| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৩. পঠমসংৰাসসুত্তৰণ্ণনা
3. Paṭhamasaṃvāsasuttavaṇṇanā
৫৩. ততিযে সম্বহুলাপি খো গহপতী চ গহপতানিযো চাতি বহুকা গহপতযো চ গহপতানিযো চ আৰাহৰিৰাহকরণত্থায গচ্ছন্তা তমেৰ মগ্গং পটিপন্না হোন্তি। সংৰাসাতি সহৰাসা একতোৰাসা। ছৰো ছৰাযাতি গুণমরণেন মতত্তা ছৰো গুণমরণেনেৰ মতায ছৰায সদ্ধিং। দেৰিযা সদ্ধিন্তি গুণেহি দেৰিভূতায সদ্ধিং। দুস্সীলোতি নিস্সীলো। পাপধম্মোতি লামকধম্মো। অক্কোসকপরিভাসকোতি দসহি অক্কোসৰত্থূহি অক্কোসকো, ভযং দস্সেত্ৰা সন্তজ্জনেন পরিভাসকো। এৰং সব্বত্থ অত্থো ৰেদিতব্বো।
53. Tatiye sambahulāpi kho gahapatī ca gahapatāniyo cāti bahukā gahapatayo ca gahapatāniyo ca āvāhavivāhakaraṇatthāya gacchantā tameva maggaṃ paṭipannā honti. Saṃvāsāti sahavāsā ekatovāsā. Chavo chavāyāti guṇamaraṇena matattā chavo guṇamaraṇeneva matāya chavāya saddhiṃ. Deviyā saddhinti guṇehi devibhūtāya saddhiṃ. Dussīloti nissīlo. Pāpadhammoti lāmakadhammo. Akkosakaparibhāsakoti dasahi akkosavatthūhi akkosako, bhayaṃ dassetvā santajjanena paribhāsako. Evaṃ sabbattha attho veditabbo.
কদরিযাতি থদ্ধমচ্ছরিনো। জানিপতযোতি জযম্পতিকা। ৰদঞ্ঞূতি যাচকানং ৰচনস্স অত্থং জানন্তি। সঞ্ঞতাতি সীলসংযমেন সমন্নাগতা। ধম্মজীৰিনোতি ধম্মে ঠত্ৰা জীৰিকং কপ্পেন্তীতি ধম্মজীৰিনো। অত্থাসং পচুরা হোন্তীতি ৰড্ঢিসঙ্খাতা অত্থা এতেসং বহূ হোন্তি। ফাসুকং উপজাযতীতি অঞ্ঞমঞ্ঞং ফাসুৰিহারো জাযতি। কামকামিনোতি কামে কামযমানা।
Kadariyāti thaddhamaccharino. Jānipatayoti jayampatikā. Vadaññūti yācakānaṃ vacanassa atthaṃ jānanti. Saññatāti sīlasaṃyamena samannāgatā. Dhammajīvinoti dhamme ṭhatvā jīvikaṃ kappentīti dhammajīvino. Atthāsaṃ pacurā hontīti vaḍḍhisaṅkhātā atthā etesaṃ bahū honti. Phāsukaṃ upajāyatīti aññamaññaṃ phāsuvihāro jāyati. Kāmakāminoti kāme kāmayamānā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৩. পঠমসংৰাসসুত্তং • 3. Paṭhamasaṃvāsasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৩-৪. পঠমসংৰাসসুত্তাদিৰণ্ণনা • 3-4. Paṭhamasaṃvāsasuttādivaṇṇanā
