| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
3. පඨමසංවාසසුත්‌තවණ්‌ණනා
3. Paṭhamasaṃvāsasuttavaṇṇanā
53. තතියෙ සම්‌බහුලාපි ඛො ගහපතී ච ගහපතානියො චාති බහුකා ගහපතයො ච ගහපතානියො ච ආවාහවිවාහකරණත්‌ථාය ගච්‌ඡන්‌තා තමෙව මග්‌ගං පටිපන්‌නා හොන්‌ති. සංවාසාති සහවාසා එකතොවාසා. ඡවො ඡවායාති ගුණමරණෙන මතත්‌තා ඡවො ගුණමරණෙනෙව මතාය ඡවාය සද්‌ධිං. දෙවියා සද්‌ධින්‌ති ගුණෙහි දෙවිභූතාය සද්‌ධිං. දුස්‌සීලොති නිස්‌සීලො. පාපධම්‌මොති ලාමකධම්‌මො. අක්‌කොසකපරිභාසකොති දසහි අක්‌කොසවත්‌ථූහි අක්‌කොසකො, භයං දස්‌සෙත්‌වා සන්‌තජ්‌ජනෙන පරිභාසකො. එවං සබ්‌බත්‌ථ අත්‌ථො වෙදිතබ්‌බො.
53. Tatiye sambahulāpi kho gahapatī ca gahapatāniyo cāti bahukā gahapatayo ca gahapatāniyo ca āvāhavivāhakaraṇatthāya gacchantā tameva maggaṃ paṭipannā honti. Saṃvāsāti sahavāsā ekatovāsā. Chavo chavāyāti guṇamaraṇena matattā chavo guṇamaraṇeneva matāya chavāya saddhiṃ. Deviyā saddhinti guṇehi devibhūtāya saddhiṃ. Dussīloti nissīlo. Pāpadhammoti lāmakadhammo. Akkosakaparibhāsakoti dasahi akkosavatthūhi akkosako, bhayaṃ dassetvā santajjanena paribhāsako. Evaṃ sabbattha attho veditabbo.
කදරියාති ථද්‌ධමච්‌ඡරිනො. ජානිපතයොති ජයම්‌පතිකා. වදඤ්‌ඤූති යාචකානං වචනස්‌ස අත්‌ථං ජානන්‌ති. සඤ්‌ඤතාති සීලසංයමෙන සමන්‌නාගතා. ධම්‌මජීවිනොති ධම්‌මෙ ඨත්‌වා ජීවිකං කප්‌පෙන්‌තීති ධම්‌මජීවිනො. අත්‌ථාසං පචුරා හොන්‌තීති වඩ්‌ඪිසඞ්‌ඛාතා අත්‌ථා එතෙසං බහූ හොන්‌ති. ඵාසුකං උපජායතීති අඤ්‌ඤමඤ්‌ඤං ඵාසුවිහාරො ජායති. කාමකාමිනොති කාමෙ කාමයමානා.
Kadariyāti thaddhamaccharino. Jānipatayoti jayampatikā. Vadaññūti yācakānaṃ vacanassa atthaṃ jānanti. Saññatāti sīlasaṃyamena samannāgatā. Dhammajīvinoti dhamme ṭhatvā jīvikaṃ kappentīti dhammajīvino. Atthāsaṃ pacurā hontīti vaḍḍhisaṅkhātā atthā etesaṃ bahū honti. Phāsukaṃ upajāyatīti aññamaññaṃ phāsuvihāro jāyati. Kāmakāminoti kāme kāmayamānā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 3. පඨමසංවාසසුත්‌තං • 3. Paṭhamasaṃvāsasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 3-4. පඨමසංවාසසුත්‌තාදිවණ්‌ණනා • 3-4. Paṭhamasaṃvāsasuttādivaṇṇanā
