| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
३. पठमसंवाससुत्तवण्णना
3. Paṭhamasaṃvāsasuttavaṇṇanā
५३. ततिये सम्बहुलापि खो गहपती च गहपतानियो चाति बहुका गहपतयो च गहपतानियो च आवाहविवाहकरणत्थाय गच्छन्ता तमेव मग्गं पटिपन्ना होन्ति। संवासाति सहवासा एकतोवासा। छवो छवायाति गुणमरणेन मतत्ता छवो गुणमरणेनेव मताय छवाय सद्धिं। देविया सद्धिन्ति गुणेहि देविभूताय सद्धिं। दुस्सीलोति निस्सीलो। पापधम्मोति लामकधम्मो। अक्कोसकपरिभासकोति दसहि अक्कोसवत्थूहि अक्कोसको, भयं दस्सेत्वा सन्तज्जनेन परिभासको। एवं सब्बत्थ अत्थो वेदितब्बो।
53. Tatiye sambahulāpi kho gahapatī ca gahapatāniyo cāti bahukā gahapatayo ca gahapatāniyo ca āvāhavivāhakaraṇatthāya gacchantā tameva maggaṃ paṭipannā honti. Saṃvāsāti sahavāsā ekatovāsā. Chavo chavāyāti guṇamaraṇena matattā chavo guṇamaraṇeneva matāya chavāya saddhiṃ. Deviyā saddhinti guṇehi devibhūtāya saddhiṃ. Dussīloti nissīlo. Pāpadhammoti lāmakadhammo. Akkosakaparibhāsakoti dasahi akkosavatthūhi akkosako, bhayaṃ dassetvā santajjanena paribhāsako. Evaṃ sabbattha attho veditabbo.
कदरियाति थद्धमच्छरिनो। जानिपतयोति जयम्पतिका। वदञ्ञूति याचकानं वचनस्स अत्थं जानन्ति। सञ्ञताति सीलसंयमेन समन्नागता। धम्मजीविनोति धम्मे ठत्वा जीविकं कप्पेन्तीति धम्मजीविनो। अत्थासं पचुरा होन्तीति वड्ढिसङ्खाता अत्था एतेसं बहू होन्ति। फासुकं उपजायतीति अञ्ञमञ्ञं फासुविहारो जायति। कामकामिनोति कामे कामयमाना।
Kadariyāti thaddhamaccharino. Jānipatayoti jayampatikā. Vadaññūti yācakānaṃ vacanassa atthaṃ jānanti. Saññatāti sīlasaṃyamena samannāgatā. Dhammajīvinoti dhamme ṭhatvā jīvikaṃ kappentīti dhammajīvino. Atthāsaṃ pacurā hontīti vaḍḍhisaṅkhātā atthā etesaṃ bahū honti. Phāsukaṃ upajāyatīti aññamaññaṃ phāsuvihāro jāyati. Kāmakāminoti kāme kāmayamānā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ३. पठमसंवाससुत्तं • 3. Paṭhamasaṃvāsasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ३-४. पठमसंवाससुत्तादिवण्णना • 3-4. Paṭhamasaṃvāsasuttādivaṇṇanā
