| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៣. បឋមសំវាសសុត្តវណ្ណនា
3. Paṭhamasaṃvāsasuttavaṇṇanā
៥៣. តតិយេ សម្ពហុលាបិ ខោ គហបតី ច គហបតានិយោ ចាតិ ពហុកា គហបតយោ ច គហបតានិយោ ច អាវាហវិវាហករណត្ថាយ គច្ឆន្តា តមេវ មគ្គំ បដិបន្នា ហោន្តិ។ សំវាសាតិ សហវាសា ឯកតោវាសា។ ឆវោ ឆវាយាតិ គុណមរណេន មតត្តា ឆវោ គុណមរណេនេវ មតាយ ឆវាយ សទ្ធិំ។ ទេវិយា សទ្ធិន្តិ គុណេហិ ទេវិភូតាយ សទ្ធិំ។ ទុស្សីលោតិ និស្សីលោ។ បាបធម្មោតិ លាមកធម្មោ។ អក្កោសកបរិភាសកោតិ ទសហិ អក្កោសវត្ថូហិ អក្កោសកោ, ភយំ ទស្សេត្វា សន្តជ្ជនេន បរិភាសកោ។ ឯវំ សព្ពត្ថ អត្ថោ វេទិតព្ពោ។
53. Tatiye sambahulāpi kho gahapatī ca gahapatāniyo cāti bahukā gahapatayo ca gahapatāniyo ca āvāhavivāhakaraṇatthāya gacchantā tameva maggaṃ paṭipannā honti. Saṃvāsāti sahavāsā ekatovāsā. Chavo chavāyāti guṇamaraṇena matattā chavo guṇamaraṇeneva matāya chavāya saddhiṃ. Deviyā saddhinti guṇehi devibhūtāya saddhiṃ. Dussīloti nissīlo. Pāpadhammoti lāmakadhammo. Akkosakaparibhāsakoti dasahi akkosavatthūhi akkosako, bhayaṃ dassetvā santajjanena paribhāsako. Evaṃ sabbattha attho veditabbo.
កទរិយាតិ ថទ្ធមច្ឆរិនោ។ ជានិបតយោតិ ជយម្បតិកា។ វទញ្ញូតិ យាចកានំ វចនស្ស អត្ថំ ជានន្តិ។ សញ្ញតាតិ សីលសំយមេន សមន្នាគតា។ ធម្មជីវិនោតិ ធម្មេ ឋត្វា ជីវិកំ កប្បេន្តីតិ ធម្មជីវិនោ។ អត្ថាសំ បចុរា ហោន្តីតិ វឌ្ឍិសង្ខាតា អត្ថា ឯតេសំ ពហូ ហោន្តិ។ ផាសុកំ ឧបជាយតីតិ អញ្ញមញ្ញំ ផាសុវិហារោ ជាយតិ។ កាមកាមិនោតិ កាមេ កាមយមានា។
Kadariyāti thaddhamaccharino. Jānipatayoti jayampatikā. Vadaññūti yācakānaṃ vacanassa atthaṃ jānanti. Saññatāti sīlasaṃyamena samannāgatā. Dhammajīvinoti dhamme ṭhatvā jīvikaṃ kappentīti dhammajīvino. Atthāsaṃ pacurā hontīti vaḍḍhisaṅkhātā atthā etesaṃ bahū honti. Phāsukaṃ upajāyatīti aññamaññaṃ phāsuvihāro jāyati. Kāmakāminoti kāme kāmayamānā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៣. បឋមសំវាសសុត្តំ • 3. Paṭhamasaṃvāsasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៣-៤. បឋមសំវាសសុត្តាទិវណ្ណនា • 3-4. Paṭhamasaṃvāsasuttādivaṇṇanā
