| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၃. ပဌမသံဝာသသုတ္တဝဏ္ဏနာ
3. Paṭhamasaṃvāsasuttavaṇṇanā
၅၃. တတိယေ သမ္ဗဟုလာပိ ခော ဂဟပတီ စ ဂဟပတာနိယော စာတိ ဗဟုကာ ဂဟပတယော စ ဂဟပတာနိယော စ အာဝာဟဝိဝာဟကရဏတ္ထာယ ဂစ္ဆန္တာ တမေဝ မဂ္ဂံ ပဋိပန္နာ ဟောန္တိ။ သံဝာသာတိ သဟဝာသာ ဧကတောဝာသာ။ ဆဝော ဆဝာယာတိ ဂုဏမရဏေန မတတ္တာ ဆဝော ဂုဏမရဏေနေဝ မတာယ ဆဝာယ သဒ္ဓိံ။ ဒေဝိယာ သဒ္ဓိန္တိ ဂုဏေဟိ ဒေဝိဘူတာယ သဒ္ဓိံ။ ဒုသ္သီလောတိ နိသ္သီလော။ ပာပဓမ္မောတိ လာမကဓမ္မော။ အက္ကောသကပရိဘာသကောတိ ဒသဟိ အက္ကောသဝတ္ထူဟိ အက္ကောသကော, ဘယံ ဒသ္သေတ္ဝာ သန္တဇ္ဇနေန ပရိဘာသကော။ ဧဝံ သဗ္ဗတ္ထ အတ္ထော ဝေဒိတဗ္ဗော။
53. Tatiye sambahulāpi kho gahapatī ca gahapatāniyo cāti bahukā gahapatayo ca gahapatāniyo ca āvāhavivāhakaraṇatthāya gacchantā tameva maggaṃ paṭipannā honti. Saṃvāsāti sahavāsā ekatovāsā. Chavo chavāyāti guṇamaraṇena matattā chavo guṇamaraṇeneva matāya chavāya saddhiṃ. Deviyā saddhinti guṇehi devibhūtāya saddhiṃ. Dussīloti nissīlo. Pāpadhammoti lāmakadhammo. Akkosakaparibhāsakoti dasahi akkosavatthūhi akkosako, bhayaṃ dassetvā santajjanena paribhāsako. Evaṃ sabbattha attho veditabbo.
ကဒရိယာတိ ထဒ္ဓမစ္ဆရိနော။ ဇာနိပတယောတိ ဇယမ္ပတိကာ။ ဝဒညူတိ ယာစကာနံ ဝစနသ္သ အတ္ထံ ဇာနန္တိ။ သညတာတိ သီလသံယမေန သမန္နာဂတာ။ ဓမ္မဇီဝိနောတိ ဓမ္မေ ဌတ္ဝာ ဇီဝိကံ ကပ္ပေန္တီတိ ဓမ္မဇီဝိနော။ အတ္ထာသံ ပစုရာ ဟောန္တီတိ ဝဍ္ဎိသင္ခာတာ အတ္ထာ ဧတေသံ ဗဟူ ဟောန္တိ။ ဖာသုကံ ဥပဇာယတီတိ အညမညံ ဖာသုဝိဟာရော ဇာယတိ။ ကာမကာမိနောတိ ကာမေ ကာမယမာနာ။
Kadariyāti thaddhamaccharino. Jānipatayoti jayampatikā. Vadaññūti yācakānaṃ vacanassa atthaṃ jānanti. Saññatāti sīlasaṃyamena samannāgatā. Dhammajīvinoti dhamme ṭhatvā jīvikaṃ kappentīti dhammajīvino. Atthāsaṃ pacurā hontīti vaḍḍhisaṅkhātā atthā etesaṃ bahū honti. Phāsukaṃ upajāyatīti aññamaññaṃ phāsuvihāro jāyati. Kāmakāminoti kāme kāmayamānā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၃. ပဌမသံဝာသသုတ္တံ • 3. Paṭhamasaṃvāsasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၃-၄. ပဌမသံဝာသသုတ္တာဒိဝဏ္ဏနာ • 3-4. Paṭhamasaṃvāsasuttādivaṇṇanā
