಕತಮೇ ಚತ್ತಾರೋ? ಛವೋ ಛವಾಯ ಸದ್ಧಿಂ ಸಂವಸತಿ, ಛವೋ ದೇವಿಯಾ ಸದ್ಧಿಂ ಸಂವಸತಿ, ದೇವೋ ಛವಾಯ ಸದ್ಧಿಂ ಸಂವಸತಿ, ದೇವೋ ದೇವಿಯಾ ಸದ್ಧಿಂ ಸಂವಸತಿ।
‘‘Cattārome, gahapatayo, saṃvāsā. Katame cattāro? Chavo chavāya saddhiṃ saṃvasati, chavo deviyā saddhiṃ saṃvasati, devo chavāya saddhiṃ saṃvasati, devo deviyā saddhiṃ saṃvasati.
‘‘ಕಥಞ್ಚ, ಗಹಪತಯೋ, ಛವೋ ಛವಾಯ ಸದ್ಧಿಂ ಸಂವಸತಿ? ಇಧ , ಗಹಪತಯೋ, ಸಾಮಿಕೋ ಹೋತಿ ಪಾಣಾತಿಪಾತೀ ಅದಿನ್ನಾದಾಯೀ ಕಾಮೇಸುಮಿಚ್ಛಾಚಾರೀ ಮುಸಾವಾದೀ ಸುರಾಮೇರಯಮಜ್ಜಪಮಾದಟ್ಠಾಯೀ ದುಸ್ಸೀಲೋ ಪಾಪಧಮ್ಮೋ ಮಚ್ಛೇರಮಲಪರಿಯುಟ್ಠಿತೇನ ಚೇತಸಾ ಅಗಾರಂ ಅಜ್ಝಾವಸತಿ ಅಕ್ಕೋಸಕಪರಿಭಾಸಕೋ ಸಮಣಬ್ರಾಹ್ಮಣಾನಂ ; ಭರಿಯಾಪಿಸ್ಸ ಹೋತಿ ಪಾಣಾತಿಪಾತಿನೀ ಅದಿನ್ನಾದಾಯಿನೀ ಕಾಮೇಸುಮಿಚ್ಛಾಚಾರಿನೀ ಮುಸಾವಾದಿನೀ ಸುರಾಮೇರಯಮಜ್ಜಪಮಾದಟ್ಠಾಯಿನೀ ದುಸ್ಸೀಲಾ ಪಾಪಧಮ್ಮಾ ಮಚ್ಛೇರಮಲಪರಿಯುಟ್ಠಿತೇನ ಚೇತಸಾ ಅಗಾರಂ ಅಜ್ಝಾವಸತಿ ಅಕ್ಕೋಸಿಕಪರಿಭಾಸಿಕಾ ಸಮಣಬ್ರಾಹ್ಮಣಾನಂ। ಏವಂ ಖೋ, ಗಹಪತಯೋ, ಛವೋ ಛವಾಯ ಸದ್ಧಿಂ ಸಂವಸತಿ।
‘‘Kathañca, gahapatayo, chavo chavāya saddhiṃ saṃvasati? Idha , gahapatayo, sāmiko hoti pāṇātipātī adinnādāyī kāmesumicchācārī musāvādī surāmerayamajjapamādaṭṭhāyī dussīlo pāpadhammo maccheramalapariyuṭṭhitena cetasā agāraṃ ajjhāvasati akkosakaparibhāsako samaṇabrāhmaṇānaṃ ; bhariyāpissa hoti pāṇātipātinī adinnādāyinī kāmesumicchācārinī musāvādinī surāmerayamajjapamādaṭṭhāyinī dussīlā pāpadhammā maccheramalapariyuṭṭhitena cetasā agāraṃ ajjhāvasati akkosikaparibhāsikā samaṇabrāhmaṇānaṃ. Evaṃ kho, gahapatayo, chavo chavāya saddhiṃ saṃvasati.
‘‘ಕಥಞ್ಚ , ಗಹಪತಯೋ, ಛವೋ ದೇವಿಯಾ ಸದ್ಧಿಂ ಸಂವಸತಿ? ಇಧ, ಗಹಪತಯೋ, ಸಾಮಿಕೋ ಹೋತಿ ಪಾಣಾತಿಪಾತೀ ಅದಿನ್ನಾದಾಯೀ ಕಾಮೇಸುಮಿಚ್ಛಾಚಾರೀ ಮುಸಾವಾದೀ ಸುರಾಮೇರಯಮಜ್ಜಪಮಾದಟ್ಠಾಯೀ ದುಸ್ಸೀಲೋ ಪಾಪಧಮ್ಮೋ ಮಚ್ಛೇರಮಲಪರಿಯುಟ್ಠಿತೇನ ಚೇತಸಾ ಅಗಾರಂ ಅಜ್ಝಾವಸತಿ ಅಕ್ಕೋಸಕಪರಿಭಾಸಕೋ ಸಮಣಬ್ರಾಹ್ಮಣಾನಂ; ಭರಿಯಾ ಖ್ವಸ್ಸ ಹೋತಿ ಪಾಣಾತಿಪಾತಾ ಪಟಿವಿರತಾ ಅದಿನ್ನಾದಾನಾ ಪಟಿವಿರತಾ ಕಾಮೇಸುಮಿಚ್ಛಾಚಾರಾ ಪಟಿವಿರತಾ ಮುಸಾವಾದಾ ಪಟಿವಿರತಾ ಸುರಾಮೇರಯಮಜ್ಜಪಮಾದಟ್ಠಾನಾ ಪಟಿವಿರತಾ ಸೀಲವತೀ ಕಲ್ಯಾಣಧಮ್ಮಾ ವಿಗತಮಲಮಚ್ಛೇರೇನ ಚೇತಸಾ ಅಗಾರಂ ಅಜ್ಝಾವಸತಿ ಅನಕ್ಕೋಸಿಕಪರಿಭಾಸಿಕಾ ಸಮಣಬ್ರಾಹ್ಮಣಾನಂ। ಏವಂ ಖೋ, ಗಹಪತಯೋ, ಛವೋ ದೇವಿಯಾ ಸದ್ಧಿಂ ಸಂವಸತಿ।
‘‘Kathañca , gahapatayo, chavo deviyā saddhiṃ saṃvasati? Idha, gahapatayo, sāmiko hoti pāṇātipātī adinnādāyī kāmesumicchācārī musāvādī surāmerayamajjapamādaṭṭhāyī dussīlo pāpadhammo maccheramalapariyuṭṭhitena cetasā agāraṃ ajjhāvasati akkosakaparibhāsako samaṇabrāhmaṇānaṃ; bhariyā khvassa hoti pāṇātipātā paṭiviratā adinnādānā paṭiviratā kāmesumicchācārā paṭiviratā musāvādā paṭiviratā surāmerayamajjapamādaṭṭhānā paṭiviratā sīlavatī kalyāṇadhammā vigatamalamaccherena cetasā agāraṃ ajjhāvasati anakkosikaparibhāsikā samaṇabrāhmaṇānaṃ. Evaṃ kho, gahapatayo, chavo deviyā saddhiṃ saṃvasati.
‘‘ಕಥಞ್ಚ, ಗಹಪತಯೋ, ದೇವೋ ಛವಾಯ ಸದ್ಧಿಂ ಸಂವಸತಿ? ಇಧ, ಗಹಪತಯೋ, ಸಾಮಿಕೋ ಹೋತಿ ಪಾಣಾತಿಪಾತಾ ಪಟಿವಿರತೋ ಅದಿನ್ನಾದಾನಾ ಪಟಿವಿರತೋ ಕಾಮೇಸುಮಿಚ್ಛಾಚಾರಾ ಪಟಿವಿರತೋ ಮುಸಾವಾದಾ ಪಟಿವಿರತೋ ಸುರಾಮೇರಯಮಜ್ಜಪಮಾದಟ್ಠಾನಾ ಪಟಿವಿರತೋ ಸೀಲವಾ ಕಲ್ಯಾಣಧಮ್ಮೋ ವಿಗತಮಲಮಚ್ಛೇರೇನ ಚೇತಸಾ ಅಗಾರಂ ಅಜ್ಝಾವಸತಿ ಅನಕ್ಕೋಸಕಪರಿಭಾಸಕೋ ಸಮಣಬ್ರಾಹ್ಮಣಾನಂ; ಭರಿಯಾ ಖ್ವಸ್ಸ ಹೋತಿ ಪಾಣಾತಿಪಾತಿನೀ…ಪೇ॰… ಸುರಾಮೇರಯಮಜ್ಜಪಮಾದಟ್ಠಾಯಿನೀ ದುಸ್ಸೀಲಾ ಪಾಪಧಮ್ಮಾ ಮಚ್ಛೇರಮಲಪರಿಯುಟ್ಠಿತೇನ ಚೇತಸಾ ಅಗಾರಂ ಅಜ್ಝಾವಸತಿ ಅಕ್ಕೋಸಿಕಪರಿಭಾಸಿಕಾ ಸಮಣಬ್ರಾಹ್ಮಣಾನಂ। ಏವಂ ಖೋ, ಗಹಪತಯೋ, ದೇವೋ ಛವಾಯ ಸದ್ಧಿಂ ಸಂವಸತಿ।
‘‘Kathañca, gahapatayo, devo chavāya saddhiṃ saṃvasati? Idha, gahapatayo, sāmiko hoti pāṇātipātā paṭivirato adinnādānā paṭivirato kāmesumicchācārā paṭivirato musāvādā paṭivirato surāmerayamajjapamādaṭṭhānā paṭivirato sīlavā kalyāṇadhammo vigatamalamaccherena cetasā agāraṃ ajjhāvasati anakkosakaparibhāsako samaṇabrāhmaṇānaṃ; bhariyā khvassa hoti pāṇātipātinī…pe… surāmerayamajjapamādaṭṭhāyinī dussīlā pāpadhammā maccheramalapariyuṭṭhitena cetasā agāraṃ ajjhāvasati akkosikaparibhāsikā samaṇabrāhmaṇānaṃ. Evaṃ kho, gahapatayo, devo chavāya saddhiṃ saṃvasati.
‘‘ಕಥಞ್ಚ, ಗಹಪತಯೋ, ದೇವೋ ದೇವಿಯಾ ಸದ್ಧಿಂ ಸಂವಸತಿ? ಇಧ, ಗಹಪತಯೋ, ಸಾಮಿಕೋ ಹೋತಿ ಪಾಣಾತಿಪಾತಾ ಪಟಿವಿರತೋ…ಪೇ॰… ಸೀಲವಾ ಕಲ್ಯಾಣಧಮ್ಮೋ ವಿಗತಮಲಮಚ್ಛೇರೇನ ಚೇತಸಾ ಅಗಾರಂ ಅಜ್ಝಾವಸತಿ ಅನಕ್ಕೋಸಕಪರಿಭಾಸಕೋ ಸಮಣಬ್ರಾಹ್ಮಣಾನಂ; ಭರಿಯಾಪಿಸ್ಸ ಹೋತಿ ಪಾಣಾತಿಪಾತಾ ಪಟಿವಿರತಾ…ಪೇ॰… ಸುರಾಮೇರಯಮಜ್ಜಪಮಾದಟ್ಠಾನಾ ಪಟಿವಿರತಾ ಸೀಲವತೀ ಕಲ್ಯಾಣಧಮ್ಮಾ ವಿಗತಮಲಮಚ್ಛೇರೇನ ಚೇತಸಾ ಅಗಾರಂ ಅಜ್ಝಾವಸತಿ ಅನಕ್ಕೋಸಿಕಪರಿಭಾಸಿಕಾ ಸಮಣಬ್ರಾಹ್ಮಣಾನಂ। ಏವಂ ಖೋ, ಗಹಪತಯೋ, ದೇವೋ ದೇವಿಯಾ ಸದ್ಧಿಂ ಸಂವಸತಿ। ಇಮೇ ಖೋ, ಗಹಪತಯೋ, ಚತ್ತಾರೋ ಸಂವಾಸಾ’’ತಿ।
‘‘Kathañca, gahapatayo, devo deviyā saddhiṃ saṃvasati? Idha, gahapatayo, sāmiko hoti pāṇātipātā paṭivirato…pe… sīlavā kalyāṇadhammo vigatamalamaccherena cetasā agāraṃ ajjhāvasati anakkosakaparibhāsako samaṇabrāhmaṇānaṃ; bhariyāpissa hoti pāṇātipātā paṭiviratā…pe… surāmerayamajjapamādaṭṭhānā paṭiviratā sīlavatī kalyāṇadhammā vigatamalamaccherena cetasā agāraṃ ajjhāvasati anakkosikaparibhāsikā samaṇabrāhmaṇānaṃ. Evaṃ kho, gahapatayo, devo deviyā saddhiṃ saṃvasati. Ime kho, gahapatayo, cattāro saṃvāsā’’ti.
‘‘ಉಭೋ ಚ ಹೋನ್ತಿ ದುಸ್ಸೀಲಾ, ಕದರಿಯಾ ಪರಿಭಾಸಕಾ।
‘‘Ubho ca honti dussīlā, kadariyā paribhāsakā;
ತೇ ಹೋನ್ತಿ ಜಾನಿಪತಯೋ, ಛವಾ ಸಂವಾಸಮಾಗತಾ॥
Te honti jānipatayo, chavā saṃvāsamāgatā.
‘‘ಸಾಮಿಕೋ ಹೋತಿ ದುಸ್ಸೀಲೋ, ಕದರಿಯೋ ಪರಿಭಾಸಕೋ।
‘‘Sāmiko hoti dussīlo, kadariyo paribhāsako;
ಭರಿಯಾ ಸೀಲವತೀ ಹೋತಿ, ವದಞ್ಞೂ ವೀತಮಚ್ಛರಾ।
Bhariyā sīlavatī hoti, vadaññū vītamaccharā;
ಸಾಪಿ ದೇವೀ ಸಂವಸತಿ, ಛವೇನ ಪತಿನಾ ಸಹ॥
Sāpi devī saṃvasati, chavena patinā saha.
‘‘ಸಾಮಿಕೋ ಸೀಲವಾ ಹೋತಿ, ವದಞ್ಞೂ ವೀತಮಚ್ಛರೋ।
‘‘Sāmiko sīlavā hoti, vadaññū vītamaccharo;
ಭರಿಯಾ ಹೋತಿ ದುಸ್ಸೀಲಾ, ಕದರಿಯಾ ಪರಿಭಾಸಿಕಾ।
Bhariyā hoti dussīlā, kadariyā paribhāsikā;
ಸಾಪಿ ಛವಾ ಸಂವಸತಿ, ದೇವೇನ ಪತಿನಾ ಸಹ॥
Sāpi chavā saṃvasati, devena patinā saha.
‘‘ಉಭೋ ಸದ್ಧಾ ವದಞ್ಞೂ ಚ, ಸಞ್ಞತಾ ಧಮ್ಮಜೀವಿನೋ।
‘‘Ubho saddhā vadaññū ca, saññatā dhammajīvino;
ತೇ ಹೋನ್ತಿ ಜಾನಿಪತಯೋ, ಅಞ್ಞಮಞ್ಞಂ ಪಿಯಂವದಾ॥
Te honti jānipatayo, aññamaññaṃ piyaṃvadā.
ಅಮಿತ್ತಾ ದುಮ್ಮನಾ ಹೋನ್ತಿ, ಉಭಿನ್ನಂ ಸಮಸೀಲಿನಂ॥
Amittā dummanā honti, ubhinnaṃ samasīlinaṃ.
‘‘ಇಧ ಧಮ್ಮಂ ಚರಿತ್ವಾನ, ಸಮಸೀಲಬ್ಬತಾ ಉಭೋ।
‘‘Idha dhammaṃ caritvāna, samasīlabbatā ubho;
ನನ್ದಿನೋ ದೇವಲೋಕಸ್ಮಿಂ, ಮೋದನ್ತಿ ಕಾಮಕಾಮಿನೋ’’ತಿ॥ ತತಿಯಂ।
Nandino devalokasmiṃ, modanti kāmakāmino’’ti. tatiyaṃ;
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೩. ಪಠಮಸಂವಾಸಸುತ್ತವಣ್ಣನಾ • 3. Paṭhamasaṃvāsasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೩-೪. ಪಠಮಸಂವಾಸಸುತ್ತಾದಿವಣ್ಣನಾ • 3-4. Paṭhamasaṃvāsasuttādivaṇṇanā
