| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༣. པཋམསཾཝཱསསུཏྟཝཎྞནཱ
3. Paṭhamasaṃvāsasuttavaṇṇanā
༥༣. ཏཏིཡེ སམྦཧུལཱཔི ཁོ གཧཔཏཱི ཙ གཧཔཏཱནིཡོ ཙཱཏི བཧུཀཱ གཧཔཏཡོ ཙ གཧཔཏཱནིཡོ ཙ ཨཱཝཱཧཝིཝཱཧཀརཎཏྠཱཡ གཙྪནྟཱ ཏམེཝ མགྒཾ པཊིཔནྣཱ ཧོནྟི། སཾཝཱསཱཏི སཧཝཱསཱ ཨེཀཏོཝཱསཱ། ཚཝོ ཚཝཱཡཱཏི གུཎམརཎེན མཏཏྟཱ ཚཝོ གུཎམརཎེནེཝ མཏཱཡ ཚཝཱཡ སདྡྷིཾ། དེཝིཡཱ སདྡྷིནྟི གུཎེཧི དེཝིབྷཱུཏཱཡ སདྡྷིཾ། དུསྶཱིལོཏི ནིསྶཱིལོ། པཱཔདྷམྨོཏི ལཱམཀདྷམྨོ། ཨཀྐོསཀཔརིབྷཱསཀོཏི དསཧི ཨཀྐོསཝཏྠཱུཧི ཨཀྐོསཀོ, བྷཡཾ དསྶེཏྭཱ སནྟཛྫནེན པརིབྷཱསཀོ། ཨེཝཾ སབྦཏྠ ཨཏྠོ ཝེདིཏབྦོ།
53. Tatiye sambahulāpi kho gahapatī ca gahapatāniyo cāti bahukā gahapatayo ca gahapatāniyo ca āvāhavivāhakaraṇatthāya gacchantā tameva maggaṃ paṭipannā honti. Saṃvāsāti sahavāsā ekatovāsā. Chavo chavāyāti guṇamaraṇena matattā chavo guṇamaraṇeneva matāya chavāya saddhiṃ. Deviyā saddhinti guṇehi devibhūtāya saddhiṃ. Dussīloti nissīlo. Pāpadhammoti lāmakadhammo. Akkosakaparibhāsakoti dasahi akkosavatthūhi akkosako, bhayaṃ dassetvā santajjanena paribhāsako. Evaṃ sabbattha attho veditabbo.
ཀདརིཡཱཏི ཐདྡྷམཙྪརིནོ། ཛཱནིཔཏཡོཏི ཛཡམྤཏིཀཱ། ཝདཉྙཱུཏི ཡཱཙཀཱནཾ ཝཙནསྶ ཨཏྠཾ ཛཱནནྟི། སཉྙཏཱཏི སཱིལསཾཡམེན སམནྣཱགཏཱ། དྷམྨཛཱིཝིནོཏི དྷམྨེ ཋཏྭཱ ཛཱིཝིཀཾ ཀཔྤེནྟཱིཏི དྷམྨཛཱིཝིནོ། ཨཏྠཱསཾ པཙུརཱ ཧོནྟཱིཏི ཝཌྜྷིསངྑཱཏཱ ཨཏྠཱ ཨེཏེསཾ བཧཱུ ཧོནྟི། ཕཱསུཀཾ ཨུཔཛཱཡཏཱིཏི ཨཉྙམཉྙཾ ཕཱསུཝིཧཱརོ ཛཱཡཏི། ཀཱམཀཱམིནོཏི ཀཱམེ ཀཱམཡམཱནཱ།
Kadariyāti thaddhamaccharino. Jānipatayoti jayampatikā. Vadaññūti yācakānaṃ vacanassa atthaṃ jānanti. Saññatāti sīlasaṃyamena samannāgatā. Dhammajīvinoti dhamme ṭhatvā jīvikaṃ kappentīti dhammajīvino. Atthāsaṃ pacurā hontīti vaḍḍhisaṅkhātā atthā etesaṃ bahū honti. Phāsukaṃ upajāyatīti aññamaññaṃ phāsuvihāro jāyati. Kāmakāminoti kāme kāmayamānā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༣. པཋམསཾཝཱསསུཏྟཾ • 3. Paṭhamasaṃvāsasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༣-༤. པཋམསཾཝཱསསུཏྟཱདིཝཎྞནཱ • 3-4. Paṭhamasaṃvāsasuttādivaṇṇanā
