| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೩. ಪಠಮಸಂವಾಸಸುತ್ತವಣ್ಣನಾ
3. Paṭhamasaṃvāsasuttavaṇṇanā
೫೩. ತತಿಯೇ ಸಮ್ಬಹುಲಾಪಿ ಖೋ ಗಹಪತೀ ಚ ಗಹಪತಾನಿಯೋ ಚಾತಿ ಬಹುಕಾ ಗಹಪತಯೋ ಚ ಗಹಪತಾನಿಯೋ ಚ ಆವಾಹವಿವಾಹಕರಣತ್ಥಾಯ ಗಚ್ಛನ್ತಾ ತಮೇವ ಮಗ್ಗಂ ಪಟಿಪನ್ನಾ ಹೋನ್ತಿ। ಸಂವಾಸಾತಿ ಸಹವಾಸಾ ಏಕತೋವಾಸಾ। ಛವೋ ಛವಾಯಾತಿ ಗುಣಮರಣೇನ ಮತತ್ತಾ ಛವೋ ಗುಣಮರಣೇನೇವ ಮತಾಯ ಛವಾಯ ಸದ್ಧಿಂ। ದೇವಿಯಾ ಸದ್ಧಿನ್ತಿ ಗುಣೇಹಿ ದೇವಿಭೂತಾಯ ಸದ್ಧಿಂ। ದುಸ್ಸೀಲೋತಿ ನಿಸ್ಸೀಲೋ। ಪಾಪಧಮ್ಮೋತಿ ಲಾಮಕಧಮ್ಮೋ। ಅಕ್ಕೋಸಕಪರಿಭಾಸಕೋತಿ ದಸಹಿ ಅಕ್ಕೋಸವತ್ಥೂಹಿ ಅಕ್ಕೋಸಕೋ, ಭಯಂ ದಸ್ಸೇತ್ವಾ ಸನ್ತಜ್ಜನೇನ ಪರಿಭಾಸಕೋ। ಏವಂ ಸಬ್ಬತ್ಥ ಅತ್ಥೋ ವೇದಿತಬ್ಬೋ।
53. Tatiye sambahulāpi kho gahapatī ca gahapatāniyo cāti bahukā gahapatayo ca gahapatāniyo ca āvāhavivāhakaraṇatthāya gacchantā tameva maggaṃ paṭipannā honti. Saṃvāsāti sahavāsā ekatovāsā. Chavo chavāyāti guṇamaraṇena matattā chavo guṇamaraṇeneva matāya chavāya saddhiṃ. Deviyā saddhinti guṇehi devibhūtāya saddhiṃ. Dussīloti nissīlo. Pāpadhammoti lāmakadhammo. Akkosakaparibhāsakoti dasahi akkosavatthūhi akkosako, bhayaṃ dassetvā santajjanena paribhāsako. Evaṃ sabbattha attho veditabbo.
ಕದರಿಯಾತಿ ಥದ್ಧಮಚ್ಛರಿನೋ। ಜಾನಿಪತಯೋತಿ ಜಯಮ್ಪತಿಕಾ। ವದಞ್ಞೂತಿ ಯಾಚಕಾನಂ ವಚನಸ್ಸ ಅತ್ಥಂ ಜಾನನ್ತಿ। ಸಞ್ಞತಾತಿ ಸೀಲಸಂಯಮೇನ ಸಮನ್ನಾಗತಾ। ಧಮ್ಮಜೀವಿನೋತಿ ಧಮ್ಮೇ ಠತ್ವಾ ಜೀವಿಕಂ ಕಪ್ಪೇನ್ತೀತಿ ಧಮ್ಮಜೀವಿನೋ। ಅತ್ಥಾಸಂ ಪಚುರಾ ಹೋನ್ತೀತಿ ವಡ್ಢಿಸಙ್ಖಾತಾ ಅತ್ಥಾ ಏತೇಸಂ ಬಹೂ ಹೋನ್ತಿ। ಫಾಸುಕಂ ಉಪಜಾಯತೀತಿ ಅಞ್ಞಮಞ್ಞಂ ಫಾಸುವಿಹಾರೋ ಜಾಯತಿ। ಕಾಮಕಾಮಿನೋತಿ ಕಾಮೇ ಕಾಮಯಮಾನಾ।
Kadariyāti thaddhamaccharino. Jānipatayoti jayampatikā. Vadaññūti yācakānaṃ vacanassa atthaṃ jānanti. Saññatāti sīlasaṃyamena samannāgatā. Dhammajīvinoti dhamme ṭhatvā jīvikaṃ kappentīti dhammajīvino. Atthāsaṃ pacurā hontīti vaḍḍhisaṅkhātā atthā etesaṃ bahū honti. Phāsukaṃ upajāyatīti aññamaññaṃ phāsuvihāro jāyati. Kāmakāminoti kāme kāmayamānā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೩. ಪಠಮಸಂವಾಸಸುತ್ತಂ • 3. Paṭhamasaṃvāsasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೩-೪. ಪಠಮಸಂವಾಸಸುತ್ತಾದಿವಣ್ಣನಾ • 3-4. Paṭhamasaṃvāsasuttādivaṇṇanā
